39 Dibege raja ni Babel ma na marsahit raja Hiskia jala nungnga malum.+ Si Merodak-baladan anak ni si Baladan do raja i. Disuru ibana ma halak mangalehon surat dohot hadiah tu si Hiskia.+ 2 Las do roha ni si Hiskia di haroro ni* nasida. Dipatudu ibana ma sude na adong di inganan panimpanan ni artana.+ Dipatudu ibana ma perak, mas, miak balsam,* akka miak na arga na asing, sude sinjatana, dohot sude barang na adong di panimpanan ni arta i. Dipatudu si Hiskia do sude na adong di istanana dohot sude na adong di harajaon i.