Maynit maynikam yanaptʼasiñäni ukat chʼamañchtʼasiñäni

1, 2. Payïr Jachʼa Chʼajjwäwejj niya tukusiñampïskäna ukhajja, ¿kunas Jehová Diosan 230 Qhanañchirinakapar qhespiñ yanaptʼäna?

PAYÏR Jachʼa Chʼajjwäwejj tukuyañampïskäna ukhajja, Hitler chachan ejercitopajj aynachtʼaskänwa. Ukatwa Nazi gobiernojj campos de concentración ukan katuntatäpkäna ukanakar qʼal jiwarayañatak mä orden churäna. Ukatakejja, Sachsenhausen cheqan katuntatäpkäna ukanakarojj barconak puripki uka cheqar apasin barconakar anjjatasa ukat barconak lamar qotar jalaranttayasaw jiwarayañ amtapjjäna.

² Sachsenhausen cheqan katuntatäpkäna ukanakat 33.000 jaqenakaruw 250 kilometronak Lübeck (Alemania) markakam kawkharutï barconakajj puripki ukhar kayuki sarayapjjäna. Jupanak taypinsti, 230 jaqenakajj Jehová Diosan Qhanañchirinakapäpjjänwa. Jupanakajj sojjta markanakat jutirïpjjänwa ukat juntuki sarapjjañapatakiw soldadonakajj khitapjjäna. Ukat taqeniw jan manqʼata, usuntata jikjjatasisajj jan chʼamanëjjapjjänti, ukampis jilat kullakanakasat janiw maynis jiwkänti. ¿Kunjamsa uka jan walit qhespipjjäna? Jupanakat maynejj akham sänwa: “Saraskakiñatakejj maynit maynikamaw chʼamañchtʼasipjjayäta” sasa. Jehová Diosan ‘jachʼa chʼamapamp’ yanaptʼata, ukat jupanakkam maynit maynikam munasiñampi yanaptʼasisaw uka jan walit qhespipjjäna (2 Cor. 4:7).

 3. ¿Kunatsa maynit maynikam chʼamañchtʼasiñasa?

³ Jichhürunakanjja, janiw uka jilat kullakanakjam jiwayatäñatak apatäktänti, ukampis kunayman jan waltʼäwinakanwa uñjastanjja. Diosan Reinopajj 1914 maran uttʼayatäjjäna uka qhepatjja, Supayajj alajjpachat aka oraqer jaqoqanitänwa ukat ‘tiempopan jukʼakïtap yatisajj’ wali coleratarakiwa (Apo. 12:7-9, 12). Ukat Armagedonan jakʼachasisinkipanjja, Supayajj kunayman yantʼanakampiw Jehová Diosat jitheqtayañ munistu. Ukhamarus sapürunjamaw kunayman llakinakan uñjastanjja (Job 14:1; Ecl. 2:23). Awisajj uka jan waltʼäwinakan jikjjatasisaw wali aynachtʼat uñjassna, ukat ukanakar saykatañatakejj jan chʼamanjamaw amuyassna. Mä jilatat amuytʼañäni, jupajj walja maranakaw Jehová Diosar jan jitheqtas yupaychapjjañapatakejj waljanir yanaptʼatayna. Ukat chuymankipstatäjjäna ukhajja, jupasa warmipas usuntjjapjjänwa, ukat jilatajj llakimpiw aynachtʼäna. Uka jilatjamarakiw jiwasajj Diosan ‘jachʼa chʼamapa’ muntanjja, ukhamarak maynit maynikam chʼamañchtʼasiñsa.

 4. Mayninakar chʼamañchtʼañ munstan ukhajja, ¿apóstol Pablon kawkïr ewjjtʼanakapsa amtañasapuni?

⁴ Jiwasatï mayninakar chʼamañchtʼañ munstanjja, kawkïr arunakampitï Pablojj hebreo jilat kullakanakar ewjjtʼkäna uka arunak amtañasapuniwa. Jupajj akham sänwa: “Thaqañasaw maynit maynikama kunjäman yanaptʼasiñasataki munasiñanïñasataki, ukhamarak suma luräwinak uñachtʼayasa. Janirakiw tantachasïwinakasar janejj sarañasäkiti kunjämtejj yaqhepanakajj jan sarapkiti ukhama, jan ukasti maynit mayniruw wayttʼasiñasa, Tatitun jutäwipa jakʼankjjatapa yatisinsti jukʼampïñapawa” sasa (Heb. 10:24, 25). ¿Kunjamsa uka ewjjtʼarjam phoqsna?

