Изге Яҙмала тәҡүә булған, ләкин һуңыраҡ Йәһүәнең ҡанундарын боҙа башлаған кешеләр тураһында әйтелә. Мәҫәлән, Сөләймән батша. Ул Йәһүәнең кем икәнен һәм уға нисек хеҙмәт итергә кәрәк икәнен яҡшы белгән. Алла уны фатихалаған. Шулай ҙа Сөләймән һуңыраҡ ялған илаһтарға табына башлаған. Уның гонаһтары Алланың асыуын ҡабартҡан, һәм бының эҙемтәләрен израилдәр күп быуаттар дауамында татыған (1 Бат. 11:5—9; 2 Бат. 23:13). Изге Яҙмала, Сөләймән, «вафат булып, ата-бабаларына ҡушылды», тип әйтелә (1 Бат. 11:43). Алланың башҡа тоғро хеҙмәтселәре, мәҫәлән, Дауыт батша тураһында ла шул уҡ һүҙҙәр әйтелгән. (1 Бат. 2:10 менән сағыштырығыҙ.) Әммә был һүҙҙәр Сөләймәндең һис шикһеҙ тереләсәген аңлатамы? Изге Яҙмала был хаҡта бер нәмә лә әйтелмәй. Терелеү — ҡайғыртыусан Атабыҙҙың бүләге. Йәһүә был бүләкте кемгә теләй, шуға бирә. Шулай итеп ул уларға мәңге йәшәргә мөмкинлек аса (Әйүп 14:13, 14; Яхъя 6:44). Сөләймән был бүләкте алырмы? Йәһүә быны белә, ә беҙ юҡ. Ләкин беҙ Алланың ғәҙел эш итәсәген яҡшы беләбеҙ. w24.05 4 б., 9 абз.

Беҙ Йәһүәгә ғүмеребеҙҙе бағышлағанда уның ҡунағы булып китәбеҙ. Унда беҙҙе мул итеп әҙерләнгән рухи ризыҡ һәм рухландырғыс аралашыу көтә. Йәһүәнең сатыры ниндәйҙер билдәле бер урын түгел. Уның хеҙмәтселәре булған урынды уның сатыры тип атап була (Асыл. 21:3). Ә Йәһүәнең инде үлгән тоғро хеҙмәтселәре тураһында нимә әйтеп була? Уларҙы Йәһүәнең ҡунаҡтары тип һанап буламы? Эйе, сөнки Йәһүәнең хәтерендә улар һаман да тере. Был Ғайсаның һүҙҙәренән күренә: «Ә үленән терелеүҙе Муса инде күрһәткән. Янып торған күгән ҡыуағы тураһындағы хикәйәлә ул Раббыны Ибраһим Аллаһы тип тә, Исхаҡ Аллаһы һәм Яҡуб Аллаһы тип тә атаған. Алла — үлеләр Аллаһы түгел, ә тереләрҙеке. Алла өсөн бөтөнөһө лә тере» (Лука 20:37, 38). w24.06 3—4 бб., 6, 7 абз.

Садиҡ Хевронға ҡоралланып килгән, ул яуға барырға әҙер булған (1 Йыл. 12:38). Ул Дауыт яғында һуғышырға һәм Израилде дошмандарҙан яҡларға теләгән. Рухани булып хеҙмәт иткәнгә, Садиҡ, бәлки, тәжрибәле һуғышсы булмағандыр. Әммә ул бик ҡыйыу булған. Садиҡ нисек ҡыйыу булып киткән? Уның янында көслө һәм батыр кешеләр булған. Һис шикһеҙ, улар уға яҡшы йоғонто яһаған. Мәҫәлән, Дауыт. Ул ҡыйыу ғәскәр башлығы булған һәм «Израилде хәрби походтарға» йөрөткән, шуға күрә израилдәр уның батша булып китеүен теләгән (1 Йыл. 11:1, 2). Дошмандарға ҡаршы һуғышҡанда, Дауыт һәр ваҡыт Йәһүәгә таянған (Зәб. 137:3). Садиҡтың янында шулай уҡ башҡа абруйлы ирҙәр ҙә булған: Йодай һәм уның ҡыйыу улы Бинай, шулай уҡ 22 нәҫел башлығы (1 Йыл. 11:22—25; 12:26—28). w24.07 3 б., 5, 6 абз.