Йәһүә шаһиттарында ҡатын-ҡыҙ дини хеҙмәткәр була аламы?

Эйе, була ала. Бөтә донъя буйлап Йәһүә шаһиттары араһында бер нисә миллион дини хеҙмәткәр булған ҡатын-ҡыҙ бар. Улар — Алла Батшалығы хаҡындағы һөйөнөслө хәбәрҙе вәғәзләүселәр. «Йәһүә бойороҡ бирә; яҡшы хәбәрҙе иғлан итеүсе ҡатын-ҡыҙҙар ҙур ғәскәрҙәй күп», — тип пәйғәмбәрлек ителгән улар тураһында Зәбур 68:11-ҙә.

Әммә Йәһүә шаһиты булған ҡатын-ҡыҙ хеҙмәтен бүтән диндәрҙәге рухани ҡатын-ҡыҙҙың хеҙмәте менән бутарға ярамай. Улар араһында бик ҙур айырма бар. Ниндәй айырма?

Бер айырма — уларҙың кемде өйрәтеүендә. Рухани ҡатын-ҡыҙҙар, бигерәк тә христиан диндәрендә, йыйылыш эсендә етәксе роль уйнай, уларҙың төп аудиторияһы — сиркәүгә килгән кешеләр. Йәһүә шаһиттарында ҡатын-ҡыҙҙар күбеһенсә йыйылыштан ситтә — хеҙмәттә осратҡан кешеләргә вәғәзләй.

Икенсе айырма — уларҙың йыйылыштағы эшмәкәрлегендә. Христиан динендә һәм башҡа диндәрҙә рухани ҡатындар мәхәллә халҡы менән етәкселек итә һәм уларҙы дин ҡанундарына өйрәтә. Йәһүә шаһиттарында иһә ҡатын-ҡыҙҙар, һыуға сумдырылған ирҙәр булһа, йыйылышта өйрәтмәй. Йыйылышта тик билдәләнгән ирҙәр генә өйрәтә ала (1 Тимофейға 3:2; Яҡуб 3:1).

Изге Яҙма буйынса, йыйылышта күҙәтеү эше тик ирҙәргә йөкмәтелә. Илсе Павел икенсе бер күҙәтеүсегә — Титҡа яҙған хатында һүрәтләгән тәртипкә иғтибар итегеҙ: «Бөтөн ҡалаларҙа ла берҙәмлектәргә өлкәндәр тәғәйенләү өсөн, һине Критта ҡалдырҙым». Шундай һәр яуаплы ир «намыҫлы тормош алып барырға, ҡатынына тоғро ир булырға тейеш», — тигән Павел (Титҡа 1:5, 6). Тимофейға яҙған хатында ла Павел шундай уҡ күрһәтмәләр биргән: «Етәксе булырға ынтылыусы кешенең ниәте изге... Етәксе намыҫлы тормош алып барған, ҡатынына тоғро ир... өйрәтеүгә маһир булырға тейеш» (1 Тимофейға 3:1, 2).

Ни өсөн йыйылышта күҙәтеүсе вазифаларын тик ирҙәр генә башҡара ала? Павел былай тип аңлата: «Ҡатындарға ирҙәрен өйрәтергә, уға баш булырға рөхсәт итмәйем, улар шым ултырһын. Тәүҙә бит атабыҙ Әҙәм, унан әсәбеҙ Һауа яратылған» (1 Тимофейға 2:12, 13). Шулай итеп, ир менән ҡатындың ниндәй тәртиптә барлыҡҡа килтерелгәнлеге Алланың ниәте буйынса кем өйрәтергә һәм үҙ өҫтөнә етәкселек алырға тейешлеген күрһәтә.

Йәһүә хеҙмәтселәре үҙҙәренең Етәксеһе Ғайса Мәсих ҡалдырған өлгөгә эйәрә. Шәкерт Лука Ғайсаның хеҙмәте тураһында былай тип яҙған: «Ғайса ҡалалар һәм ауылдар буйлап йөрөп, Алла Батшалығы тураһындағы Һөйөнөслө Хәбәрҙе вәғәзләгән». Һуңғараҡ Ғайса үҙенең шәкерттәренә шундай уҡ эш башҡарырға ҡушҡан. «Шәкерттәр юлға сыҡҡан, һәр ерҙә Һөйөнөслө Хәбәрҙе вәғәзләп... ауылдан-ауылға йөрөгән» (Лука 8:1; 9:2—6).

Бөгөн Йәһүәнең хеҙмәтселәре — ирҙәр ҙә, ҡатындар ҙа — Ғайса әйткән бындай пәйғәмбәрлектең үтәлешендә әүҙем ҡатнаша: «Барса халыҡтар Алла Батшалығы хаҡындағы ошо Һөйөнөслө Хәбәрҙе ишетһен өсөн, ул бөтә донъяла иғлан ителер. Ана шунан һуң аҙағы килер» (Матфей 24:14).