4 Musa
13 Didok Jahowa ma tu si Musa, 2 “Pillit ma sahalak pamimpin+ sian ganup marga ni halak Israel.+ Jala suru ma nasida gabe mata-mata* lao mamareso luat Kanaan, luat na lao silehonokki tu halak Israel.”
3 Dung i, disuru si Musa ma nasida borhat sian Gurun Elaparan,+ songon na diparettahon Jahowa. Akka pamimpin ni halak Israel do sude bawa na sinuruna i. 4 Akka on ma goar ni nasida: Sian marga Ruben, si Samua anak ni si Sakur, 5 sian marga Simeon, si Sapat anak ni si Hori, 6 sian marga Juda, si Kaleb+ anak ni si Jepune, 7 sian marga Isasar, si Igal anak ni si Josep, 8 sian marga Epraim, si Hosea+ anak ni si Nun, 9 sian marga Benjamin, si Palti anak ni si Rapu, 10 sian marga Zebulon, si Gaddiel anak ni si Sodi, 11 sian marga Josep+ (i ma marga Manasse),*+ si Gaddi anak ni si Susi, 12 sian marga Dan, si Ammiel anak ni si Gemali, 13 sian marga Aser, si Setur anak ni si Mikhael, 14 sian marga Naptali, si Nakbi anak ni si Vopsi, 15 jala sian marga Gad, si Geuel anak ni si Mahi. 16 Akka i ma goar ni bawa na disuru si Musa gabe mata-mata tu luat i. Dibahen si Musa ma goar ni si Hosea anak ni si Nun gabe si Josua.*+
17 Tikki lao borhat nasida gabe mata-mata tu luat Kanaan, didok si Musa ma tu nasida, “Lao ma hamu tu Negeb, jala nakkok ma hamu tu inganan na mardolok-dolok.+ 18 Ida hamu ma songon dia luat i.+ Ida hamu ma akka jolma na tinggal disi, gogo do nasida manang na gale, godang do nasida manang na otik. 19 Ida ma muse songon dia luat i, denggan do manang na roa, martembok do akka kotana, manang na tinggal di akka kemah do nasida. 20 Ida hamu ma tano na di luat i, subur do manang dang,+ tubu do akka hau manang na dang. Ikkon barani+ do hamu. Jala boan hamu ma parbue ni suan-suanan na tubu di luat i.” Tikki i, nungnga mulai panen anggur.+
21 Borhat ma nasida jala dimata-matai nasida ma luat i mulai sian Gurun Zin,+ tu Rehob+ na jonok tu Lebo-hamat.*+ 22 Tikki naeng tu Negeb nasida, sahat ma nasida di Hebron.+ Disi do maringanan si Ahiman, si Sesai, dohot si Talmai+ halak Anakim* i.+ Huta Hebron i dipajongjong pitu taon andorang so huta Zoan na di Mesir. 23 Tikki sahat nasida di Rura* Eskol,+ ditallik nasida ma sada dakka ni hau anggur jala adong satandan parbuena. Dibahen nasida ma hau asa boi diboan anggur i jala dua halak ma na mamboan i. Diboan nasida do muse deba buah delima dohot buah ara.+ 24 Dibahen nasida ma goar ni inganan i Rura* Eskol,*+ ai sian i do ditallik halak Israel dakka ni hau i.
25 Dung salpu 40 ari+ nasida gabe mata-mata tu luat i, mulak ma nasida. 26 Dijuppangi nasida ma si Musa, si Aron, dohot sude halak Israel di Gurun Elaparan na di Kades.+ Dipaboa nasida ma tu halak na marpungu i taringot tu luat i, jala dipatudu nasida ma akka parbue ni suan-suanan na sian luat i. 27 Songon on ma didok nasida tu si Musa, “Nungnga lao be hami tu luat na sinurumi. Massai godang do susu dohot madu di luat i.+ Jala on ma parbue ni suan-suanan na sian i.+ 28 Alai gogo-gogo do halak na tinggal disi, jala massai timbo do tembok ni kota ni nasida. Huida hami do muse halak Anakim disi.+ 29 Halak Amalek+ do na tinggal di luat Negeb.+ Molo halak Het, halak Jebus,+ dohot halak Amori+ tinggal di inganan na mardolok-dolok. Jala halak Kanaan+ tinggal di huta na di jonok ni laut+ sahat tu Sunge Jordan.”
30 Dung i, dipapos si Kaleb ma roha ni bangso i di jolo ni si Musa, ninna ma, “Beta, tataluhon ma nasida. Pasti boi do buatotta luat ni nasida i. Ai sanggup do hita mangalo nasida.”+ 31 Alai didok akka bawa na lao rap dohot si Kaleb i ma, “Dang taralo hita nasida. Ai umgogo do nasida sian hita.”+ 32 Torus ma dipaboa nasida tu halak Israel barita na so tutu+ taringot tu luat na dimata-matai nasida. Didok nasida do, “Luat na humata-matai hami i, luat na so boi inganan ni jolma. Dang boi mangolu hita disi. Jala muse botang-botang do halak na tinggal disi.+ 33 Huida hami do muse akka raksasa* pinoppar ni si Enak,+ i ma akka pinoppar ni Nepilim. Molo dibandingkon tu nasida, hira sihapor do hita. Pasti songon i do nasida mangida hita.”