Jesucristo pʼeqtʼirisar apoyapjjañäni

 1. ¿Jehová Diosajj kun lurasiñapsa muni?

JEHOVÁ DIOSAJJA, Reinon suma yatiyäwinakapajj oraqpachan yatiyasispa ukwa muni (Mar. 13:10; 1 Tim. 2:3, 4). Cheqas jupaw ukham yatiyasiñap muni. Jehová Diosatakejj predicacionajj wali importantewa, ukatwa wali munat Yoqapar uk pʼeqtʼañapatak ajlliwayi. Niyakejjay Jesucristojj predicación pʼeqtʼaskchejja, akapachajj tukuskani ukhajj kunatï lurasiwayki ukampejj Diosajj kusisitäniwa, janiw ukat payachasktanti (Mat. 24:14).

 2. ¿Kunanakatsa aka yatichäwin yatjjataskañäni?

² Jesusajja ‘suma phoqeri amuyasir esclavo’ toqew Biblian yatichäwinakap churistu, oraqpachan predicañatakis organiztʼistu, janipuniw nayrajj ukhamajj uñjasirïkänti, ukwa aka yatichäwin yatjjataskañäni (Mat. 24:45). Jesusampiru suma phoqeri amuyasir esclavompir apoyañatakejj kunsa sapa maynejj lursna ukwa yatjjataskarakiñäni.

 3. ¿Jesusajj kuna autoridadsa katoqawayi?

³ ¿Jesusajj predicación pʼeqtʼaskatap kunjamatsa yattanjja? Janïr alajjpachar makatkasajja, Diosat jan jitheqtir mä qhawqha discipulonakapampiw Jesusajj Galilea markankir mä qollun tantachtʼasïna. Akham sasaw jupanakar säna: “Diosaw taqe autoridad churitu, alajjpachansa ukhamaraki aka oraqensa” sasa. Ukjjarusti akham sarakïnwa: “Ukhamasti sarapjjam, taqe markanakankir jaqenakar nayan discipulojar tukuyapjjam” sasa (Mat. 28:18, 19). Jesusajj yaqha lurañanakanïkchisa, predicación pʼeqtʼañatakiw autoridad katoqawayi.

 4. ¿Jesusaw predicación pʼeqtʼaski sasajj kunatsa sissna?

⁴ Jesusajja ‘taqe markanakanwa’ predicasini, jaqenakarus nayan discipulojar tukupjjañapatakiw yanaptʼasini sasaw säna. “Nayajj sapürupuniw jumanakampïskta, akapachajj tukuskani ukapachkama” sasaw discipulonakapar sarakïna (Mat. 28:20). Uka arunakajja, Jesusajj jichhürunakkam predicación pʼeqtʼaskatapwa amuytʼayistu.

 5. ¿Kunjamsa Salmo 110:3 qellqatan phoqasiñapatak yanaptʼasktanjja?

⁵ Akapachajj tukuskani uka tiemponjja, walja predikirinakaw utjañapäna, uka toqet Jesusajj janiw payachaskänti. Aka profecía arunak phoqasiñap jupajj yatïnwa, ukan akham siwa: “Kunapachatejj ejercitomar guerratak pʼeqtʼkäta uka urojja, taqe chuymaw markamajj jumar servïtam” sasa (Sal. 110:3). Jumatï suma yatiyäwinak predicasksta ukhajja, Jesusampiru suma phoqeri esclavompiruw apoyasktajja, uka profecian phoqasiñapatakiw yanaptʼaskaraktajja. Jichhürunakan predicaskstansa, jan walinakanwa uñjasiraktanjja.

 6. ¿Kuna jan walinsa jichhürunakan uñjastanjja?

⁶ Mä jan waltʼäwejja, predicañ jarkʼapkistu ukawa. Apostatanakasa, politiconakasa, religión pʼeqtʼirinakas predicatasat kunayman kʼarinakwa parlapjje. Familiaranakasasa, uñtʼapkistu ukanakasa, trabajonkir masinakasas uka kʼarinak creyipjjani ukhajja, inas Jehová Diosar jan sirvjjañasataki, jan predikjjañasatak jarkʼapjjchistani. Yaqhep markanakanjja, enemigonakasajj jilat kullakanakar amenazapjjewa, atacapjjewa, katuntapjjewa, carcelar kunaw llawintapjje. Ukham pasañap yatjjayätanwa, kuna laykutejj Jesusajj akham sänwa: “Sutij laykusti taqe markankir jaqenakaw uñisipjjarakïtam” sasa (Mat. 24:9). Uñisipkistu ukajja, Jesusat yateqasis sarnaqatasa, Jehová Diosamp suma uñjatätaswa uñachtʼayi (Mat. 5:11, 12). Supayaw jaqenakarojj jiwas contra saytʼasipjjañapatakejj amtayi. Ukampis Supayat sipansa Jesusaw jukʼamp chʼamanejja. Jesusan yanaptʼapampejja, Reinon yatiyäwinakapajj taqe markanakanwa yatiyasiski.

