Quyunun yanındakı qadın

Pasxadan sonra İsa Məsih şagirdləri ilə Cəliləyə qayıdanda Səməriyyədən keçir. O, Sixar şəhərinin yaxınlığındakı Yaqubun quyusu adlanan yerdə ayaq saxlayıb dincini alır. Həmin vaxt şagirdləri şəhərə ərzaq dalınca gedirlər.

Bu vaxt bir qadın su çəkmək üçün quyuya gəlir. İsa Məsih ona deyir: «Mənə içməyə su ver». Qadın ona cavab verir: «Sən nə əcəb mənimlə danışırsan? Mən səməriyyəliyəm. Yəhudilər səməriyyəlilərlə danışmırlar». İsa Məsih ona deyir: «Əgər səndən su istəyənin kim olduğunu bilsəydin, sən özün ondan su istəyərdin, o da sənə həyat suyu verərdi». Qadın soruşur: «Nə demək istəyirsən? Sənin su çəkmək üçün heç nəyin yoxdur». İsa cavab verir: «Mən verdiyim sudan içən adam bir də susamır». Qadın isə deyir: «Ağa, o sudan mənə də ver».

Sonra İsa Məsih qadına deyir: «Get ərini də çağır bura gəl». «Mənim ərim yoxdur», — deyə qadın cavab verir. İsa Məsih peyğəmbər isə qadına deyir: «Düz deyirsən. Sən beş dəfə evlənmisən və indi yaşadığın kişi ilə evli deyilsən». Qadın cavab verir: «Görürəm ki, peyğəmbərsən. Xalqım düşünür ki, Allaha bu dağda ibadət etmək lazımdır, ancaq yəhudilər isə deyir ki, yalnız Yerusəlimdə ibadət etmək olar. Mən inanıram ki, Məsih gələndə bizə necə ibadət etməli olduğumuzu öyrədəcək». Sonra İsa ona indiyə qədər heç kimə demədiyi bir söz deyir: «Məsih mənəm».

Qadın şəhərə qaçıb səməriyyəlilərə deyir: «Deyəsən, Məsihi tapmışam. O, mənim haqqımda hər şeyi bildi. Gəlin sizi onun yanına aparım!» Camaat onunla quyunun yanına gedir və İsanın təlimlərinə qulaq asır.

Səməriyyəlilər İsadan xahiş edirlər ki, onların şəhərlərində qalsın. İsa iki gün onlara Allahın Kəlamını öyrədir. Bir çox adam ona iman gətirir. Onlar səməriyyəli qadına deyirlər: «Bu adama qulaq asandan sonra dünyanın əsl xilaskarının kim olduğunu bildik».