‘Marka uñjir guardiat uttʼaysma’

 1. ¿Jehová Diosan uttʼayata marka uñjir guardianakajj kunsa walja maranakajj lurapjjäna? ¿Kunas qhepat Jerusalenan pasäna?

INTEJJ niyaw jalantaski. Jerusalén markan murallap patjjanjja, marka uñjir mä guardiaw (centinelaw) utji, lupimpi nayra jan qhansuyasiñatakejj amparapampiw chʼiwtʼayasi; kunatï wali jayan pasaski uk uñjañatakiw chʼamachasiraki. Ukatjja mayakwa amparapankki uka pututu wali chʼamampi phustʼi. ‘¡Babilonionakaw jakʼachasini!’ sasaw yatiyaraki. Ukampis tiempojj janiw utj-jjeti, walja maranakaw Jerusalenankirinakajj jan istʼasis sarnaqawayapjje. Jehová Diosajj uttʼaykäna uka profetanakajj patakats jukʼamp maranakaw uka uru puriniñapat yatiyjjapjjäna, ukampis jaqenakajj janiw istʼapkänti. Jichhajj babilonio soldadonakajj walja phajjsinak markar muyuntasaw Jerusalenar mantapjje, templo tukjapjje, Diosar jan confiyir jaqenakarus katuntapjje, yaqheparojj jiwayapjjarakiwa.

2, 3. 1) Mä jukʼa tiempotjja, ¿kuna jan walinsa jaqenakajj uñjasipjjani? ¿Kunsa jupanakajj jichha tiempon amtapjjañapa? 2) ¿Kuna jisktʼanakarus aka yatichäwin qhanañchaskañäni?

² Jehová Diosan alajjpachankir ejercitonakapajja, mä guerratakiw jichhürunakan wakichasisipki, ukhamat Diosar jan confiyir jaqenakar tukjañataki (Apoc. 17:12-14). Uka guerrampiw jachʼa tʼaqesiñ tiempojj tukuyani (Mat. 24:21). Ukampis jaqenakan arrepentisipjjañapatak tiempojj utjaskiwa. Diosajj uttʼayki uka marka uñjir guardianakar istʼañatakejj horasäskiwa.

³ ¿Kunatsa Diosajj marka uñjir guardianak uttʼayi? ¿Kunsa jupanakajj yatiyapjje? ¿Khitinakas guardiat uttʼayatäpjjäna? ¿Kunsa jiwasajj lurañasaraki? Uka jisktʼanakaruw aka yatichäwin qhanañchasini.

 4. ¿Kunatsa Jehová Diosajj marka uñjir guardianak uttʼayäna? (Aka yatichäwi qalltan utjki uka dibujo uñjjattʼäta).

⁴ Ezequiel 33:7 liytʼañataki. Nayra tiemponjja guardianakajj murallanak patjjan utjkäna uka torrenakankapjjänwa, ukhamatwa markankirinakar jan walinakat jarkʼaqapjjäna. Uka guardianakan utjatapajja, marka apnaqerejj qhawqsa markankirinakat llakisïna ukwa uñachtʼayäna. Cheqas chika aruma pututun phustʼasitap istʼasajja, markankirinakajj wali sustjataw sarthapipjjaspäna, ukampis istʼasirinakajj salvasipjjaspänwa. Diosan uttʼayat guardianakajj niya uka pachparakwa lurapjjerïna. Jupajj janiw israelitanakar jan wali yatiyäwinakamp ajjsarayañatakejj guardianak uttʼaykänti, jan ukasti jupanakat llakisitap layku, salvasipjjañap munatap laykuw uttʼayäna.

5, 6. ¿Kunas Jehová Diosan cheqapar uñjirïtap uñachtʼayi?

⁵ Jehová Diosajj Ezequielar guardiat uttʼaykäna ukhajja, Jupajj kunjam chuyman Diosasa ukwa uñachtʼayäna. Uk yatiñajj wal chuymachtʼistu. Jichhajj ukanakat pay yatjjatañäni.

