Palacionkir soldadonakajj suma yatiyäwinakwa istʼapjje

Khä 59 maranjja, Julio sat capitanaw qarit soldadonakapampi presonak Roma markar apasipki. Jupanakasti Puerta Capena sat cheqnam mantasipki. Palatino lomnamwa pasawayapjje, ukanwa Nerón emperadoran palaciopajj jikjjatasi. Uka palaciojj soldadonakampi jarkʼaqatawa. Soldadonakajj espadanakapjja isinakap manqharuw imantapjje.a Presonakajj Foro romanot jayarstʼasajj Viminal sat loma makatapjje. Ukat romanonakan diosanakapatakejj altaranakajj utkji uka cheq pasasinsti, kawkhantï soldadonakajj ejercicio lurapki uknämwa pasawäpjjaraki.

Uka presonakat maynïrejj Pablowa. Mä qhawqha phajjsinak nayrajja, Pablojj barcon thayampi apatäkäna ukhajj akham sasaw mä angelajj säna: “Jumajj Romankir emperadoran nayraqatapar uñstañamawa” sasa (Hech. 27:24). ¿Ukajj niyat phoqhaspachäni? Pablojj Roma imperion capitalap uñjasajja, kuntï Jesusajj Antonia Fortalezan (Jerusalén markana) siskäna uk inas amtaschïna. Jesusasti akham sänwa: “Chʼamañchtʼasim, Pablo. Kunjämtejj aka Jerusalén markan nayat parlktajja, ukhamarakiw Roma markan parlañamajja wakisi” sasa (Hech. 23:10, 11).

Inas jichhajj Castra Praetoria uksar uñtarakchi, torrenakani ukat perqanakapajj wila ladrillonakat lurtʼatawa. Ukasti, Roma markankir policianakana ukat emperadorar jarkʼaqer soldadonakan cuartelapawa. Uka jachʼa utanjja, walja soldadonakapuniw jakapjje, 12.000 palacio uñjir soldadonaka ukat policianakasa, guerran nuwasiñatak soldadonakas waltʼatapunïpjjewa. Uka cheqasti, emperadoran chʼamapampi sasiwa. Ukat niyakejjay palacio uñjir soldadonakajj Roma imperion provincianakapat apanit presonakar uñjapjjchejja, ukanwa Julio capitanajj presonakapar katuyjje. Ukar sarañajj wali jaya ukat chʼamäkchïnsa, puriyiwa (Hech. 27:1-3, 43, 44).

Romar apatäkäna ukhajj Pablorojj muspharkañanakaw pasi. Qota mathapinak sartankäna ukhajja, jumasa ukat uka barconkir jaqenakas janiw jiwapkätati sasaw Diosajj Pablor yatiyäna. Ukat Malta islan venenoni mä asirojj achuntkäna ukas janirakiw kamachkänti, ukat waljanirurakiw qolläna, uk luratapatjja diosawa sasaw Pablot sapjjäna. Palacionkir soldadonakajj inas ukanak yatipjjarakchïna.

Janïr Roma markar mantkipanjja, Pablojj “Foro de Apio” ukat “Tres Tabernas” satäkis uka cheqanwa jilat kullakanakamp jikisïna (Hech. 28:15). Ukampis jichhajj cadenanakampi chinuntawa, ¿kunjamsa Roma markan yatiyani? (Rom. 1:14, 15.) Presonakjja palacio uñjirinakan jilïriparu jan ukajj prefectoruw katuyasirïna sasaw yatjjattʼatanakajj sapjje. Ukhamäspäna ukhajja, Pablojj Sexto Afranio Burro sat prefectoruw katuyatäpachäna, jupaw Roma markanjj wali munañanirakïnjja.b Ukhamächïna janisa, Pablojj mä soldadompi uñjatänwa. Ukat qorpachasiñ uta jupa pacha jikjjatasiñapatakiw jaytapjjarakïna, ukhamatwa visitanak katoqäna ukat jan khitin jarkʼata yatiyaskakïna (Hech. 28:16, 30, 31).

