Di nlama yéñ manjel inyu unda mawanda ma Yéhôva loñgeñem ni ti bo lipém. (Rôma 12:10) Lelaa? Njel yada i mpémél i kaat Tjémbi 15:​4, i yé le, i nwet Yéhôva a nleege i ndap yé libadô “a nyônôs mimbônga nwé to ibale hala a yé nye ndutu.” I ngéda di nyônôs bé mimbônga nwés, hala a nla babaa bôt bape. (Matéô 5:37) Kiki hihéga, Yéhôva a mbem le hiki sobiina a yônôs mbônga a bi ti nlô wé tole nwaa wé i ngéda ba bé biiba. A yé ki maséé i ngéda bagwal ba mboñ biliya i yônôs mimbônga ba mbôn bon bap. Kiki di ngwés Nyambe ni mut wés libôk, di mboñ kii yosôna di nla inyu yônôs mimbônga nwés. Njel ipe di yé le di gwélél inyu ti mawanda ma Nyambe lipém i yé le di kabna i yom di gwé, di leege ki bo loñge. (Rôma 12:13) I ngéda di ntégbaha loñge ngéda ni lôk kéé i bôlôm ni i bôda, di nkônde yila mawanda ni bo, hala a nlédés ki maada més ni Yéhôva. Jam lipe li yé le, i ngéda di nyi leege bakén, di nkôna Yéhôva. w24.06 12 § 15-16

I bôt ba yé suhulnyuu bon Yéhôva a nyeelene maliga. (Matéô 11:25) Ni suhulnyuu, di bi neebe le ba niiga bés maliga. (Minson mi baôma 8:​30, 31) Di nlama yoñ yihe le di yila bañ ngôk. Inyule ngôk u nla tinde bés i noñ ndik mahoñol més, iloole di noñ matiñ ma Bibel ni maéba ma ntôñ. Inyu tééda libak jés li suhulnyuu, di nlama bigda le di nlôôha ba batitigi i bisu bi Yéhôva. (Tjémbi 8:​3, 4) Di nlama soohe Yéhôva le a hôla bés i ba bebee i neebe le ba niiga bés. Ha ngéda i, a ga boñ le i ba bés jam li ntomb i nwas le Bañga yé ni maéba ma ntôñ mon ma éga bés, he mahoñol més bé. I ngéda u ñañ Bibel, yéñ mam ma ma ñunda le Yéhôva a ngwés suhulnyuu, a ook ngôk ni lipamal. U yoñ ki yihe bañga liyoñok ibale u ntip kôs minson mi tôbôtôbô mi mi mboñ le bôt ba ti we lipém ngandak. w24.07 10 § 8-9

Ibôdôl i nwii 1919, Yésu a ngwélél man juu nu minhook inyu éga nson likalô, ni i ti banigil bé bijek mi mbuu. (Lukas 12:42) I ngéda di mbéñge i len ini, di nôgda toi le Yéhôva a yé sayap nson wap. (Yésaya 65:​13, 14.) Ibale di bak bé ntjegek loñge, ki di ta bé le di yônôs nson Yésu a bi ti bés. (Matéô 28:​19, 20) Kiki hihéga, ibale hiki likoda li ban-ga bé jé libôga li likalô, ki hiki mut a ntéé ndik likalô i homa a ngwés. Hala a mboñ le, ngim mabôga i nséla hikôô hi ngélé, ki le mape, ma nséla bé to ngélé yada. Baa u nla ti dihéga dipe di di ñunda nseñ u yé i ba ntjegek? I ngéda di ntehe lelaa Yésu a bi sal i ngéda a bé hana ’isi, di nla nok lelaa a ntjek nson likalô i len ini. w24.04 8-9 § 2-4