Jan waltʼäwinakxa familian atipjsnawa

 1. ¿Yaqhip familianakanxa jan uñjkaña kuna jan walinakas utji?

MÄ THANTHA autox jarstʼatax wali sumaw uñtasi. Jayat uñtatax machaqäkaspas ukhamawa. Ukampis manqhatxa saruw tukjaski. Niya ukhamarakiw yaqhip familianakaxa. Amuyatax walikïsipkaspas ukhamawa, jachañsa axsarañsa kusisit uñnaqampis chhaqtayapkaspa ukhamawa. Uta manqhanxa jan walinakaw familiar tukjaski. Mayasti machañanakawa, yaqhasti nuwasiñarakiwa.

 2. 1) ¿Bibliax kamsis alcohol umañxatxa? 2) ¿Kunas wali umirïñaxa?

² Alcohol mä jukʼa umtʼañaxa walikïskiw siw Bibliaxa, ukampis machjasiñax juchawa sarakiwa (Proverbios 23:20, 21; 1 Corintios 6:9, 10; 1 Timoteo 5:23; Tito 2:2, 3). Ukampis wali umirïñax janiw aliq machañakïkiti, wali umirinakax umañak munasipki, jan umasax janiw waltʼxapxiti. Janiw jilïrinakakix wali umirïpkiti, jan ukasti wayn tawaqunakaw wal umapxaraki.

 3, 4. Chachax umirïchi ukhaxa kunjamas warmix jikxatasispa ukat wawanakas kunjamarakis uñjasipxaspa.

³ Alcohol umañax familianakaruw jan waltʼayi, sumankañ apaqi sasaw Bibliax nayratpach säna (Deuteronomio 21:18-21). Machañax familianxa taqiniruw jan walin uñjasiyi. Chachax umirïchi ukhaxa warmix wal chʼamachasi jan umxañapatakixa, ukat umatäsin jan walinak jan lurañapatakis walirak chʼamachasi. Inas alcohol imantchi jan ukax jayar jaqtchi, qullqsa imantarakchi, familiar munasiñ tuqitsa, jakäwiru ukat Diosar munasiñ tuqitsa arxayaraki ukhamawa, ukampis janiw istʼaskiti machaskakiwa. Jan kunjamatsa machañ apaqirjamäxasax llakisiñakiw utjxi, janis kunsa lurirjamäkaspa ukhamwa amuyasxi. Inas wal phiñaschispa, axsararakchispa, chuymas ustʼata ukham jikxataschispa, jupas juchanïkaspa ukhama.

⁴ Awkix umirïchi ukhaxa wawanakax jan walinwa uñjasipxaraki. Yaqhipax nuwjataw uñjasipxi, tuqjata, jiskʼachjata ukham kunayman jan walin uñjasipxi. Awkin jan ukax taykan ukham machirïtapatxa inas jupanakpachas juchañchasipxchispa. Machirix luratanakapampiw mayninakar axsarañ mantayi, janikiw khitirus atinisxapxiti. Niyakixay kunatï utan pasaski uka tuqitxa jan khitimpis parltʼañjamäkchixa, wawanakax jupanakpachaw jan walinak lurasipxi chuym jan ustʼayasiñatakixa (Proverbios 17:22). Yaqhip wawanakax jachʼäxapxi ukhasa janikiw jupanakpachas atinisipkiti, janirakiw jupanakpachas munasipkiti.

 5. ¿Utasan maynix wali umirïchi ukhaxa kun lurañas wakisispa, ukat kunas wali chʼamäspa?