⁶ Cheqapar uñjiriwa. Jehová Diosajj janiw taqenis mä igualakïksnas ukham uñjkistuti, jan ukasti sapa maynejj kunjamätansa ukwa uñji, ukaw cheqapar uñjir Diosätap uñachtʼayi. Sañäni, walja israelitanakas Ezequielan arunakapar jan istʼapkchïnjja, Diosajj janiw taqenis jan istʼasir jaqenakäpkaspa ukham uñjkänti, jan ukasti kunsa sapa maynejj lurani uk uñjañwa munäna. Jupajj walja kutiw ‘mä jan wali jaqe’, ‘cheqapar lurir mä jaqe’ säna. Ukhamasti, Diosajj kunsa sapa maynejj arunakap istʼasajj luri ukarjamaw juchañchi (Ezeq. 33:8, 18-20).

 7. ¿Kunjamsa Jehová Diosajj jaqenakar juzgui?

⁷ Jehová Diosajj kunjamsa jaqenakar juzgui ukaw cheqapar uñjirïtap uñachtʼayaraki. Mä jaqerojja, janiw nayra luratanakaparjam juzgkiti, jan ukasti ewjjtʼanakapar istʼasajj kunsa luri ukarjamaw juzgui. Jupajj Ezequielar akham sänwa: ‘Jan wali jaqerutï “jumajj cheqpachans jiwätawa” sasin sirista, jupasti juchap apanukusin cheqaparjam sarnaqjjaspa ukhajja, cheqpachans jakaskakiniwa’ sasa. Ukatsti akham sarakïnwa: ‘Kuna juchanaktï lurkäna ukanakat janiw ni mayas amtatäkaniti’ sasa (Ezeq. 33:14-16). Maysa toqetsti, khitinakatï walja tiempo sum sarnaqkasin jan walinak lurjjapjje ukanakajja, janiw walja maranak istʼasirïtapas jan wali luratanakap chhaqtaykaspa ukham amuyapjjañapäkiti. Diosajja mä jaqetï ‘cheqaparjam luratanakapar confiyasispa, jan wal lurarakispa ukhajja, cheqaparjam lurki ukanakat janiw ni maysa nayajj amtkäti, jan ukasti jan wal luratapatwa jiwani’ sasaw säna (Ezeq. 33:13).

 8. ¿Kunas Jehová Diosajj cheqaparjam uñjirïtap uñachtʼayaraki?

⁸ Jehová Diosajj walja tiempo faltkipanwa jaqenakar ewjjtʼi, ukaw cheqapar uñjirïtap uñachtʼayaraki. Jerusalenajj janïr babilonio ejercitompi tukjatäkäna ukhat sojjta maranak jayäkipanwa Ezequielajj profecianak arsjjäna. Ukampis janiw jupa sapakejj Diosar cuenta churapjjañapatak israelitanakar yatiykänti. Jerusalenan tukjatäñapatakejj 100 jila maranak faltaskäna ukhaw Jehová Diosajj Oseas, Isaías, Miqueas, Oded, Jeremías profetanakaparojj markapar ewjjtʼañapatak khitäna. Jeremías toqejja, Diosajj aka arunakwa israelitanakar amtayäna: ‘Ukatsti nayajj marka uñjir guardianak uttʼayta, jupanakajj akham sapjjarakïnwa: “¡Pututun suynatapar istʼapjjam!” sasa’ (Jer. 6:17). Babilonionakajj Jerusalén marka Diosan arsutaparjam tukjapkäna ukhajj walja israelitanakaw jiwarapjjäna, ukampis ukham pasañapatakejj janiw Jehová Diosasa ni khitkäna uka profetanakas juchanïpkänti.

 9. ¿Kunjamsa Jehová Diosajj munasirïtap uñachtʼayäna?

⁹ Munasiriwa. Jehová Diosajj janiw cheqapar sarnaqer jaqenakar ewjjtʼañatakikejj profetanak khitkänti, jan ukasti chuymap ustʼayapkäna, jan wali Diosat uñjayapkäna uka jaqenakar ewjjtʼañatakiw munasiñat khitarakïna. Israelitanakajj Diosan markapäpjjänwa, taqeniw uk yatipjjäna, ukampis walja kutiw Diosapat jitheqtasajj falso diosanakar adorjjapjjäna, ukajj jan walipunïnwa. Ukham lurapjjatapajj Diosar wal chuym ustʼayäna, ukatwa ‘adulterio jucha lurir warmïtawa’ sasin Israel markar säna (Ezeq. 16:32). Ukhamäkchïnsa, Jehová Diosajj janiw jupanakar jankʼak apanukkänti. Antisas jupanakamp sumankthapiñatakiw chʼamachasïna, janiw ukhamat ukham kuttʼaykarakïnti. Janiw jupanakar mäki jiwarayañ amtkänti, jan ukasti cambiapjjañapwa suyäna. ¿Kunatsa ukham sistan? Dios pachpaw Ezequielar akham säna: ‘Jan wali jaqen jiwatapat janiw nayajj kusiskti, antisas jan wali jaqejj jan wali thakip apanukusin jakaskaki ukaw nayarojj kusisiyitu’ sasa (Ezeq. 33:11). Ukhamwa Diosajj uka tiempon amuyäna, jichhas ukhamwa amuyaskaki (Mal. 3:6).

