Кәринттәргә икенсе хат
6 Алланың хеҙмәттәштәре булараҡ, беҙ шулай уҡ һеҙҙе, Алланың һеҙгә ни өсөн сикһеҙ игелек күрһәткәнен онотмағыҙ, тип өндәйбеҙ. 2 Ул бит былай тип әйтә: «Илтифат күрһәтеү ваҡытында мин һине ишеттем һәм ҡотолоу көнөндә һиңә ярҙам иттем». Алланың беҙгә илтифат күрһәтеү ваҡыты — хәҙер. Бына хәҙер — ҡотолоу көнө!
3 Хеҙмәтебеҙҙе яманламаһындар өсөн, беҙ башҡаларға кәртә булырлыҡ бер нәмә лә эшләмәйбеҙ, 4 ләкин бөтә нәмәлә үҙебеҙҙең Алла хеҙмәтселәре икәнебеҙҙе күрһәтәбеҙ: күп һынауҙарҙа күрһәтелгән сыҙамлыҡта, бәләләрҙә, мохтажлыҡта, ауырлыҡтарҙа, 5 туҡмалыуҙарҙа, төрмәләрҙә, сыуалыштарҙа, ауыр эштә, йоҡоһоҙ төндәрҙә, ас булғанда, 6 сафлыҡта, белемдә, сабырлыҡта, игелектә, изге рухта, эскерһеҙ яратыуҙа, 7 хаҡ һүҙҙәрҙә, Алла ҡөҙрәтендә, уң һәм һул ҡулыбыҙға* тәҡүәлек ҡоралы тотҡанда, 8 данда һәм хурлыҡта, яман һәм яҡшы хәбәрҙәр таралғанда. Беҙҙе алдаҡсылар тип иҫәпләһәләр ҙә, беҙ дөрөҫөн һөйләйбеҙ; 9 билдәһеҙ тип һанаһалар ҙа, беҙҙе таныйҙар; үлеп барғандай күренһәк тә*, беҙ теребеҙ; яза алғандар кеүек күренһәк тә, үлемгә тапшырылмағанбыҙ; 10 беҙҙе бойоҡ тип һанаһалар ҙа, беҙ һәр ваҡыт шатланабыҙ; ярлы тип һанаһалар ҙа, күптәрҙе байытабыҙ; бер нәмәбеҙ ҙә булмағандай күренһәк тә, бөтә нәмәгә эйәбеҙ.
11 Кәринттәр, беҙ һеҙҙең менән асыҡтан-асыҡ һөйләштек, йөрәктәребеҙҙе һеҙҙең өсөн шар астыҡ. 12 Беҙ һеҙгә ҡарата яратыуыбыҙҙы тыймайбыҙ*, ләкин һеҙҙең беҙгә ҡарата наҙлы хистәрегеҙ ҡайҙа? 13 Шуға күрә балаларыма әйткәндәй әйтәм: һеҙ ҙә йөрәктәрегеҙҙе шар асығыҙ*.
14 Иманһыҙҙар менән бер тәртәгә* егелмәгеҙ. Тәҡүәлек менән ҡанунһыҙлыҡ араһында ниндәй бәйләнеш бар? Йә яҡтылыҡ менән ҡараңғылыҡтың ниндәй уртаҡлығы бар? 15 Мәсих менән Шайтан* араһында ниндәй берҙәмлек була алһын? Йә иманлы* менән иманһыҙҙың ниндәй уртаҡлығы бар? 16 Алла ғибәҙәтханаһы менән боттарҙың ниндәй уртаҡ яғы була алһын? Беҙ — тере Алланың ғибәҙәтханаһы. Был турала Алла былай тигән: «Араларында йәшәрмен һәм йөрөрмөн, уларҙың Аллаһы булырмын, ә улар минең халҡым булыр». 17 «„Шуға күрә уларҙан китегеҙ һәм айырылығыҙ, — тип әйтә Йәһүә, — бүтән нәжес нәмәгә ҡағылмағыҙ“», һәм «мин һеҙҙе ҡабул итермен». 18 «„Мин һеҙгә атай булырмын, ә һеҙ миңә улдар һәм ҡыҙҙар булырһығыҙ“, — тип әйтә Сикһеҙ ҡөҙрәт эйәһе Йәһүә».