DƏRS 17

İsa Məsihin gözəl xüsusiyyətləri

Çap versiyası

İsa Məsihin verdiyi öyüdlərlə və gördüyü işlərlə tanış olduqca onun gözəl xüsusiyyətlərinə heyran qalırıq. Bu isə bizdə həm ona, həm də Atası Yehovaya yaxınlaşmaq istəyi oyadır. Bəs İsanın hansı gözəl xüsusiyyətləri var? Biz ondan necə örnək ala bilərik?

1. İsa Məsih hansı mənada Atasına bənzəyir?

İsa milyard illərdir ki, göydə yaşayır. Bu müddət ərzində o, Atasını müşahidə edərək Ondan çox şey öyrənib. Buna görə də Atası kimi düşünür və Atası kimi davranır. (Yəhya 5:19 ayəsini oxuyun.) İsa Məsih xasiyyətcə Atasına o dərəcədə bənzəyir ki, bir dəfə demişdi: «Məni görən Atanı da görüb» (Yəhya 14:9). İsanın xüsusiyyətləri barədə öyrəndikcə Yehovanı daha yaxşı tanıyacaqsınız. Məsələn, İsanın insanlara göstərdiyi şəfqətdən Yehovanın bizə hansı hissləri duyduğu görünür.

2. İsa Məsihin Yehovanı sevdiyi nədən görünür?

İsa demişdi: «Atamı sevdiyimi dünya bilsin deyə, hər şeyi Atamın mənə buyurduğu kimi edirəm» (Yəhya 14:31). O hətta çətin olsa belə, Atasına tabe olurdu və bununla da Onu böyük məhəbbətlə sevdiyini göstərirdi. İsa həm də insanlara Atası barədə sevə-sevə danışırdı, istəyirdi ki, onlar da Atası ilə dost olsun (Yəhya 14:23).

3. İsa Məsihin insanları sevdiyi nədən görünür?

Müqəddəs Kitabda deyilir ki, bəşər övladları İsanın könlünün sevinci idi (Məsəllər 8:31). İsanın məhəbbəti insanlara sözləri ilə dayaq olmasından, onlara fədakarcasına kömək etməsindən görünürdü. Onun göstərdiyi möcüzələrdən təkcə gücü yox, ürəyindəki şəfqət də bəlli olurdu (Mark 1:40—42). İsa hər kəslə mehriban və qərəzsiz rəftar edirdi. Onun sözləri ürəyitəmiz insanlara təsəlli və ümid verirdi. İsa Məsih bütün insanları sevirdi və onlardan ötrü əzab çəkməyə, canından keçməyə hazır idi. Amma o, öyrətdiklərinə əməl edən kəslərə xüsusi məhəbbət bəsləyir. (Yəhya 15:13, 14 ayələrini oxuyun.)

D Ə R İ N L İ Y Ə V A R I N

İsanın xüsusiyyətləri barədə daha çox öyrənin. Görün məhəbbət və səxavət göstərməkdə ondan necə nümunə götürə bilərsiniz.

4. İsa Məsih Atasını sevir

İsa Məsihin nümunəsindən öyrənirik ki, Allahı sevdiyimizi necə göstərə bilərik. Luka 6:12 və Yəhya 15:10; 17:26 ayələrini oxuyun. Hər ayəni oxuyandan sonra növbəti sualı müzakirə edin:

İsa Məsihi örnək alaraq Allahı sevdiyinizi necə göstərə bilərsiniz?

İsa dua edir. — İsa səmavi Atasını sevirdi və tez-tez Ona dua edirdi

5. İsa Məsihin darda olanlara ürəyi yanır

İsa başqalarının ehtiyaclarını özününkündən üstün tuturdu. Hətta yorğun olanda belə, insanlardan vaxtını və gücünü əsirgəmirdi. Mark 6:30—44 ayələrini oxuyun və növbəti sualları müzakirə edin:

İsa insanların qayğısına qaldığını necə göstərdi? (31, 34, 41 və 42-ci ayələrə baxın.)
İsa nəyə görə insanlara kömək etdi? (34-cü ayəyə baxın.)
İsa Məsihin Yehovaya bənzədiyini nəzərə alsaq, bu ayələrdən Yehova barədə nə öyrənirsiniz?
İsa Məsihdən nümunə götürərək insanların qeydinə necə qala bilərsiniz?

İsa beş çörəyi və iki balaca balığı möcüzəvi şəkildə çoxaldıb minlərlə insanı doyurur. Şagirdlər yeməyi kişilərə, qadınlara və uşaqlara paylayır.

6. İsa Məsih səxavətlidir

İsa Məsih varlı deyildi. Amma nəyi var idisə, insanlarla bölüşürdü. O hamını səxavətli olmağa səsləyirdi. Həvarilərin işləri 20:35 ayəsini oxuyun və növbəti sualı müzakirə edin:

İsa Məsihin sözlərinə əsasən, insan necə xoşbəxt ola bilər?

VİDEOYA baxın və növbəti sualı müzakirə edin:

VİDEO: «Vermək almaqdan daha çox xoşbəxtlik gətirir» Fraqment (4:00)

Hətta varlı olmasaq da, necə səxavət göstərə bilərik?

Bilirsiniz?

Müqəddəs Kitabda yazılıb ki, Yehovaya İsa Məsihin adı ilə dua etməliyik. (Yəhya 16:23, 24 ayələrini oxuyun.) Axı Yehova ilə dostluğumuz Onun sayəsində mümkün olub. Buna görə də İsanın adı ilə dua edəndə onun etdiklərini qiymətləndirdiyimizi göstəririk.

BƏZİ İNSANLAR DEYİR: «Əzablar Allahın sınağıdır».