10, 11. Kunjamtï Jehová Diosajj markapar uñjkäna ukajj ¿kunsa yatichistu?

¹⁰ Jehová Diosajj cheqaparu ukat munasiñampiw israelitanakar uñjäna ¿kunsa ukajj yatichistu? Diosan arunakap yatiyktan uka jaqenakajj mayj mayjäpjjewa, ukatwa taqenir mä igualak jan uñjañasäkiti. Yaqhep jaqenakajj jan walinakwa nayrajj lurapjjäna, yaqhepajj yaqha markatäpjjewa, yaqhepasti qollqeni jan qollqeni ukhamäpjjarakiwa, yaqhep jaqenakajj janiw jiwasjam parlasipkarakiti, ukampis janipuniw ukanak uñjasakejj jupanakar predicañäniti janicha uk amtañasäkiti. ¡Ukham lursna ukajj janipuniw walïkaspati! Kuntï Diosajj Pedror yatichkäna ukajj jichhürunakan wal yanaptʼistu, jupajj akham sänwa: ‘Diosajj janiw khitirus yaqhachkiti. Jan ukasti khitinakatï taqe markanakan jupar ajjsartʼapki, kunatï cheqapäki ukarjam lurapki ukanakarojj Diosajj katoqewa’ sasa (Hech. 10:34, 35).

¹¹ ¿Kunsa yateqaraksna? Kunanaksa lurasktan ukanakat wal amuyasiñasawa, ‘Diosar istʼasapuniw nayajj sarnaqawayta, ukhamajj jan walinak luraskiristwa’ sasin amuyañajj janiw walïkiti. Predicktan uka jaqenakjam pantjasirirakïtanwa, uk janiw armañasäkiti. Pablojj Corintonkir cristianonakar ewjjtʼkäna ukajj yanaptʼarakistuwa, jupajj akham sänwa: ‘Suma saytʼatäkaspas ukham amuyaski ukajja, wal amuyaspan, ukataraki tinkuskaspa. Kuna yantʼanakantï jaqenakajj uñjasipki uka pachpa yantʼanakanwa jumanakajj uñjasipjjtajja’ sasa (1 Cor. 10:12, 13). Janipuniw ‘cheqaparjam luratanakapar confiyasiri’ jaqëñ munktanti, ukham jaqenakajja jan wali luratanakapat jan juchañchatäñatakejj suma luratanakapas yanaptʼkaspa ukhamwa amuyapjje (Ezeq. 33:13). Walja maranakas Diosar serviskstanjja, humilde chuymanïñasa istʼasirïñasa wakisiskakiwa.

12. Jiwasatï nayrajj jachʼa juchanakar purtʼasiwaystan ukhajja, ¿kunsa amtañasa?

¹² Inas nayrajj jachʼa juchanakar purtʼasiwaystan ukatwa chuym usuyasiskaksna, ukhamächi ukhajj ¿kunas chuymachtʼistaspa? Khitinakatï jucha lurasin jan arrepentisipki ukanakaruw Diosajj castigani, ukwa Ezequielan arunakapajj yatichistu. Maysa toqetjja Jehová Diosajj munasir Diosawa, janiw jupajj vengasir Diosäkiti, ukwa yateqaraktanjja (1 Juan 4:8). Luratanakasatï cheqapun arrepentisitas uñachtʼaychi ukhajja, ‘Diosajj jan wali luratanakajat janipuniw perdonkitaspati’ sasin janiw amuyañasäkiti (Sant. 5:14, 15). Israelitanakajj yaqha diosanakarus adorapkchïnjja, Jehová Diosajj jupanakar perdonänwa, jiwasarus perdonarakistaniwa (Sal. 86:5).

13, 14. 1) ¿Kunjam yatiyäwinaksa guardianakajj yatiyapjjañapäna? 2) ¿Isaías profetajj kunanaksa yatiyäna?