 5. “Thaqañasaw maynit maynikama kunjäman yanaptʼasiñasataki” siski uka arunakajja, ¿kamsañs muni, ukat kunjamsa uk lursna?

⁵ “Thaqañasaw maynit maynikama kunjäman yanaptʼasiñasataki” siski uka arunakajja, kunjamsa jikjjatasipjje uk amuyaña sañ muni. Tantachasiñ Utan arunt mayak arunttʼassna jan ukajj kunatï jan sinti wakiskirïki ukatak parlasksna ukhajja, ¿mayninakajj kunjamansa jikjjatasipjje uk amuysnati? Janiwa. Ukampis janiw mayninakat taqe kun yatjjatañ munañasäkarakiti (1 Tes. 4:11; 1 Tim. 5:13). Jiwasatï jilat kullakanakar chʼamañchtʼañ munstanjja, jupanakar sum uñtʼañasawa: kunjamsa jikjjatasipjje, kunjam jaqëpjjesa, Diosar qawqsa munasipjje, kunanaksa sum lurapjje ukat kunanakansa chʼamachasipjjañapa taqe ukanakwa sum uñtʼañasa. Cheqansa, jupanakajj amigoparjamaw jiwasar uñjapjjañapa ukat jupanakar cheqpachapuni munasitaswa amuyapjjañapa. Ukatakisti, jupanakampïñatakiw tiempo apstʼasiñasa, janiw jan walin jikjjatasipki ukat aynachtʼatäpki ukhaki jupanakampïñasäkiti (Rom. 12:13).

 6. ¿Kunjamatsa irpir chuymaninakajj tamankir jilat kullakanakar yanaptʼapjjaspa?

⁶ Tamankir irpir chuymaninakarojja, taqe chuyma ukat jan khitin jariyataw ‘Tatitun ovejanakap sum awatipjjañama’ sasaw Bibliajj ewjjtʼi (1 Ped. 5:1-3). Uka arunakarjam sum phoqhapjjañapatakejja, tamankir jilat kullakanakar sumwa uñtʼapjjañapa (Proverbios 27:23 liytʼasiñapawa). Irpir chuymaninakatï jilat kullakanakar yanaptʼañatak jankʼakipjjani ukat jupanakampïñ munapjjarakini ukhajja, jilat kullakanakajj yanaptʼa munapkani ukhajj jankʼakiw jupanakar jakʼachasipjjani. Ukat kunjamsa chuymanakapan jikjjatasipjje ukat kunas llakisiyi ukanaksa jan ajjsartʼasaw yatiyapjjani. Ukhamatwa irpir chuymaninakajj jupanakar kunanakantï yanaptʼañajj wakiski ukarjam yanaptʼapjjani.

 7. Aynachtʼatäpki ukanakan ‘jan sum amuytʼasis’ arsutapjja, ¿kunjamsa uñjañasa?

⁷ Tesalónica markankir tamar carta qellqkasajja, apóstol Pablojj akham sasaw ewjjtʼäna: “Tʼukhanakarusti yanaptʼapjjarakim” sasa (1 Tesalonicenses 5:14 liytʼasiñapawa). Khitinakatï ‘tʼukhapki’ ukanakajja, llakita ukat aynachtʼatäpjjewa. Proverbios 24:10 qellqatajj akham siwa: “Tʼaqhesiña horasantejj mayjtʼasïta ukapachajja, jukʼa chʼamanikiwa jikjjatasjjäta” sasa. Llakimp aynachtʼat jikjjatasipki ukanakajja, inas ‘jan sum amuytʼasis’ (NM) kuns arsupjjchispa (Job 6:2, 3). Ukhaman jikjjatasipki ukanakar yanaptʼkasajja ak amuyañasawa, kuntï sapki ukajj janiw kunjam jaqëpkitï uk uñachtʼayapkaspati. Rachelle kullakajj uk qhan uñjawayäna, jupan mamapajj llakimp wali aynachtʼataw jikjjatasïna. Kullakajj akham siwa: “Awisajja, mamajajj jan walinakwa parlirïna. Ukhanakajja, jupajj kunjam jaqënsa ukanakwa amtirïta, jupajj munasiri, khuyaptʼayasiri ukat wajjtʼasiri ukhamänwa. Llakimp aynachtʼatanakajja, jan amuytʼasisaw kuns arsupjje, ukwa amuyawayta. Uk istʼasin jan walit jan walimpi jan ukajj chuym ustʼayir arunakampi kuttʼayañajj janipuniw walïskaspati” sasa. Proverbios 19:11 qellqatajj akham siwa: “Yatiñan jaqejj janiw mäki coleraskiti, chuyma usuchjatasa janis kunäkaspa ukhamak uñji, ukham luratapasti jachʼa kankañawa” sasa.