 7. ¿Apocalipsis 14:6, 7 texton phoqasiskatap kunanakas uñachtʼayistu?

⁷ Yaqha jan waltʼäwejja, kunayman arunak utjki ukawa. Jesusajj mä visionan apóstol Juanar uñjaykäna ukanjja, suma yatiyäwinak yatiyasiñapatakejj kunayman arunak utjatapajj janiw jarkʼkaniti sasaw amuytʼayäna (Apocalipsis 14:6, 7 liytʼäta). ¿Kunjamsa uka jan walir atipjawaytanjja? Internetan jw.org cheqanjja, 1.000 jila arunakanwa Bibliat apstʼat qellqatanakajj utj-jje. Ukhamarus ¡Wiñayatakiw kusisit jakasisma! sat librojja, 700 jila arunakan traducisiñapatakiw aprobasiwayi. Jilapartejja, uka librompiw jaqenakarojj Bibliat yatichasi. Janiw ukakïkiti, oqaranakan Bibliat yateqapjjañapatakejj videonakaw lurasi, juykhunakatakis Bibliat apstʼat qellqatanakajj brailletwa lurasi. Ukhamatwa nayrat sipansa jukʼamp jaqenakajj Reinon suma yatiyäwinakap yateqapjjaspa. Biblian profecianakap phoqasirwa uñjasktanjja. “Kunayman arunak parlir markanakat jutiri” jaqenakaw ‘qʼoma aru’ parlañ yateqasipki, mä arunjja Biblian cheqa yatichäwinakapwa yateqasipki (Zac. 8:23; Sof. 3:9). Jesucristo pʼeqtʼirisan yanaptʼapampiw taqe ukanakajj lurasiski.

 8. ¿Predicasitapat kuna askinakas jichhakamajj jikjjatasiwayi?

⁸ Jichhürunakanjja 240 markanakan 8 millonats jila jaqenakaw Jehová Diosan markapankapjje. Sapa marajj waranqa waranqanakaw bautisasipjje. Qhawqhanis bautisasipjje ukat sipansa, machaq discipulonakajj kunja suma chuymanëjjapjjesa ukaw jukʼamp importantejja, mä arunjja “machaq jaqëñamp” isthapisipjjatapaw jukʼamp importantejja (Col. 3:8-10). Jupanakat waljanejja, qʼañu juchanaksa, nuwasiñanaksa, uñisisiñanaksa, markap toqet saytʼasiñanaks jaytawayjjapjjewa. Isaías 2:4 textonkir profeciaw phoqasiski, ukan akham siwa: “Janirakiw jukʼampejj guerran nuwasiñatak yateqjjapjjaniti” sasa. Niyakejjay machaq jaqëñamp isthapisiñatak wal chʼamachasstanjja, jaqenakarojj Diosan markapar mantanipjjañapatakiw yanaptʼtanjja, Jesucristo pʼeqtʼirisar arkaskataswa uñachtʼayaraktanjja (Juan 13:35; 1 Ped. 2:12). Jesusan yanaptʼapampiw taqe ukanakajj lurasiski.

 9. Mateo 24:45-47 textorjamajja, ¿qhepa urunakan kunaw pasani sänsa Jesusajja?

⁹ (Mateo 24:45-47 liytʼäta). Qhepa urunakanjja, ‘suma phoqeri amuyasir esclavow’ Biblian yatichäwinakap churapjjätam sasaw Jesusajj säna. Ukhamajja uka esclavojj jichhürunakan wal trabajiñapäna. Cheqas ukhamwa luraski. Diosan servirinakapampiru Bibliat yateqañ munapki ukanakampirojja, mä qhawqha ajllit cristianonak toqew Jesusajj ‘tiempopar manqʼa’ churi. Uka ajllit cristianonakajja, janiw mayninakan ‘Diosan confiyatanakapjjar munañanïpkaspas’ ukham amuyasipkiti (2 Cor. 1:24). Jan ukasti Diosan markapan ‘pʼeqtʼiripasa gobernantepas’ Jesucristowa sasaw amuyapjje (Is. 55:4).