¹³ Ezequiel 33:2, 3 liytʼañataki. Jehová Diosan uttʼayata guardianakajj ¿kunjam yatiyäwinaksa yatiyapjjañapäna? Ewjjtʼanak yatiyañaw jupanakatakejj wali importantëna. Ukampis suma yatiyäwinak yatiyapjjarakïnwa. Ukanakat mä qhawqha uñjañäni.

¹⁴ Isaiasajja niya 778 marat 732 antes de Cristo (a.C.) marakamaw profetat servïna. Jupajj babilonionakaw Jerusalén katuntapjjani, uka markankirinakarus apasipjjaniwa sasaw yatiyäna (Is. 39:5-7). Maysa toqetjja, Diosan amuytʼayatäsajj akham sarakïnwa: ‘¡Istʼam! Guardianakamajj jachʼatwa arnaqasipjje. Juntukiw kusisiñat arnaqasipjje, Jehová Diosajj Sionar mayamp tantachthapkani ukhajja, jupanakajj wali qhanwa uk uñjapjjani’ sasa (Is. 52:8). ‘¡Diosarukiw adorasjjani!’ sasaw Isaiasajj yatiyäna, ukajj wali suma yatiyäwïnwa.

15. ¿Jeremías profetajj kunanaksa yatiyäna?

¹⁵ Jeremiasajj 647 marat 580 a.C. marakamaw profetat servïna, ukampis jan walinak yatiyirïkaspas ukhamwa jupat sapjjerïna. Cheqas kuna jan waltʼäwinaksa Jehová Diosajj jan wali israelitanak contrajj apanini ukwa Jeremiasajj yatiyäna, ukham yatiyatapajj wali musparkañänwa.a Ukampis jupajj suma yatiyäwinak yatiyarakïnwa, Diosan markapajj mayampiw oraqepar kuttʼjjani, Diosarukiw adorjjani sasaw arsurakïna (Jer. 29:10-14; 33:10, 11).

16. Kuntï Ezequielajj yatiykäna ukajj ¿kunjamsa Babiloniar apatäpkäna uka judionakar yanaptʼäna?

¹⁶ Ezequielajj 613 a.C. maranwa guardiat uttʼayatäna, amuyatajj 591 marakamaw lurañanakap phoqarakïna. Kunjamtï 5, 6 yatichäwinakan yatjjataniwayktanjja, Ezequielajj taqe chuymaw ‘Israel markajj tukjatäniwa’ sasin yatiyäna. Ukham lurasaw jupajj jaqenakan jiwatapat jan juchanïkänti. Jerusalenankir apostatanakarojj Jehová Diosajj castiganiwa sasin Babiloniar apat judionakar yatiyatapajja, uka judionakarojj Diosar jukʼamp confiyañataki, kuntï jutïrin lurapjjañapäkäna ukatak wakichtʼatäpjjañapatakiw yanaptʼäna. 70 maranak yaqha markan jakañajj tukusjjäna ukhajja, Jehová Diosajj Israel markar kuttʼapjjañapatakiw mä qhawqha judionakar yanaptʼäna, ukhamat pachpa oraqepan jakapjjañapataki (Ezeq. 36:7-11). Israel markar kuttʼapkäna ukanakat jilapartejja, Ezequielar istʼapkäna uka judionakan wawanakapampi allchhinakapampïnwa. Kunjamtï aka libron 3 seccionapankir yatichäwinakajj qhanañchkejja, Ezequielajj walja suma yatiyäwinakwa yatiyäna, ukham luratapaw Jerusalenan Dios saparuk adorasjjañap uñachtʼayäna.

17. ¿Kunapachas Jehová Diosajj guardianak uttʼayi?

¹⁷ Uka profetanakajja, Jerusalenajj 607 a.C. maran tukjatäkäna uka nayrasa uka qhepatsa walja yatiyäwinakwa israelitanakar yatiyapjjäna. Ukampis ¿Jehová Diosajj jupanakarukit guardianakat uttʼayäna? Janiwa. Diosajj kuntï amtki ukan phoqasiñapajj wali jakʼankjje ukhajja, suma yatiyäwinak yatiyañatakisa, jan wali jaqenakar ewjjtʼañatakisa guardianak uttʼayapuniwa.

18. ¿Bautisir Juanajj kunsa yatiyäna?

