“Diosan arupasti jakaskiwa”

20. ¿Kunjamsa Hebreo 4:12 qillqatax pä tuqit amuyasispa? (Qhanañchtʼäwip uñxattʼäta.)

²⁰ Kunapachatï apóstol Pablox Hebreos 4:12 qillqatan “Diosan arupasti jakaskiwa” siskäna ukhaxa, janiw Bibliatpun parlkänti. Jan ukasti, kuna bendicionanaktï jutïrin Diosax churkistani taqi ukanakatwa parlaskäna.c Ukat Diosan arsutanakapax janiw inamay arunakakikïti jan ukasti phuqasipuniwa sañwa munarakïna. Jehová Diosax uka tuqit akham sarakïnwa: “Arunaka[ja]xa, janiw nayan ukarux chʼusaki jan kun lurasax kuttankaniti [...], kuntix nayax siskta ukwa phuqharaki” sasa (Isa. 55:11). Ukhamax kunanaktï phuqasiñap munktan ukanakax jan jankʼak phuqasxani ukhax janiw llakisiñasäkiti. Jehová Diosax ‘irnaqaskakiwa’ ukat amtap phuqasiñapkamax irnaqaskakiniwa (Juan 5:17).

21. ¿Chuymankipstat jilat kullakanakarux kunjamsa Hebreos 4:12 qillqatax yanaptʼi?

²¹ ‘Walja jaqinakat’ uñtʼatäpki ukanakaxa, walja maranakaw Jehová Diosar luqtasipki (Apo. 7:9). Ukat jupanakatxa, janiw aka ñanqha pachan chuymankipstañkam jakañ amtapkänti, Ukampis jupanakax janiw aynachtʼapkiti (Sal. 92:14). ¿Kunats ukhamäpacha? Kunjamtï yatktanxa, “Diosan arupasti jakaskiwa” siski uka arunakaxa janiw jupanakax armapkiti, ukhamarus Jehová Diosax jichhakamaw amtanakap phuqasiñapatakix irnaqaski, uksa yatipxarakiwa. Chiqas Jehová Diosax wal amtanakap phuqasiyañ muni, ukat jiwasax phuqasiñap munaraktan ukhax wal kusisiraki. Ukat kunjamsa amtapax phuqasini ukat kunjamsa markapax uka amtaparjam sarnaqaskakini uka tuqitx sum Jehová Diosax yati, ukatwa paqallqu urupankasax Jupax jichhakam samaraskaki. Kunjamtï uñjktanxa, taqi jaqinakaw Diosan samarañaparux mantapxaspa. ¿Jumax Diosan samarañapar mantaraktati?