Нәзирҙәр сәстәрен ҡырҡмаҫҡа ант биргән. Шулай эшләп улар Йәһүәгә тулыһынса буйһонғанын күрһәткән. Ҡыҙғанысҡа ҡаршы, Израиль тарихында нәзирҙәрҙе хөрмәт итмәгән ваҡыттар ҙа булған. Ҡайһы саҡта нәзиргә үҙ антына тоғро ҡалыр өсөн һәм башҡаларҙан айырылып торор өсөн ҡыйыулыҡ кәрәк булған (Амос 2:12). Беҙ Йәһүәнең ихтыярын үтәргә ҡарар иттек, шуға күрә беҙ ҙә башҡаларҙан айырылып торабыҙ. Эштә, мәктәптә Йәһүә шаһиттары булыуыбыҙҙы әйтер өсөн ҡыйыулыҡ кәрәк. Был донъя кешеләренең ҡараштары һәм тәртибе насарая барғанға, беҙгә, моғайын, Изге Яҙманың принциптары буйынса йәшәү һәм һөйөнөслө хәбәрҙе һөйләү тағы ла ауырыраҡ була барыр (2 Тим. 1:8; 3:13). Әммә онотмағыҙ: Аллаға хеҙмәт итмәгән кешеләрҙән айырылып торорға ҡурҡмаһаҡ, Йәһүәнең йөрәген шатландырырбыҙ (Ғиб. һүҙ. 27:11; Мал. 3:18). w24.02 16 б., 7 абз.; 17 б., 9 абз.

Рим ҡалаһындағы мәсихселәрҙең йыйылышы тураһында әйтеп китәйек. Ул төрлө кешеләрҙән торған. Унда Муса ҡанунын бала саҡтан белгән еврейҙарҙан тыш, бөтөнләй башҡа шарттарҙа үҫкән мәжүсиҙәр булған. Мәсихселәр араһында, күрәһең, ҡолдар, иреклеләр, хатта ҡол хужалары ла булған. Улар, был айырмаларҙы еңеп, бер-береһенә нисек яратыу күрһәтә алған? Илсе Павел уларға: «Бер-берегеҙҙе ҡабул итегеҙ», — тип әйткән. Ул нимәне күҙ уңында тотҡан? «Ҡабул итегеҙ» тип тәржемә ителгән грек һүҙе «кемделер өйөңдә ҡунаҡ итеүҙе» йәиһә «ул кешене үҙ дуҫың тип һанауҙы» аңлата. Мәҫәлән, Павел Филимонға уның ҡасып йөрөгән ҡоло Онисим тураһында: «Уны ла минең һымаҡ күреп ихлас ҡабул ит», — тигән (Фил. 17). Ә Прискилла менән Акила, Аполлосты үҙенә саҡырып, Алла юлы тураһында күберәк һөйләгән (Илс. 18:26). Ул мәсихселәр, төрлө булыуҙарына ҡарамаҫтан, берҙәм булған һәм бер-береһен ихлас күңелдән ҡабул иткән. w23.07 6 б., 13 абз.

Ни өсөн кеше Йәһүәгә бағышлана? Сөнки ул Алланы ярата. Ундай яратыу хистәргә генә нигеҙләнмәгән. Хаҡ белемде һәм Йәһүәнең ихтыярын аңлағанға, һеҙҙең уға ҡарата яратыуығыҙ үҫте (Кол. 1:9). Изге Яҙманы өйрәнеп, һеҙ 1) Йәһүә — реаль шәхес икәненә, 2) Изге Яҙманың Алла тарафынан рухландырылғанына һәм 3) Алланың үҙ ихтыярын ойошмаһы аша үтәгәненә инандығыҙ. Йәһүәгә бағышланғандар төп хәҡиҡәттәрҙе белә һәм Алланың нормалары буйынса йәшәй. Улар, мөмкинлектәренә ҡарап, башҡаларға үҙ иманы тураһында һөйләй (Матф. 28:19, 20). Уларҙың Йәһүәгә ҡарата мөхәббәте үҫә, һәм улар тик уға ғына хеҙмәт итергә теләй. Һеҙҙең турала шуны уҡ әйтеп буламы? w24.03 4—5 бб., 6—8 абз.