⁵ Wali umirinakatakix janiw qullax utjkiti sasaw yatxattʼatanakax sapxi, ukampis janipun mä jukʼsa umxapxaspa ukhaxa waliptapxaspaw sasaw sapxi (Mateo 5:29, NM uñxatäta). Ukampis wali umiri jaqir yanaptʼañax wali chʼamäspawa, machañax walikïskaspas ukhamwa amuyasipxi. Ukat familiaranakax uka jan wal askichañatakix kunatï lurañäki ukanak lurapxi ukhaxa, inas machirix amuytʼaschispa, machañax jan walïtapa. Mä qullirix walja machirinakaruw yanaptʼatayna, familianakaparus ukhamaraki, ukat jupax akham sänwa: “Amuyataxa, familiax janis kunas paskaspa ukham jakasipkañapakiwa. Alcohol sinti umirix amuytʼasiñapawa, familiampi jupampix jayarstʼatäpkaspas ukham amuyasiñapawa” sasa.

 6. ¿Mä familian wali machirix utjchi ukhaxa kawkit apstʼat yatichäwinakas yanaptʼaspa?

⁶ Utasan wali machir jaqix utjchi ukhaxa, Biblian iwxanakapaw sum jakasiñxa yanaptʼistaspa (Isaías 48:17; 2 Timoteo 3:16, 17). Yaqhip familianakarux kuna yatichäwinakas sinti machañar saykatañxa yanaptʼatayna uk uñjañäni.

 7. ¿Maynix familia taypit wali umirïchi ukhaxa khitin juchapasa?

⁷ Janiw jumapachax juchañchasiñamäkiti. Diosan Arupax akham siwa: “Sapa mayniwa luräwinakapat llakisiñapa” ukat “taqi maynipï Diosarux luräwinakasat cuenta churañänixa” sasa (Gálatas 6:5; Romanos 14:12). Inas machir jaqix familiaranakapar juchañchispa. Yaqhipax akham sapxiwa: “Sum uñjapxitasmaxa, janiw umxiristi” sasa. Uka arunakar istʼsna ukhaxa, umaskakim sisksnas ukhamäspawa. Inas yaqhan machirïtap laykux jan walin jumax uñjassta, ukampis sapa mayniw luräwinakasatxa cuenta churañäni, machiris ukhamaraki (Filipenses 2:12 uñxatarakïta).

 8. ¿Jan wali luratanakapat amuyasiñxa kunjamatsa mä machir jaqir yanaptʼsna?

⁸ Machasinxa jan walinakaruw purispa, ukampis janiw ukanakatxa jarkʼaqkapunsnati. Proverbios qillqatanxa wali colerasir jaqitwa parli, ukampis uka tuqit yatichäwinakax wali machir jaqinakatakirakïspawa, ukanxa akham siwa: Yanaptʼäta ukhaxa, “jukʼamp jan waliruwa sarani” sasa (Proverbios 19:19). Machirix umirïtap layku jan walir purini ukhaxa janiw yanaptʼañamäkiti, yatiñapawa. Jupa pachaw kuntï qʼañuchki ukxa qʼumachañapa, ukat jan irnaqäwir sarirjamäkchisa juparakiw irnaqäwir yatiyañapa.

 9, 10. ¿Machirin familiaranakapax kunatsa yanaptʼayasipxañapa, ukampis khitimpis jilpach yanaptʼayasipxañapa?

⁹ Yaqhanakampi yanaptʼayasiñamarakiwa. Proverbios 17:17 jiskʼa tʼaqax akham siwa: “Mä amigox taqi horasan munasiripuniwa; llakisiñansti mä jiljamaw chuymachasi” sasa. Familia taypin machirix utji ukhaxa wal llakispachätaxa, yanapiritakïtawa. ‘Mä chiqpach amigompi’ taqi chuyma parltʼañamawa (Proverbios 18:24). Inas yaqhanakax ukham jan walin uñjasipxarakirïchi, ukat nayrar sartasax suma iwxtʼanakampiw jumar iwxtʼapxiristamxa, ukhamatwa jumax uka jan walir saykatarakisma. Ukampis amuytʼasiñamarakiwa. Janiw uka tuqitxa taqinir arxayañamäkiti, jan ukasti khitinakatix atinisiñjamäki ukanakarukiw yatiyañama, janiw “arunaka apnaqiri[ru]x” parlañamäkiti (Proverbios 11:13).

