Fəsil 121

Əvvəl Sinedrionun, sonra Pilatın qarşısında

GECƏ sona çatır. Peter üç dəfə İsanı danıb, Sinedrion üzvləri isə qondarma məhkəməni bitirib dağılışıblar. Lakin səhər açılanda onlar Sinedrionun zalında toplaşırlar. Yəqin, onlar gecə vaxtı qanunsuz keçirdikləri məhkəmə işinə qanuni don geyindirmək istəyirlər. İsa oraya gətiriləndə onlar yenə də deyirlər:

— Əgər Məsihsənsə, de, biz də bilək.

— Desəm də inanmayacaqsınız. Sizdən soruşsam, cavab verməyəcəksiniz, — bununla belə, İsa mərd-mərdanə kim olduğunu bəyan edir: — İndən belə, İnsan Oğlu qüdrətli Allahın sağında oturacaq.

— Deməli, sən Allahın Oğlusan? — onlar bir ağızdan soruşurlar.

— Özünüz deyirsiniz ki, mən Allahın Oğluyam.

İsanı öldürməyi qət etmiş adamlar üçün bu cavab kifayət edir. Onlar bunu küfr sayırlar və deyirlər: «Daha başqa şəhadət nəyimizə lazımdır? Bunu onun öz dilindən eşitdik». Sonra onun əllərini bağlayırlar və aparıb Roma valisi Ponti Pilata təhvil verirlər.

İsanı satmış xain Yəhuda hadisələri diqqətlə izləyir. O, İsanın məhkum edildiyini görəndə vicdan əzabı çəkir. Buna görə də 30 gümüşü qaytarmaq üçün böyük kahinlərlə ağsaqqalların yanına gedib deyir: «Saleh adamı satmaqda günah etmişəm».

Onlar isə deyirlər: «Bizə nə? Özün bilərsən!» Onda Yəhuda gümüş sikkələri məbəddə atıb oradan çıxır və gedib özünü asır. Görünür, kəndiri bağladığı budaq sınır və o, qayalığa düşüb parçalanır.

Böyük kahinlər isə bilmirlər, bu pulları necə etsinlər. Onlar deyirlər: «Bunu müqəddəs xəzinəyə atmaq düzgün deyil, çünki bu pul qan puludur». Buna görə də məsləhətləşib o pula yadelliləri dəfn etmək üçün dulusçunun tarlasını alırlar. Həmin yer o gündən «Qan tarlası» adlanır.

Səhərin gözü açılanda İsanı valinin sarayına gətirirlər. Lakin onu gətirən yəhudilər valinin sarayına girmirlər, onlar hesab edirlər ki, digər millətlərin nümayəndələri ilə yaxın əlaqədə olmaq onları murdarlayır. Pilat özü onların qabağına çıxıb soruşur: «Bu adamı nədə ittiham edirsiniz?»

Onlar cavab verirlər: «Əgər bu adam cinayətkar olmasaydı, onu sənin yanına gətirməzdik».

Pilat bu işə qarışmaq istəmədiyindən deyir: «Aparın onu öz qanunuza görə mühakimə edin».

Yəhudilər İsanı öldürmək niyyətlərini açıqlayaraq deyirlər: «Bizim adam öldürməyə ixtiyarımız yoxdur». Əgər onlar Pasxa bayramında İsanı öldürsələr, ehtimal var ki, camaat ayağa qalxsın, çünki çoxları İsaya rəğbət bəsləyir. Buna görə də onlar istəyirlər ki, romalılar İsanı siyasi cinayətdə ittiham edib öldürsünlər, onda xalqın qarşısında məsuliyyətdən qurtula biləcəklər.

Beləcə, din rəhbərləri İsanı küfr danışmaqda günahlandırdıqları gecə məhkəməsi barədə bir kəlmə də demədən başqa bir bəhanə uydururlar. Onlar üç bənddən ibarət ittiham irəli sürürlər: «[1] Bu adam xalqımızı yoldan çıxarır, [2] sezara vergi ödəməyi qadağan edir, üstəlik [3] özünü Məsih, padşah adlandırır».

İsanın padşah olması iddiası Pilatın marağına səbəb olur. Buna görə də o, saraya qayıdır və İsanı yanına çağırıb soruşur: «Sən yəhudilərin padşahısan?» Başqa sözlə, Pilat bilmək istəyir ki, İsa qanunu pozaraq özünü sezara rəqib edir, yoxsa yox.

İsa Pilatın onun haqqında nələr eşitdiyini öyrənmək üçün soruşur: «Sən bunu özündən deyirsən, yoxsa mənim haqqımda kimdənsə eşitmisən?»

Pilat onun barəsində heç nə bilmədiyini və həqiqəti öyrənmək istədiyini bildirir: «Məgər mən yəhudiyəm? Öz xalqın və böyük kahinlərin səni mənə təslim edib. De görüm, nə iş tutmusan?»

İsa Padşahlıqla bağlı məsələdən heç vəchlə boyun qaçırmır. Şübhəsiz, onun cavabı Pilatı bərk heyrətləndirir. Luka 22:66—23:3; Matta 27:1—11; Mark 15:1; Yəhya 18:28—35; Həvarilərin işləri 1:16—20.

▪ Sinedrion üzvləri səhər tezdən hansı məqsədlə toplaşırlar?

▪ Yəhuda İskariot necə ölür və 30 gümüş pul nəyə xərclənir?

▪ Nə üçün yəhudilər İsanı romalıların əli ilə öldürtmək istəyirlər?

▪ Yəhudilər İsaya qarşı hansı ittihamları irəli sürürlər?