 8. ¿Khitinakarus munasitas jukʼamp uñachtʼayañasa, ukat kunatsa?

⁸ Nayra jan wal luratanakapat amtasis aynachtʼatäki ukarojj ¿kunjamsa yanaptʼsna? Jupajj uka jan wali luräwip jaytkchisa, llakisiskakispawa. Corinto markankir mä juchararan arrepentisitapatjja, Pablojj akham sänwa: “Jichhajj uka jaqerojj perdonjjapjjam chuymachapjjarakim inampis llakisiñatjja sinti mayjtʼasispa. Ukatpï achiktʼapjjsmajja, jichhajja wasitat uñachtʼayapjjam kuna munasiñatï jumanakan utjkis ukjja” sasa (2 Cor. 2:7, 8). Jiwasajja, sarnaqatasampi ukat luratasampiw munasitas uñachtʼayañasa. Qawqsa jupar munastan ukat jupat llakistan uk amuykaspas ukham janiw amuyañasäkiti.

 9. ¿Kunjamsa jilat kullakanakarojj ‘munasiña ukat suma luräwinaka’ uñachtʼayapjjañapatak chʼamañchtʼsna?

⁹ Apóstol Pablojj akham sänwa: “Thaqañasaw maynit maynikama kunjäman yanaptʼasiñasataki munasiñanïñasataki, ukhamarak suma luräwina[kanïñasataki]” sasa. Jilat kullakanakasarojj munasiñ uñachtʼayapjjañapataki ukat suma luräwinak lurapjjañapatakiw chʼamañchtʼañasa. Ninajj jiwtʼañampïski ukhajja, inas sankʼa kʼisttañajj wakischispa ukhamat nina aqtayañataki (2 Tim. 1:6). Ukhamarakiw jiwasajj jilat kullakanakarojj Jehová Diosar wali munasiñamp yupaychasipkakiñapatakejj chʼamañchtʼañasa. Ukat sum lurapjjatapat walik ukham lurtajja sasin chʼamañchtʼañäni ukhajja, suma luräwinak lurasipkakiñapatakiw yanaptʼañäni.

10, 11. 1) ¿Khitinakasa chʼamañchtʼatäñ munapjje? 2) Kunjamsa chʼamañchtʼañajj maynir jan wali luräwinakap jaytañ yanaptʼaspa uk qhanañchtʼam.

¹⁰ Aynachtʼatäskstan janisa, taqeniw chʼamañchtʼatäñ muntanjja. Mä irpir chuymani jilatajj akham siwa: “Kun luratajatsa janipuniw may kutis awkijajj walik ukham lurtajja sasin sirïkituti. Ukatwa nä pachpar jan munasis jilsuwayta [...]. Jichhajj 50 maranëjjstsa, amigonakajajj irpir chuymanjam sum irnaqtʼasktajja sapkitu ukhajja, nayajj wal yuspärta [...]. Yaqhanakar chʼamañchtʼañajj kunja askisa ukjja, nä pachpat amuyasaw yateqawayta ukat uk lurañatakiw chʼamachasirakta” sasa. Chʼamañchtʼañajja, taqeniruw yanaptʼaspa: precursoranakarusa, chuymankipstatanakarusa ukat khitinakatï aynachtʼatäpki ukanakarus ukhamaraki (Rom. 12:10).