Janïr Nerón emperadoran ukar irpkasajja, inas Afranio Burro chachajj kunjamtï lurirïkäna ukham Pablorojj emperadoran palaciopana jan ukajj soldadonakan cuartelapan jiskhintchïna. Ukanwa Pablojj ‘jiskʼanakarusa jachʼanakarus’ Diosan arunakap yatiyi (Hech. 26:19-23). Kunjamjjay Afranio Burro chachajj Pablor uñjchïna uk janis yatkstanjja, janiw soldadonakan cuartelapan jistʼantatäkänti.c

Pablojj jachʼpach utwa alquiltʼasïna, ukhamat “Romankir judionakan jilïrinakaparu” tantachthapiñataki ukat Diosan arunakap yatiyañataki, ukhamaraki visitir sarapkäna ukanakaru. Ukat Pablor jistʼjjäsipkäna uka soldadonakarojj istʼañakiw waktʼäna. Pablojj “alwat jaypʼukamarakiw” judionakarojj Diosan Reinopata ukat Jesusjjat parläna (Hech. 28:17, 23).

Palacionjja, sapüruw soldadonakajj palacio uñjañatakejj cambiapjjäna. Pablojj pä maraw jistʼjjasitäna, ukat kawkïr soldadonakatï jupar uñjapkäna ukanakajj inas cambiapjjarakchïna. Ukhamasti, Pablojj Éfeso, Filipos, Colosas markankirinakaru ukat hebreonakaru, ukhamaraki Filemón jilataru carta apayañataki qellqaykäna ukjj yaqha yaqha soldadonakaw istʼapjjpachäna. Ukat Onésimo chachampiw parltʼaraki, Onesimosti mä eclavönwa ukat uywiripatwa saraqaniwayjjatayna, juparusti Pablojj yoqaparjamaw uñji ukat wasitatwa uywiripan ukar khitjjaraki (File. 10). Ukat jupar jistʼjjäsipki ukanakatsa llakisirakiwa (1 Cor. 9:22). Ukat soldadonakar isinakapat jisktʼaskiri ukat ukanakat yatjjatasin mä uñachtʼäwi qellqaskiri amuyañajj janiw chʼamäkiti (Efe. 6:13-17).

Apóstol Pablojj jistʼantatäkäna ukaw Diosan arunakap soldadonakaru ukat yaqha jaqenakar yatiyasiñapatakejj yanaptʼawayi (Fili. 1:12, 13). Castra Praetoria ukankirinakajja, Roma imperionkir jaqenakampi ukat emperadorampi, familiapampisa, servirinakapampisa ukat esclavonakapampis parlapjjaspanwa. Ukhamasti, janiw soldadonakakejj Diosan arunakap istʼapkänti, jan ukasti yaqha jaqenakas istʼapjjarakïnwa, ukat jupanakat mä qhawqhanejj cristianoruw tukupjjäna (Fili. 4:22). Pablon jan ajjsartʼatapaw walja jilat kullakanakarojj Diosan arunakapat ‘jan ajjsaras’ parlañatak chʼamachtʼäna (Fili. 1:14).

Jiwasarojj ukhamarakiw Pablon sarnaqäwipajj ‘Diosan arunakap parlañataki chʼamachtʼistu; wakiski ukkhasa, jan wakiski ukkhasa’ (2 Tim. 4:2). Yaqhep jilat kullakanakajja, ukhamarakiw utanakapana, chuymankipstatanakar uñjañ utanakana jan ukajj hospitalanakan jistʼantat uñjasipjje. Yaqhepasti iyawsäwip laykuw carcelan jistʼantatäpjje. Kunjamanjjay jikjjataschiñäni, khitinakatï uñjir jutapkistu ukanakarojj Diosan arunakapat parlañasapuniwa, inas doctoraru jan ukajj khitinakatï yanaptʼkistu ukanakaru. Kunapachatï taqe horasan Diosan arunakap yatiytan ukhajja, ‘Diosan arunakapajj cadenanakampi jan chinkatatätapjja’ sum amuytanjja (2 Tim. 2:8, 9).