10. Dibujonakan uñstki uka libronakatjja, ¿kawknïris wiñay jakañar apki uka thakir mantañatak yanaptʼawaytam?

¹⁰ 1919 marat aksarojja, suma phoqeri esclavojj Bibliat apstʼat kunayman qellqatanakwa jaqenakatak wakichtʼawayi, ukhamat Biblian cheqa yatichäwinakap yateqapjjañapataki. 1921 maranjja, suma phoqeri esclavojj El Arpa de Dios sat libro inglés arut apsüna, ukhamat Biblian cheqa yatichäwinakapajj jaqenakar yatichasiñapataki. Jukʼat jukʼat tiempojj mayjtʼatapatjja, yaqha libronakwa apsuwayaraki. ¿Kawknïr libros Jehová Diosar uñtʼañatakisa jupar munasiñatakis yanaptʼawaytam? Inas “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Kunsa Bibliax chiqpachapuni yatichi? ¿Kunsa Bibliajj yatichistu? sat libronakat maynïri yanaptʼawaystam. Jan ukajj inas ¡Wiñayatakiw kusisit jakasisma! sat machaq librompi Bibliat yatjjatasksta. Uka libronakajja, jaqenakar Jesusan discipulopar tukupjjañapatak yanaptʼañasatakiw lurasiwayi. Tiempoparupuniw uka libronakajj lurasiwayäna.

11. ¿Kunatsa Biblian yatichäwinakap katoqañasajj wali wakiskirejja?

¹¹ Janiw Bibliat yateqerinakakejj Bibliatsa Diosatsa sum yatjjatapjjañapäkiti, jan ukasti taqeniw sum yatjjatapjjañasa. Apóstol Pablojj akham sänwa: “Waña manqʼajja, jilïr jaqenakatakiwa” sasa. Ukatjja Bibliat yateqatarjam sarnaqañajj ‘kunatï walïki jan walïkaraki ukanak amuytʼapjjañamatakiw’ yanaptʼapjjätam sasaw sarakïna (Heb. 5:14). Jichhürunakanjja Jehová Diosan leyinakapar istʼañajj chʼamakïspawa, kuna laykutejj jaqenakajj jukʼamp jan walinakwa lurjjapjje. Ukampis Jesusajja, Diosar taqe chuyma confiyaskakiñasatakejj manqʼar uñtat suma yatichäwinakwa churistu, uka yatichäwinakajj Diosan amuytʼayat Bibliatwa juti. Suma phoqeri esclavojj Jesusan pʼeqtʼataw uka suma yatichäwinak wakichtʼi, jaqenakar churaraki.

12. Jesusat yateqasisajja, ¿kunsa Diosan sutipar respetomp uñjañatakejj lurawaytanjja?

¹² Kunjamtï Jesusajj lurkänjja, ukhamarakiw jiwasajj Diosan sutipar wali respetomp uñjtanjja (Juan 17:6, 26). 1931 maranwa Bibliarjamajj Jehová Diosan Testigonakapa suti katoqawaytanjja. Uka suti apasajja, alajjpachankir Awkisan sutip apañ munataswa uñachtʼaytanjja. Uka sutejja jiwasanakatakejj wali importantewa (Is. 43:10-12). Uka pachpa maranjja, octubre phajjsin Yatiyañataki inglés arut revistan Diosan sutipaw tapapan uñstjjäna. Machaq Mundon Jakirinakataki Biblianjja, kawkjanakantï Diosan sutipajj uñstañapäki uka cheqanakaruw Diosan sutipajj uchasiwayjjaraki. Ukampis cristianöpjjtwa sapki uka iglesianakajj janiw ukham lurapkiti, antisakiw walja Biblianakapat Diosan Jehová sutip apsjjapjje.

13. ¿Jesusajj ‘suma phoqeri amuyasir esclavo’ toqew jichhürun pʼeqtʼaskistu sasin confiyañatakejj kunas yanaptʼtam? (Juan 6:68).