¹¹ Irpir chuymaninakajj maynin juchar puritap yatisin jupar yanaptʼañatak munasiñampi ewjjtʼapjjani ukat aski luratanakapat amtayapjjani ukhajja, jan wali luratanakap apanukuñatakiw juchanirojj yanaptʼaspa (Gál. 6:1). Ukajj cheqapunïtapwa Miriam kullakajj amuyi. Jupajj akham siwa: “Wali llakinakanwa jikjjatasiyäta, munat amigonakajaw Diosan markapat jitheqtawayjjapjjäna ukat ukharakiw awkijan pʼeqepan wilajj phallarakïna. Walpun llakimp aynachtʼayäta. Ukar atipjañatakejja, Diosar jan yupaychir mä waynampiw uñtʼasisipkayäta” sasa. Uk lurasajj Jehová Diosatak janis askëjjaspa ukhamwa amuyasïna, ukat cheqa yupaychäwi jaytañ amtjjäna. Ukat kunjamsa nayrajj Jehová Diosar taqe chuyma loqtäna ukwa mä irpir chuymanejj amtayäna, uka arunakapajj chuymaparupuniw purtʼäna. Ukatjja, Diosarojj jukʼampiw munasjjäna. Ukat khitimpitï uñtʼasiskäna ukampejj janiw chikachasjjänti ukat Diosarojj yupaychaskakïnwa.

12. Janiw mayninakjam lurktati sissna, kʼumsna jan ukajj jupas juchanïkaspa ukham amuyaysna ukhajja, ¿kunas pasaspa?

¹² Kunjamsa jilat kullakanakarojj Diosar taqe chuyma yupaychasipkakiñapatak ‘yanaptʼasktan’ uk amuyasiñasawa. Mayninakjam jan lurapjjatapata ukat amtasarjam jan lurapjjatapat janiw kʼumiñasäkiti, ukat janirakiw Diosatak jukʼamp jan irnaqtʼapjjatapat jupanakas juchanïpkaspa ukham amuyayañasäkiti. Cheqansa, ukajj jukʼamp chʼamachasipjjañapatakis yanaptʼkchinejja, mä jukʼa tiempotakikïniwa. Ukampis jilat kullakanakar chʼamañchtʼkir arunakamp parltʼañäni ukat Diosar munasitas laykuw Jupatak taqe chuym irnaqtʼañasa sasin amuytʼayañäni ukhajja, Diosar yupaychasipkakiñapatakiw yanaptʼañäni (Filipenses 2:1-4 liytʼasiñapawa).

13. ¿‘Maynit mayniru wayttʼasiñajj’ kamsañs muni? (18 janankir foto uñjjattʼäta.)

¹³ Jiwasajj “maynit mayniruw wayttʼasiñasa, Tatitun jutäwipa jakʼankjjatapa yatisinsti jukʼampïñapawa”. Uka arunakajja, jilat kullakanakar Jehová Diosar jukʼamp yupaychaskakiñapatak chʼamañchtʼaña ukat yanaptʼaña sañ muni. Jilat kullakanakasarojj munasiñ uñachtʼayapjjañapataki ukat suma luräwinak lurapjjañapatak chʼamañchtʼañajja, ninajj jiwtʼañampïski uk jukʼamp aqtayañampi sasiwa. Ukat ‘maynit mayniru wayttʼasiñajja’, nina jukʼamp aqaskakiñapatak phäña apjjatañamp sasirakiwa. Aynachtʼatanakar chʼamañchtʼkañäni ukhajja, munasiñampiw parlañasa (Pro. 12:18). Ukhamarusa, ‘jankʼakïñasaw istʼañataki’ ukat ‘janiw jankʼaki kunsa parlañasäkiti’ (Sant. 1:19). Jiwasatï mä jilataru jan ukajj kullakaru sum istʼañäni ukat kunjamsa jikjjatasi uk sum amuyañäni ukhajja, kunas aynachtʼayaski uk amuyañäniwa ukat ukarjamaw chʼamañchtʼañäni.

14. ¿Kunjamsa mä irpir chuymanejj aynachtʼat mä jilatar yanaptʼäna?