¹⁰ Irpir chuymaninakar atinisiñamarakiwa. Tamankir irpir chuymaninakax wal yanaptʼapxiristamxa. Jupanakax Diosan Arupatxa wali yatxattʼatäpxiwa, ukat ukarjam yatichañsa wali sum yatipxaraki. ‘Jupanakasti thayat imantasiñjamäpxiwa, jachʼa mathapi thayatsti jupanakax imapxiwa, waña uraqin uma irpañjamäpxiwa, wasaran mä jachʼa qalan chʼiwipäkaspas’ ukhamäpxiwa (Isaías 32:2). Irpir chuymaninakax jan walinakatwa jilat kullakanakar jarkʼaqapxi, ukatxa kawkïrinakatix llakinakan uñjasipki ukanakarux wali khuyaptʼayasiñampiw chuymachapxi, sapa mayniw jupanakar wal yanaptʼañ munapxi. Jupanakamp yanaptʼayasiñamawa.

11, 12. ¿Familiasan wali machirix utjchi ukhaxa khitis wali sum yanaptʼistaspa, ukat kunjamsa uk jikxatsna?

¹¹ Jehová Diosampiw yanaptʼayasiñama. Biblianxa akham suma arunakaw utji: Jehová “Tatitux llakimp aynachtʼatanakan jakʼapankaskiwa, jupanakar qhispiyañataki, aynachtʼat chuymanakap waytañataki” (Salmo 34:18). Wali machirix mä familia taypin utjki ukhaxa wali llakiwa, janiw sum jakasiñjamäxiti, jumax ukham jikxatassta ukhaxa ak amtañamawa, ‘Jehová Diosax juma jakʼankaskiwa’. Kunjamsa familian jikxatasipxta ukxa sum yati (1 Pedro 5:6, 7).

¹² Kuntï Jehová Diosax Arupan siski uk iyawsañax wal chuymachistaspa (Salmo 130:3, 4; Mateo 6:25-34; 1 Juan 3:19, 20). Arunakap yatiqasin ukarjam sarnaqasaxa qullan ajayupwa katuqañäni, ukaw yanaptʼistani, sapürjam uka jan walir saykatañatakiw ‘Diosan jachʼa chʼamapxa’ katuqañäni (2 Corintios 4:7)a.

13. ¿Kuna jan walinsa walja familianakax uñjasipxaraki?

¹³ Alcoholampi machañax utji ukhaxa, yaqha jan waliw utjaraki: utan wali nuwasiñanakaw utjaraki.

14. ¿Kuna tiempotpachsa familia pura nuwasiñanakax uñstawayi, ukat jichhürunakanxa kunjamarakisa?

¹⁴ Nayraqatxa Cainampi Abelampiw jila pura nuwasipxatayna, jupanakaw nuwasiñ uñstayapxatayna (Génesis 4:8). Ukat aksaruxa, jaqinakax utan kunayman nuwasiñanakampi usuchjasiñanakampi jan waltʼayataw uñjasiwayi. Walja chachanakaw warmipar nuwapxi, warminakas chacharux nuwapxi ukhamawa, yaqhip awk taykanakax jan sinttʼasisaw jiskʼa wawanakapar wal jawqʼjapxi, maysa tuqitxa wayn tawaqunakaw chuymankipstata awk taykanakapar nuwapxaraki.

15. ¿Utan nuwasiñanakax kuna jan walinsa familiaranakar uñjasiyi?

¹⁵ Familian nuwasisawa usuchrantasipxi. Chachan nuwata mä warmix akham sänwa: “Wal chuym ustʼayasta, jaqitakis mä phinqʼaw sarnaqta. Alwanakax janiw ikiñatsa sartañ munkti ukat samkakïkaspas ukham amuyasiñ munta” sasa. Awk taykar nuwasiskir uñjiri jan ukax ukhaman tʼaqhisiyat wawanakax familianïxapxani ukhaxa ukham nuwasirïpxarakispawa.