¹³ Jesusajja, ‘suma phoqeri amuyasir esclavo’ toqew aka oraqen mä suma organización uttʼayawayi, ukhamat jaqenakar Jehová Dios saparuk adorapjjañapatak chʼamañchañataki. ¿Kunsa jumajj uka organizacionat amuyta? Inas Pedrjam amuysta, jupajj akham sasaw Jesusar säna: “Tata, ¿khitin ukarurak sarapjjästi? Jumaw wiñay jakañar apiri arunakanïtajja” sasa (Juan 6:68). Jehová Diosan markapar jan uñtʼkasäna ukhajj janiw kawkir sarañs puedkasänti. Uka marka toqew Cristojj kunanakatï Diosat jan jitheqtañasatakejj wakiski ukanak churistu, suma yatichirïñatakis wakichtʼarakistu. Ukatjja “machaq jaqëñampi” isthapisiñatakiw yanaptʼarakistu, ukhamat Diosar kusisiyañasataki (Efes. 4:24).

14. COVID-19 pandemianjja, ¿kunjamsa Diosan markapankañajj yanaptʼawaytam?

¹⁴ Jan walinakan uñjasktan ukhajja, wali yatiñampiw Jesusajj pʼeqtʼistu. COVID-19 pandemiajj qalltkäna ukhajja, wali qhanwa uk uñjawaytanjja. Walja jaqenakajj janiw kamachtʼasiñs puedipkänti, ukampis uka usut jarkʼaqasiñasatakejja, qhana instruccionanakwa Jesusajj Diosan markap toqejj churistäna. Walja jaqenakajj utjki uka cheqanakan barbijo uchasiñasataki, mayninakat yaqhachtʼasiñasatakiw chʼamachapjjestäna. Ancianonakarojj publicadoranakar jawstʼapjjañapatakiw amtayasïna, kunatï jakañatak munaski uka toqetsa, Diosar serviñans kunjamäsipkisa uka toqets llakisipjjañapatakiw amtayasirakïna (Is. 32:1, 2). Cuerpo Gobernanten yatiyäwinakapas jukʼamp instruccionanakwa churistäna, wal chʼamañchtʼarakistäna.

15. ¿Kuna yaqha instruccionanaksa pandemian katoqawaytanjja, ukham lurasitapat kunanakas utjawayi?

¹⁵ Pandemianjja tantachäwinakatakisa predicañatakis qhana instruccionanakwa katoqawaytanjja. Jankʼakiw tantachäwinakas asambleanakas videoconferencia toqe apasjjäna, carta toqes teléfono toqes predicasjjarakïnwa. Jehová Diosasti, chʼamachasitasarojj bendisiwayarakiwa. Walja sucursalanakajja, publicadoranakajj wal jiljjattawayi sapjjewa. Pandemianjja walja jilat kullakanakaw suma experiencianak jikjjatawayapjje (“Jehová Diosaw predicacionasar bendisi” sat recuadro liytʼäta).

16. ¿Kuna toqetsa jan payachasiñasäki?

¹⁶ Yaqhep jilat kullakanakajja, Diosan markapajj sintjamakiw aka pandemian cuidjjestu sasin inas amuyapjjchïna. Ukampis kutin kutiniw kunjamsa Diosan markapajj wali yatiñampi irpistu uk amuyawaytanjja (Mat. 11:19). Jiwasatï kunjamsa Jesusajj wali munasiñampi irpistu uka toqet lupʼiñäni ukhajja, janiw aka toqet payachaskañäniti: kunasay jutïr urunakan pasaskpan, Jehová Diosampi munat Yoqapampejj jiwasampïpjjaniwa (Hebreos 13:5, 6 liytʼäta).

17. ¿Jesusamp pʼeqtʼata trabajisajj kunjamas jumajj jikjjatasta?

¹⁷ Jesusamp pʼeqtʼata trabajiñajj wali kusiskañawa. Diosan markapan kunayman markanakatäskstansa, kunayman costumbrenakanïskstansa, kunayman arunak parlirïskstansa janiw tʼaqa tʼaq sarnaqktanti. Wali chʼamachtʼkiri yatichäwinakwa Biblia toqejj katoqtanjja, predicañatakis wali suma wakichtʼatätanwa. Sapa mayniw machaq jaqëñamp isthapisiñsa mayninakar munasiñs yateqaskaktanjja. ¡Jesusajj jiwasar pʼeqtʼaskatapat walpun kusistanjja!