To imbe ngéda u ñañ Bibel boñ biliya le u bii i jam u ñañ i bisélél. Kiki u mba u ñañ, badba le: ‘Lelaa me nla bii i jam me yé añ i bisélél nano tole i dilo di nlo?’ Kiki hihéga, di hégda le u yé i soñgol 1 Tésalônika 5:17, 18. I mbus minlôñ ima mini, u nla telep u ôt pék inyu tehe lelaa u nla lémés masoohe moñ. U nla ki ôt pék mu mam malam Yéhôva a ma bôñôl we, bebek u kit le u nti Yéhôva mayéga inyu mam ma tôbôtôbô maa. Ibale u nyoñ ngéda i ôt pék, to inyu ndék manut ndigi mu biniigana bi Bibel, hala a ga hôla we i nok ni i bii bañga i Nyambe i bisélél. Ibale hiki kel u mbii i mam u nigil i bisélél, kiki ngéda i ntagbe u ga yila bañga ngwélél Yéhôva. w24.09 4-5 § 9-10

Yéhôva a bi hek bés ni ngap i tôbôtôbô. Tolakii di yé di ba maséé i ngéda ba nti bés, maséé més ma nyamb mayoo i ngéda bés bon di nti. Di nok loñge i ngéda di mpam i hôla lôk kéé yés, di yé yak maséé i ngéda ba nti bés mayéga. Ndi to ba nti bés mayéga tole heni, di yé maséé inyule di mboñ jam lilam. U hôya bañ kekikel le to kii u nti, “Yéhôva a nla ti we iloo hala.” (2 Miñañ 25:9) W’a pam bé i ti bôt bape kiki Yéhôva a nla ti we! Maséé mo ki mo ma nloo bé ma di nôgda i ngéda Yéhôva nyemede nyen a nsaa bés. Di yoñ makidik i ke ni bisu i kôna lem i likap i Tata wés nungingii. w24.09 31 § 20-21

Yéhôva a yé konangoo a ban-ga ñem ngôô. (Tjémbi 103:13; Yésaya 49:15) A nôgda i yom di nôgda; i ngéda di nok ndutu yak nye a nok ndutu. (Sakaria 2:8) A neebe le di kôôge nye bebee, le di ba mawanda mé. (Tjémbi 25:14; Minson mi baôma 17:27) A yé ki suhulnyuu; Bibel i nkal le, “a nhôdôp inyu béñge ngii ni ’isi, a nyodol yañga mut ikété nluñ ték.” (Tjémbi 113:​6, 7) Inyu hala nyen di gwé ngôñ i bégés Nyambe wés nunkeñi. Di mbégés Yéhôva inyule di nsômbôl le bôt bape ba yi nye. Ngandak bôt i nyi bé maliga inyu Yéhôva. Inyuki? Inyule Satan a bi tjam bitembee bi ngui ikolba Nyambe. (2 Korintô 4:4) Satan a bi tinde bôt i hémle le Yéhôva a yé Djob li mapuna, a ntôñ bé bo, nye ki nyen a yé njom i mandutu ma nkoñ ’isi. Ndi bés di nyi maliga inyu Nyambe! Di gwé pôla i niiga bôt bape umbe ntén Djob Yéhôva a yé, ni i hôla bo i bégés nye.​—Yésaya 43:10. w25.01 3 § 6-7