16, 17. ¿Kunjamsa chuym ustʼayasipxi, ukat kunjamsa familiar mayjtʼayi?

¹⁶ Familian usuchjasiñanakax janiw jañchi chhuxrintasiñakïkiti; jan ukasti jan wali arunakampi maynit maynikam chuyma ustʼayasiñawa. Proverbios 12:18 jiskʼa tʼaqanxa akham siwa: “Utjapuniwa parlatanakapampi mayniru usuchjirixa” sasa. Uka ‘usuchjasiñanakaxa’ jachʼat tuqisiñanakampi ukat sutichjasiñanakampïspawa, jan wali arunakampi kʼumisiña, phinqʼachaña ukat nuwasiñampi axsartʼayaña ukanakäspawa. Uka jan walinakax janiw amuyañjamäkiti.

¹⁷ Yaqhip wawanakax wali chuyma ustʼataw sarnaqapxi, ukax wali llakkañawa, wal wawanakar tuqipxi, jan kuns sum lurxapxi ukhaxa wal jiskʼachapxi, janis amuytʼasirïkaspa, janis jaqïkaspa ukhamwa uñjapxi. Ukham arunakampi jiskʼachatax janiw wawanakax kunsa amuyuparjamax sum lurxapxiti, axsarayasipxiwa. Chiqpachansa taqi wawanakaw chiqañchäwitakïpxi. Ukampis Bibliax awk taykanakarux akham siwa: “Jan wawanakamampix sinti qhurüpxamti jan jupanakan mayjtʼasipxañapataki” sasa (Colosenses 3:21).

18. ¿Familian nuwasiñasa usuchjasiñas kawkinsa qallti, ukat kunjamat apanuksna sis Bibliaxa?

¹⁸ Nuwasiñas mayninakar usuchjañas chuymampit amuyumpit juti; kunjamxay amuystan ukarjamaw kuns lurtanxa (Santiago 1:14, 15). Nuwasiñ munirix janiw pachpa amuyunïñapäxiti, ukhamatwa jan nuwasxaniti (Romanos 12:2). ¿Ukax lurañjamäspati? Jïsa. Diosan Arupax chʼamaniwa, amuyunakasxa jan walit sumaruw tukuyaspa. ‘Jan tukjañjam’ jan wali amuyunaksa chuymasat apsurakispawa (2 Corintios 10:4; Hebreos 4:12). Maynixa, Bibliat sum yatiqasaw uka jan wali amuyunakxa apanukuspa, ukhamata machaqata isthapisiñataki, mä arunxa yaqha amtanïxañataki (Efesios 4:22-24; Colosenses 3:8-10).

19. ¿Cristian chacha warminakax kunjamsa uñjasipxañapa?

¹⁹ Kunjamsa chachax warmir uñjañapa, ukat warmis kunjamsa chachapar uñjañaparaki. Diosan Arupax akham siwa: “Chachax warmiparux munasiñapa[wa], pachpa janchiparjama. Khititix warmiparux munaski ukax jupa pachpaw munasi” sasa (Efesios 5:28). Ukatxa warminakamarux “jachʼaru aptapxan, [‘mä turpa pʼakisir vasorjama’, MT]” sasaw Bibliax chachanakar saraki (1 Pedro 3:7). Warminakarusti akham sarakiwa: ‘Chachanakamar munapxam’ ukat ‘istʼapxarakim’ sasa (Tito 2:4; Efesios 5:33). Chiqpachansa khititix warmipar nuwaski ukat jiskʼachaski ukaxa janiw “warmijarux jachʼaruw aptaskta” sasax siskaspati. Ukat khiti warmitï chachapar jan yäqasis jan wali arunakampi arxaychi, sapa kuti tuqiskchi ukhaxa janirakiw “nayax chachajar munastwa ukat istʼaraktwa” sasax siskaspati.

