Inyu hôla bon banan i bana hémle ngui, i nsômbla ndik bé le di kal bo kii i yé loñge ni béba. U nlama ki hôla bo i hek pék munu mambadga mana le: ‘Inyuki Bibel i nsôña me i boñ mam ma nla lémél nyuu yem? Kii i nkwés me nkaa le matiñ ma Djob ma yé ndik inyu loñge yem?’ (Yésaya 48:17, 18) Ibale man woñ a gwé ngôñ i sôblana, hôla nye i wan jam lipe​—kii a nhoñol inyu makidik a nyoñ i yila kristen ni njel sôble. Bimbe bisai a’ kôhna? Mambe mandutu a’ boma? Inyuki di nla kal le bisai a’ kôhna bi nloo mandutu a nla boma, huum? (Markô 10:29, 30) Ha a yé ngim mandutu mut a nla boma mbus sôble yé. Jon, i yé nseñ i tibil wan mam ma ilole mut a nyoñ makidik i sôblana. Ngéda u nhôla bon boñ i soñda mu mam ma, i nla pam le ba ba nkwoog nkaa le, i noñ matiñ ma Bibel i yé ndik inyu loñge yap. w17.12 21 § 14, 15

Ngandak ikété nan, a lôk kéé i bôlôm ni i bôda, i nhônba béba kon. Bape ba ba yé ñunuk ba ntééda bôt bap ba lihaa, ba yak bo ba mañap. Bape ba mbépba ngandak, ndik inyu kôs yom je i i nhôla bo i niñis mahaa map. Di nyi ki le ngandak i njôs ndik bé ndutu yada mu, ndi libim yaga i nlélém ngéda ki! Ibale Yéhôva a ntôñ ni bihégél gwé bi bi gwé bé niñ, hégda jam a nla nôgda inyu bé ba ni ngwélél nye ni gwéha, ndi he inyu bé le, ba nyégsa bé i boñ hala! (Tjémbi 19:2, 4, 15) Isañ wés nu gwéha a nyi bés bañga bañga liyik. A ñañ ‘yak tjôñ tjés di ño tjodisôna yaga.’ (Matéô 10:30) Ntôp tjémbi a nyis bés ntiik le: “Yéhôva a nyi dilo di bôt ba yé peles.” (Tjémbi 37:18) Ñ, a nyi yaga mandutu ni mboma, a nla ki ti bé ngui i hônba momasôna. w18.01 7 § 1; 8 § 4

Ngéda Pétrô a bi tugul Tabita, hala a bi lôôha kwés bôt ba tison i nkaa, kayéle “ngandak i hémle Nwet.” Ba bé le ba bok mbôgi inyu Nwet Yésu, ni le téntén Yéhôva a gwé ngap i tugul bawoga. (Minson mi baôma 9:36-42) Bôt bape ba bi ba mbôgi bitugne bipe. Kel yada, ñôma Paul a bé tégbaha likoda i tuñ ngii i ndap yada i tison Trôas, i i yé len i pes ñombok i loñ Turkai, i pes hiôñk. Paul a bi ti nkwel letee ni ñem mau. Mañge wanda wada le Utikus a ba emblege, a bak a yii i winda. A bi sodla nyoo i ndek i nyônôs aa, a kwo isi. I nene le dokta Lukas nyen a bé mut bisu i pam i het Utikus a kwél, a tibil béñge nye: Utikus a bi babaa ndik bé, ñ, a bi nimis ndik bé to yi​—ndi a bé toi nwok! Paul a sôs, a hôgbe mim, i mbus a legel hélha nwin: “A yii yômi.” Hégda lelaa hala a bé le a tihba i bôt ba bi tehe jam li! Kiki ba bé yi le mañge wanda a bi wo, ni le a bi tuglana, “miñem mi hogbe bo ngandak.”​—Minson mi baôma 20:7-12. w17.12 5 § 10, 11