¹⁴ Kunjamsa sinttʼasiri mä irpir chuyman jilatajj walja maranak yatiyir jan mistjjeri mä jilatarojj yanaptʼäna uk amuytʼañäni. Irpir chuymani jilatajj jupar istʼkäna ukhajja, uka jilatan Jehová Diosar wal munasiskakitapwa amuyäna. Jupajja, Yatiyañataki revistan yatichäwinakap jan qheparasaw yatjjataskäna ukat taqpach tantachäwinakar sarañatakis chʼamachasiskarakïnwa. Uka jilatarojj tamankir yaqhep jilat kullakanakan luratanakapaw aynachtʼayatayna ukat chuymap ustʼayatayna. Irpir chuyman jilatajj jupas ukham jikjjataskaspa ukhamwa istʼäna, janiw juchañchkänti ukat qawqsa juparusa ukat familiaparusa munasi uks sarakïnwa. Ukat kunanakatï nayrajj paskäna ukanakajj Diosar serviñat aynachtʼayaskatap jukʼat jukʼatwa uka jilatajj amuyasjjäna. Ukat irpir chuymanejj jupamp chika yatiyir sarañatakiw invittʼäna. Irpir chuymanin yanaptʼapampiw uka jilatajj wasitat yatiyir sarjjäna ukat qhepatjja wasitatwa irpir chuymanëjjarakïna.

15. ¿Jehová Diosajj kunjamtï chuymas kawkstʼatanakaru ukat aynachtʼatanakar uñjkäna ukat kunsa yateqsna?

¹⁵ Aynachtʼat mä jaqejja, janiw jankʼak sum jikjjataskaspati ni yanaptʼatäki ukarjamas lurkaspati. Inas yanaptʼaskakiñajj wakischispa. Pablojj akham sänwa: “Mayjtʼatanakarojj chʼamañchtʼapjjam, tʼukhanakarusti yanaptʼapjjarakim” sasa (1 Tes. 5:14). Aynachtʼatanakar yanaptʼañ janiw qarjañasäkiti, jan ukasti ‘chʼamañchtʼasipkakiñasawa’. Nayrajja, Jehová Diosajj wali pacienciampiw khitinakatï aynachtʼatäpkäna ukanakar yanaptʼäna sasaw Bibliajj sistu. Amuytʼañataki, kunjamsa Elías profetajj chuymapan jikjjatasïna ukjja khuyaptʼayasiñampiw Diosajj uñjäna. Ukat profetjam loqtaskakiñapatakejj kunanakatï wakiskäna taqe ukanakwa churäna (1 Rey. 19:1-18). Ukat Davitat ukhamarakiw Jehová Diosajj khuyaptʼayasïna, jucha luratapat taqe chuyma arrepentisitap uñjasajj juchanakap pampachänwa (Sal. 51:7, 17). Salmo 73 qellqeri chacharojj Diosajj yanaptʼarakïnwa, jupajj Diosar yupaychañ niyaw jaytañampïskäna (Sal. 73:13, 16, 17). Jehová Diosajj jichhürunakanjja, ukhamarakwa khuyaptʼayasistu ukat munasistu, yamas chuymas kawkstʼata ukat aynachtʼata jikjjatasktan ukhajj jukʼampiwa (Éxo. 34:6). Khuyaptʼayasiñapajj “saparmanthiw machaqar tukuraki” ukat “jan tukuskirirakiwa” (Lam. 3:22, 23). Jehová Diosajj jupat yateqasiñasa ukat aynachtʼatanakar munasiñamp uñjañaswa muni.

16, 17. Niyakejjay aka ñanqha pachan tukusiñapajj jakʼankchejja, ¿kunsa lurañasa, ukat kunatsa?

¹⁶ Sachsenhausen cheqan preso katuntatanakajj Lübeck sat markakam apatäpkäna uka 33.000 jaqenakatjja, waljanipuniw jiwarapjjäna. Ukampis Jehová Diosan 230 Qhanañchirinakapatjja, taqpachaniw qhespipjjäna. Jupanakatï maynit maynikam jan yanaptʼasipkaspäna ni chʼamañchtʼasipkaspäna ukhajja, janiw qhespipkaspänti.

¹⁷ Jichhürunakanjja, ‘jakañaru irpiri thakinwa’ jikjjatastanjja (Mat. 7:14). Diosan yupaychirinakapajj niyaw suma oraqer mayachtʼat jakasiñatak mantapjjañäni (2 Ped. 3:13). Uka uru puriniñapkamajja, wiñay jakañar irpir thakinkaskakiñatak maynit maynikam yanaptʼasipjjañäni.