20. ¿Khitirus awk taykanakax cuenta churapxani, ukat kunatsa wawanakax jan lurirjamäpki ukanakxa jan mayipxañapäki?

²⁰ Wawanakax kunjam uñjatäpxañapasa. Awk taykan munasita ukat suma uñjata ukhamaw wawanakax sarnaqasipxañapa, ukwa jupanakax munapxi. Wawanakax Jehová Diosan aski “churäwinakapawa”, Diosan waxtʼäwipawa sasaw Bibliax qhanañchi (Salmo 127:3). Awk taykaw uka churäwxa uñjapxañapa, kunattix Diosaruw cuenta churapxani. ‘Taqi kunatix wawanakax lurapki ukanakatwa’ Bibliax parli, ‘pisi amuytʼanïpxatapatsa’ parlarakiwa (1 Corintios 13:11; Proverbios 22:15). Wawanakax jan ‘amuytʼasisaw’ kunsa awisax lurapxi, ukax awk taykan chuymapankañapapuniwa. Wawäsipkiwa. Awk taykax janiw jan lurirjamäpki ukanakxa mayipxañapäkiti (Génesis 33:12-14 uñxatäta).

21. ¿Kunjamanakatsa wawanakax Diosan kamachinakaparjamax chuymankipstata awk taykaparux uñjapxaspa?

²¹ Kunjamsa chuymankipstata awk taykanakar uñjañasa. Levítico 19:32 jiskʼa tʼaqax akham siwa: “Jilïri jaqinak nayraqatansti saytʼasisina jupanakarux mä suma axsartʼaña uñachtʼayarakim” sasa. Ukhamasti, chuymankipstatanakarux respetompiw wali sum uñjasiñapäna, ukwa Diosan Leyinakapax uñachtʼayistu. Ukat kunapachatï awkis jan ukax taykas sinti chuymanïxi, jan sartirjamäxi, jan ukax sinti usutäxi, sintirak kuns waytʼasi ukat jan amuytʼasirjamäxi ukhaxa wali chʼamäspawa awk taykar wali respetompi sum uñjañaxa. Ukampis ‘kunja munasiñampitix awk taykax wawäkan ukhax uñjänxa, uka pachpa munasiñampiw’ wawanakax awk taykar uñjapxañaparaki (1 Timoteo 5:4). Ukhamax wali respetompiw awk taykar wawanakax uñjapxañapa, qullqix munasini ukhaxa qullqimpiw yanaptʼapxaspa. Chuymankipstata awk taykar nuwañasa jan ukax chuym ustʼayañasa janipuniw Diosan kamachinakaparjamax walïkiti.

22. ¿Familian jan nuwasiñatakix kunampis jan atipayasiñasäki, ukat kunjamsa uk lursna?

²² Jan colerampix atipayasipxañäniti. Proverbios 29:11 jiskʼa tʼaqanxa akham siwa: “Jan amuytʼan jaqix mäkiwa kunatsa colerasi, ukampis yatiñan jaqixa colerasiñapxa mäkiwa apanuku” sasa. ¿Kunjamatsa colerampix jan atipayasksna? Jan wali amtanakampi atipayasiñat sipansa, jankʼakiw kuna jan wal utjipans askichañasa (Efesios 4:26, 27, MT). Kawkintï colerampi atipayasirjamäkstan ukhaxa mistxañaw wakisispa. Jehová Diosat qullan ajayup mayisiñasawa, ukhamatwa llampʼu chuymanïsna (Gálatas 5:22, 23). Inas coler apaqayasiñatakix muyttʼaniñas jan ukax jalnaqtʼañas wakischispa (Proverbios 17:14, 27). ‘Llampʼu chuymanïñataki’ chʼamachasiñasawa (Proverbios 14:29).