¹⁸ Nayrïr patak maranakanjja, Bautisir Juanajj marka uñjir mä guardiat uttʼayatarakïnwa. Israel markajj niyaw Diosamp apanukutäni sasaw jupajj yatiyäna (Mat. 3:1, 2, 9-11). Janiw ukakïkänti, kunjamtï Jesusas qhanañchkänjja, Juanajj nayratpach arsutäjjäna uka ‘yatiyirïnwaʼ, jupaw Mesiasatak thak wakichañapäna (Mal. 3:1; Mat. 11:7-10). Yatiyirjamajja Juanajj suma yatiyäwinakwa yatiyañapäna, mä arunjja Jesusajj ‘Diosan Corderopawa, aka mundon juchap qʼomachiriwa’ sasaw yatiyañapäna (Juan 1:29, 30).

19, 20. Jesusasa discipulonakapasa, ¿kunjamsa guardian lurañanakap phoqapjjäna?

¹⁹ Taqe marka uñjir guardianakat (centinelanakat) sipansa Jesusaw jukʼamp jilïrejja. Jesusarojj Ezequielarjamarakiw Diosajj ‘Israel markar’ khitäna (Ezeq. 3:17; Mat. 15:24). Niyaw Israel markajj Diosamp apanukutäni, Jerusalenas tukjatäniwa sasaw yatiyäna (Mat. 23:37, 38; 24:1, 2; Luc. 21:20-24). Ukampis jupatakejj suma yatiyäwinak yatiyañaw jukʼamp importantënjja (Luc. 4:17-21).

²⁰ Jesusajj aka oraqenkkäna ukhajja, discipulonakaparojj “amuyasipjjapunim” sasaw säna (Mat. 24:42). Jupanakajj Jesusar istʼapjjänwa, kuntï marka uñjir guardianakajj lurapjjerïkäna uksa phoqapjjarakïnwa. Israel markasa, Jerusalenasa Diosamp apanukutäpjjewa sasaw jaqenakar yatiyapjjäna (Rom. 9:6-8; Gál. 4:25, 26). Nayra guardianakjamarakiw suma yatiyäwinak yatiyapjjäna. ‘Diosan Israelapa’ taypinjja, mä arun ajllit cristianonak taypinjja, jan judiöpkis uka markankir jaqenakaw utjani, jupanakaw Cristomp chik aka oraqen Diosaruki adorasiñapatak yanaptʼapjjani sasaw yatiyapjjäna (Hech. 15:14; Gál. 6:15, 16; Apoc. 5:9, 10).

21. ¿Kunatsa apóstol Pablojj wali yateqaskayajja?

²¹ Nayrïr patak maranakan utjkäna uka guardianakatjja, Pablow wali yateqaskayajja. Jupajj taqe chuymaw lurañanakap phoqäna. ‘Taqe jaqenakan wilapat qʼomäñatakejj’ lurañanakap phoqañapänwa, ukwa Pablojj Ezequiel profetjam yatirakïna (Hech. 20:26, 27). Pablojj janiw kunas pasani ukak yatiykänti, jan ukasti mayni guardianakjamarakiw suma yatiyäwinak yatiyäna (Hech. 15:35; Rom. 1:1-4). Cheqas espíritu santomp yanaptʼatäsajja, Pablojj kuntï Isaiasajj mä profecian arskäna ukwa akham sas arsüna: ‘Khititï suma yatiyäwinak apanki ukan kayunakapajj kunja sumas qollunakanjja’ sasa. Uka arunakampejja, kunjamsa Criston discipulonakapajj Diosan Reinopat yatiyasipkäna uka toqetwa parlaskäna (Is. 52:7, 8; Rom. 10:13-15).

22. ¿Apostolonakajj jiwjjapjjäna uka qhepat kunas pasäna?

²² Apostolonakajj jiwjjapjjäna uka qhepatjja, qellqatäkäna ukarjamaw apostasiajj cristiano congregacionan utj-jjäna (Hech. 20:29, 30; 2 Tes. 2:3-8). Walja maranakaw jan wali qorar uñtata falso cristianonakajj wal jiljjattaskäna, trigor uñtata cheqpach cristianonakajj jukʼanikëjjapjjänwa. Ukhamarus Diosan Reinopat yatiyäwinakajj kʼari yatichäwinakamp chʼamaktʼayatäjjänwa (Mat. 13:36-43). Ukampis Jehová Diosajj markapar qʼomachañampïskäna ukhajja, mayampiw munasirïtapsa cheqapar uñjirïtapsa uñachtʼayäna. Ukatwa ewjja arunak yatiyapjjañapatakisa suma yatiyäwinak yatiyapjjañapatakis marka uñjir guardianak uttʼayäna. ¿Uka guardianakajj khitinakänsa?

