Иса Мәсиһин Јерусәлимин дағылмасы илә бағлы дедији пејғәмбәрлијин јеринә јетмәсинә аз галмышды. Амма нә гәдәр ки вахт вар иди, онлар һәмин вахта һазыр олмалары үчүн дөзүм вә иман кими хүсусијјәтләр јетишдирмәли идиләр (Ибр. 10:25; 12:1, 2). Ибрани мәсиһиләрлә мүгајисәдә бизи гаршыда даһа бөјүк мүсибәт ҝөзләјир (Мәт. 24:21; Вәһј 16:14, 16). Ҝөрүн Јеһова онлара һансы мәсләһәтләри вермишди вә биз бундан нә өјрәнә биләрик. Һәвари Булус мәсиһиләри Аллаһын Кәламынын дәринлијинә вармаға тәшвиг етмишди (Ибр. 5:14—6:1). О, Төвратдан ситатлар ҝәтирәрәк мәсиһи ибадәт тәрзинин иудаизмдән даһа үстүн олдуғуну изаһ етмишди. Булус билирди ки, әҝәр онларын билији артса вә һәгигәти даһа дәриндән дәрк етсәләр, онда јаланы доғрудан ајырд едиб јолларыны азмајаҹаглар. w24.09 с. 8, абз. 2, 3; с. 9, абз. 6

Исанын шаҝирдләринин руһланмаға еһтијаҹы вар иди, чүнки бәзиләри Исанын јанында олмаг үчүн аиләләрини, евләрини, ишләрини гојуб ҝәлмишдиләр (Мәт. 19:27). Бир башгалары Исанын шаҝирди олдуғу үчүн пис рәфтара мәруз галмышды (Јәһ. 9:22). Онлар Исанын вәд олунмуш Мәсиһ олдуғуна инандыглары үчүн бу ҹүр гурбанлар верирдиләр (Мәт. 16:16). Амма Иса едам олунанда шаҝирдләрин үмидләри пуч олду. Онлар чох мәјус олмушдулар. Шүбһәсиз, Иса шаҝирдләринин кәдәринә руһани зәифлијин әламәти кими бахмырды. О, баша дүшүрдү ки, кимисә итирәндә инсанын бу ҹүр һиссләр кечирмәси тәбиидир. Буна ҝөрә дә елә дирилдији ҝүндән о, достларыны руһландырмаға башлады. Мәсәлән, сәрдабәнин јанында ағлајан Мәҹдәлли Мәрјәмә ҝөрүндү (Јәһ. 20:11, 16). Һәмчинин Иммас кәндинә ҝедән ики шаҝирди илә сөһбәт етди. О, һәвари Бутрусла да данышмышды. w24.10 с. 13, абз. 5, 6

Валидејнләр, өвладыныза онун Аллаһа нәјә ҝөрә инандығыны изаһ етмәји өјрәдин. Бирликдә jw.org сајтында јерләшән «Ҝәнҹләрин суаллары. Тәкамүл, јохса јарадылыш?» адлы силсилә мәгаләләри охујун. Өвладыныз орадакы һансы фикри башгалары илә бөлүшүб Јараданын олдуғуну изаһ етмәк истәјәр? Онунла бирликдә һәмин фикирләри мүзакирә един. Әҝәр кимсә бу мөвзуда онунла данышмаг истәјирсә, садә вә мәнтигли шәкилдә изаһ ҝәтирсин. Ола билсин, синиф јолдашы она белә десин: «Мән анҹаг ҝөрдүјүм шејләрә инанырам, Аллаһы исә һеч вахт ҝөрмәмишәм». Өвладыныз белә ҹаваб верә биләр: «Тәсәввүр елә ки, шәһәрдән чох узагда бир мешәдә ҝәзирсән вә ҝөзәл бир евә раст ҝәлирсән. Бу заман нә дүшүнәрдин? Ајдын мәсәләдир ки, ону кимсә тикиб. Онда планетимиз, ҹанлы аләм һагда нә демәк олар? Онлары да јарадан вар!» w24.12 с. 18, абз. 16