23. ¿Maynix cristianükasin sapa kuti ukat yatkasin familiapar colerampi atipayasisin nuwani jan ukax usuchjani ukhax kunas kamachaspa?

²³ “Uñisisiñanaka, quejanakan sarnaqañanaka, [...] colerasiñanaka” taqi ukanakaxa Diosatakix juchawa siw Biblianxa, ukat “khitinakatix ukanak lurapki ukanakaxa janiw Diosan reinopanxa katuqatäpkaniti” sasaw qhanañchi (Gálatas 5:19-21). Ukhamasti khititix cristianükasin sapa kuti ukat yatkasin warmipar colerampi atipayasisin nuwani, wawanakaparusa nuwani ukhaxa, cristian tamat jaqsutaw uñjasispa (2 Juan 9, 10 uñxatarakïta). Ukhamatwa cristian tamax nuwasirinakamp jan qʼañuchatäkaniti (1 Corintios 5:6, 7; Gálatas 5:9).

24. 1) ¿Chachan nuwjata warmisa jan ukax warmin nuwjata chachas kuns lurapxaspa? 2) ¿Munat masinakasa irpir chuymaninakasa kunjamsa yanaptʼapxaspa, ukat kunsa jan lurapxañapäki?

²⁴ ¿Mä cristiano kullakan chachapax wali nuwasirïspa jan ukax mä cristiano jilatan warmipax wali nuwasirïspa, ukat ukhamakïskaspa ukhaxa kun lurañas wakisispa? Yaqhipax ukhampachas janiw jaljtapkiti, ukatakix kunayman amtanakaw utjaspa. Ukampis yaqhipax jaljtapxarakiwa. Yaqhipax Diosar yupaychañ tuqitsa, jañchinsa amuyunsa jan walin uñjasipxi, inas jiwayirjamächi, ukatwa jaljtxapxi. Ukham nuwataxa Jehová Dios nayraqatanwa kun lurañsa amtañapa (1 Corintios 7:10, 11). Inas wali munat masinakasa, familiaranakas jan ukax irpir chuymaninakas yanaptʼañ munapxchispa, ukampis janiw ak luram jan ukax uk luram sapxañapäkiti. Jupaw kun lurañsa amtañapa (Romanos 14:4; Gálatas 6:5).

25. ¿Jehová Diosax kuna amtanïnsa familianakatakixa?

²⁵ Kunapachatï Jehová Diosax Adanampir Evampir jaqichkäna ukhaxa, wali sum jakasipxañapatakiw familiar uttʼayatayna, janiw machañanakas nuwasiñanakas familiar tukjañapäkänti (Efesios 3:14, 15, MT). Familianxa munasiñampi sumankañampiw utjañapäna, ukat sapa mayniw familianxa chuymas phuqtʼata ukham jakasipxañapäna, Dios tuqitsa jañchinsa amuyunsa wali sumaw jakasipxañapäna. Ukampis juchachasipxäna ukhaxa jankʼakiw familianakax jan walin uñjasiwayi (Eclesiastés 8:9 uñxatarakïta).

26. ¿Jehová Diosan kamachinakaparjam sarnaqañ munirinakax kunsa jutïr urunakanxa katuqapxani?

²⁶ Ukampis Jehová Diosax janiw familianakatakix amtap armaskiti, ukax wali kusiskañawa. Jupax mä paraíso apanïxa siwa, ukanxa taqinis “kʼuchikiw jakasipxani jan khitinsa axsarayata” (Ezequiel 34:28). Uka urunakanxa machañasa, nuwasiñasa jan ukax familian usuchjasiñasa janiw utjxaniti, ukat kuna jan walinakatï jichhürunakan familianakar jan waltʼayki taqi ukanakasa tukusxaniwa. Janiw khitis axsaraña imantañatakis jan ukax llakinaka imantañatakis lartʼasxaniti, jan ukasti “jilarkir sumankañampiw kusisipxarakini” (Salmo 37:11).