23. ¿Charles Russell jilatasa yanapirinakapasa kuna lurañanaksa phoqapjjäna?

²³ Khä 1914 maranak nayrajja, Charles Russell jilatampi yanapirinakapampiw ‘yatiyirit’ servipjjäna, jupanakaw Mesiasajj janïr reyit uttʼayatäkäna ukhajj thak wakichapjjäna (Mal. 3:1).b Ukatsti guardiatwa servipjjarakïna, jupanakajj Zionʼs Watch Tower and Herald of Christʼs Presence (La Torre del Vigía de Sion y Heraldo de la Presencia de Cristo) sat revistampiw Diosan juicio urupatsa, Reinon suma yatiyäwinakapatsa yatiyapjjäna.

24. 1) ¿Kunjamsa suma phoqeri amuyasir esclavojj guardian lurañanakap phoqawayi? 2) ¿Parlaniwayktan uka guardianakat kunsa jumajj yateqawayta? (“Yateqaskay mä qhawqha marka uñjir guardianaka” sat recuadro uñjjattʼäta).

²⁴ Diosan Reinopajj uttʼayatäjjäna uka qhepatjja, Jesusajj mä jiskʼa gruporuw suma phoqeri amuyasir esclavot uttʼayäna (Mat. 24:45-47). Ukhatpachaw suma phoqer esclavojj guardian lurañanakap phoqawayi. Uka esclavojj Cuerpo Gobernante sasin uñtʼatarakiwa. Jupanakajj janiw ‘Diosasan vengasiñ urupat’ yatiyasiñapatakik pʼeqtʼapkiti, jan ukasti ‘Jehová Diosamp katoqatäñ maratwa’ yatiyapjjaraki (Is. 61:2; 2 Cor. 6:1, 2).

25, 26. 1) Criston taqe arkirinakapajja, ¿kunsa lurapjjañapa, ukat kunjamsa uk phoqapjje? 2) ¿Kunsa jutïr yatichäwin yatjjataskañäni?

²⁵ Suma phoqeri amuyasir esclavos guardian (centinelan) lurañanakap phoqañan pʼeqtʼaskchejja, Jesusajj ‘taqe’ servirinakaparuw “amuyasipjjapunim” sasin ewjjtʼawayi (Mar. 13:33-37). Diosar serviñan jan ikjktan, amuyasiri esclavorus taqe chuyma yanaptʼtan ukhaw uka ewjjtʼar istʼatas uñachtʼaytanjja. Predicktan ukhaw jan ikjatas uñachtʼayaraktanjja (2 Tim. 4:2). ¿Kunas ukatakejj yanaptʼistu? Jaqenakan salvasipjjañap munatasaw predicañatak yanaptʼistu (1 Tim. 4:16). Mä jukʼa tiempotjja, jichha tiempon guardiat uttʼayatäki ukan ewjja arunakapar jan istʼapjjatapatwa walja jaqenakajj jiwapjjani (Ezeq. 3:19). Ukhamäkchisa, kunjamsa jutïrin Diosaruk adorasjjani uka suma yatiyäwi yatiyañaw jukʼamp yanaptʼistu. Niyakejjay ‘Jehová Diosamp katoqatäñ maranakan’ jakaskstanjja, walja jaqenakan Diosar jiwasamp chika adorapjjañapatakejj horasäskiwa. Mä jukʼa tiempotjja, jan wali akapachar tukjaskani ukat salvasirinakajj walja bendicionanakwa Jesucristojj aka oraq apnaqjjani ukhajj katoqapjjani. ¡Jichha tiempon uttʼayatäki uka guardiar yanaptʼañsa suma yatiyäwinak yatiyañsa wal muntanjja! (Mat. 24:14).

²⁶ Janïr akapacha tukjatäkipanjja, Jehová Diosajj wali musparkañwa markapar mayachtʼawayi. Jutïr yatichäwinjja, pä lawanakat parlir profeciatwa yatjjataskañäni, ukaw kunjamsa Diosajj markapar mayachtʼawayi uk amuyañatak yanaptʼistani.