DƏRS 55
Yığıncağınıza dəstək olun
Bütün dünyada minlərlə yığıncaq var. Bu yığıncaqlarda milyonlarla insan Yehovaya sevinclə ibadət edir. Onlar aldıqları göstərişlərə və öyüd-nəsihətə görə Yehovaya ürəkdən minnətdardırlar və buna görə də müxtəlif üsullarla yığıncağa kömək edirlər. Siz də yığıncağınıza dəstək olmaq istəyirsiniz?
1. Yığıncağa dəstək olmaq üçün vaxtınızdan və gücünüzdən necə istifadə edə bilərsiniz?
Hər birimiz yığıncağa öz töhfəmizi verə bilərik. Məsələn, sizin yığıncağınızda yaşlı, yaxud səhhəti zəif adamlar var? Onlara yığıncağa gəlməyə, yaxud bazarlıq etməyə, ev işlərini görməyə və sairə işlərdə kömək edə bilərsiniz? (Yaqub 1:27 ayəsini oxuyun.) Biz həmçinin ibadət evinin təmizliyində, təmirində kömək edə bilərik. Bu işləri görməyə heç kəs bizi məcbur etmir. Allahı və dindaşlarımızı sevdiyimiz üçün biz bu işləri canla-başla görməyə hazırıq (Zəbur 110:3).
Vəftiz olunmuş məsihilər yığıncağa başqa sahələrdə də dəstək olur. Məsələn, Müqəddəs Kitabdakı tələblərə cavab verən qardaşlar əvvəlcə yığıncaq xidmətçisi kimi, sonradan isə ağsaqqal kimi xidmət edir. Həm qardaşlar, həm də bacılar öncül kimi xidmət edərək təbliğ işində fəal şəkildə iştirak edirlər. Bəzi məsihilər isə ibadət evlərinin tikintisində kömək edir, yaxud başqa ərazilərə köçüb oradakı yığıncaqlara dəstək olurlar.
2. Maddi vəsaitlərimizlə yığıncağa necə kömək edə bilərik?
Biz sərvətimizlə Yehovanı şərəfləndirə bilərik (Məsəllər 3:9). Pulumuzu və digər vəsaitlərimizi ianə edib yığıncağımızı və ümumdünya təbliğ işini dəstəkləmək bizim üçün şərəfdir. (2 Korinflilərə 9:7 ayəsini oxuyun.) Etdiyimiz ianələrlə həmçinin fəlakətdən zərərçəkənlərə də yardım göstərilir. Yığıncaqda bir çoxları ianə etmək üçün müntəzəm olaraq pul ayırıb qırağa qoyur. (1 Korinflilərə 16:2 ayəsini oxuyun.) Biz ibadət evlərindəki ianə qutularına pul ataraq, yaxud donate.jw.org saytı vasitəsilə ianə edə bilərik. Yehova bizə fürsət verir ki, maddi vəsaitlərimizlə Ona olan məhəbbətimizi göstərək.
D Ə R İ N L İ Y Ə V A R I N
Görün yığıncağa hansı üsullarla dəstək ola bilərsiniz.
3. Maddi vəsaitlərimizlə
Yehova Allah və İsa Məsih gülərüzlə verəni sevir. Məsələn, bir dəfə kasıb dul qadın son qəpiyini ianə edəndə İsa onu tərifləmişdi. Luka 21:1—4 ayələrini oxuyun və növbəti sualları müzakirə edin:
Yehovanı razı salmaq üçün böyük məbləğdə ianə etmək lazımdır?
Yehova Allah və İsa Məsih ürəkdən ianə etdiyimizi görəndə nə hiss edir?
Görün ianələrimiz hara xərclənir. VİDEOYA baxın və növbəti sualı müzakirə edin:
İanələr bütün dünyadakı yığıncaqların xeyri üçün necə xərclənir?
4. Köməyə hazır olmaqla
Qədim dövrdə Yehovanın xidmətçiləri ibadət yerinin yaxşı vəziyyətdə olması üçün əllərindən gələni edirdilər. Bunun üçün onlar ianə etməklə yanaşı başqa bir şey də edirdilər. 2 Salnamələr 34:9—11 ayələrini oxuyun və növbəti sualı müzakirə edin:
İsraillilərin hər biri Yehovanın evinin, yəni ibadət etdikləri məkanın yaxşı vəziyyətdə olması üçün nə edirdi?
Görün Yehovanın Şahidləri bu nümunəni necə izləyirlər. VİDEOYA baxın və növbəti sualları müzakirə edin:
İbadət evlərimizin təmiz və təmirli olması nəyə görə vacibdir?
Siz bu işdə necə kömək edə bilərsiniz?
5. Məsuliyyətlərə can atmaqla
Müqəddəs Kitab məsihi kişiləri təşviq edir ki, yığıncağa kömək etmək üçün daha çox iş görməyə can atsınlar. Onlar hansı işləri görə bilərlər? VİDEOYA baxın və növbəti sualı müzakirə edin:
Rayan yaxşı işlərə can atdığını necə göstərirdi?
Müqəddəs Kitabda yığıncaq xidmətçiləri və ağsaqqallar üçün tələblər yazılıb. 1 Timutiyə 3:1—13 ayələrini oxuyun və növbəti sualları müzakirə edin:
Yığıncaq xidmətçisi və ağsaqqal olmağa can atan qardaşlar üçün hansı tələblər var?
Onların ailə üzvlərindən nə tələb olunur? (4 və 11-ci ayələrə baxın.)
Qardaşlar bu tələblərə cavab verməyə çalışanda bu, yığıncaqda hər kəsə hansı faydanı gətirir?
BƏZİ İNSANLAR SORUŞUR: «Yehovanın Şahidlərinin fəaliyyəti necə maliyyələşdirilir?»
Siz necə cavab verərdiniz?
İCMAL
Biz vaxtımızdan, gücümüzdən və maddi vəsaitlərimizdən yığıncağın rifahı üçün istifadə edəndə Yehova bunu yüksək qiymətləndirir.
Təkrar
Yığıncağa dəstək olmaq üçün vaxtımızdan və gücümüzdən necə istifadə edə bilərik?
Maddi vəsaitlərimizlə yığıncağa necə kömək edə bilərik?
Siz yığıncağa necə kömək etmək istəyərdiniz?
Ə L A V Ə M Ə L U M A T
Görün Allah nəyə görə xidmətçilərindən daha ondabir vergisi tələb etmir.
«Müqəddəs Kitabda ondabir vergisi haqda nə deyilir?» (internet məqaləsi)
Müqəddəs Kitabda vəftiz olunmuş kişilərə bəzi məsuliyyətlər həvalə edilir. Bəs həmin məsuliyyətləri vəftiz olunmuş qadın icra etməli olarsa, onda necə?
«Yığıncaqda başçılıq quruluşu» («Gözətçi qülləsi», fevral 2021)
Görün Yehovanın cəsur Şahidləri hansı çətinliklərdən keçərək dindaşlarına nəşrləri çatdırmışlar.
«Müqəddəs Kitaba əsaslanan ədəbiyyatların Konqoya çatdırılması» (4:25)
Bizim fəaliyyətimiz başqa dini təşkilatlardan fərqli olaraq necə maliyyələşir?
«Yehovanın Şahidlərinin fəaliyyəti necə maliyyələşdirilir?» (internet məqaləsi)