1 Kronika

28 Dung i dipapungu si Daud ma sude pejabat ni Israel di Jerusalem. Marpungu ma akka pamimpin ni ganup marga, akka pamimpin ni halak na marhobas tu raja,+ akka pamimpin ni na sasaribu dohot na sasaratus,+ pengawas ni akka arta ni raja dohot binatang na dipiaro raja,+ pengawas ni akka anak ni raja,+ akka pejabat istana, dohot sude halak na gogo jala na barani.+ 2 Dung i, jongjong ma Raja Daud jala didok ma,

“Tangihon ma au ale haha anggikku dohot hamu akka rakyattu. Lomo do nian rohakku pajongjokkon sada jabu na gabe inganan ni poti parpadanan ni Jahowa. Jala jabu i ma na gabe sidege-degean ni Debatanta.+ Nungnga huparade akka na porlu lao pajongjokkon jabu i.+ 3 Alai didok Debata na sittong do tu au, ‘Dang ho na lao pajongjokkon jabu na pasangappon goarhu,+ ai jotjot do ho marporang. Jala nungnga godang jolma na dipamate ho.’*+ 4 Nang pe songon i, sian sude keluarga ni bapakku, dipillit Jahowa Debata ni Israel do au gabe raja ni Israel saleleng ni lelengna.+ Ai dipillit Ibana do marga Juda gabe pamimpin.+ Sian sude marga Juda, dipillit ma keluarga ni bapakku.+ Jala sian sude anak ni bapakku, au do na dipillit gabe raja ni Israel.+ 5 Dilehon Jahowa do di au godang anak.+ Sian sude anakki, si Salomo+ do na dipillit lao hundul di tahta ni Jahowa jala na mamaretta di Israel.+

6 “Didok Ibana do tu au, ‘Si Salomo anakmi do na lao pajongjokkon jabukku dohot alaman ni jabukki. Ai nungnga hupillit ibana gabe anakku, jala Au ma na gabe bapakna.+ 7 Molo toktong dioloi ibana parettakku dohot aturanku+ songon na binahenna saonari, bahenokku ma hot harajaonna saleleng ni lelengna.’+ 8 Hudok ma tu hamu sude ale Israel bangso ni Jahowa, jala dibege Debatanta do on: Parsiajari jala oloi hamu ma sude paretta ni Jahowa Debatamuna, asa di hamu tano na denggan on.+ Jala boi ma lehononmuna i tu akka anakmuna, asa nasida nappuna i saleleng ni lelengna.

9 “Jala ho Salomo anakku, ikkon takkas do tandaonmu Debatakku. Somba ma Ibana sian nasa roham,+ jala ulahon ma lomo ni rohana. Ai dipareso Jahowa do sude isi ni roha+ jala diboto Ibana do sude na tapikkiri.+ Molo dilului ho Ibana, juppangmu ma Ibana.+ Alai molo ditadikkon ho Ibana, tadikkononna ma ho saleleng ni lelengna.+ 10 Jadi saonari, ikkon barani do ho. Pajongjong ma sada jabu na gabe inganan na badia. Ai ho do na dipillit Jahowa pajongjokkon i.”

11 Dilehon si Daud ma tu si Salomo gambar+ ni terras+ ni jabu na lao dipajongjong i, gambar ni akka ruanganna, akka gudang, akka ruangan na di ginjang, akka kamar, dohot gambar ni inganan pardamean.+ 12 Dilehon si Daud ma muse tu si Salomo gambar ni alaman+ ni jabu ni Jahowa, gambar ni sude ruang makan na di sakaliling ni jabu i, gambar ni inganan panimpanan ni arta na di jabu ni Debata na sittong, dohot gambar ni panimpanan ni akka arta naung dipabadia.*+ Marhite panogu-noguon ni tondi parbadia ni Debata do dipatudu akka gambar i tu si Daud. 13 Dipaboa si Daud do muse taringot akka malim+ dohot halak Lepi na dibahen gabe piga-piga punguan. Dipaboa do muse tugas ni nasida tikki marhobas di jabu ni Jahowa dohot akka barang na dipakke tikki marhobas di jabu ni Jahowa. 14 Dipaboa si Daud ma muse borat ni mas dohot perak na dipakke mambahen akka barang. Dipakke do akka barang i tikki marhobas di jabu i. 15 Dipaboa si Daud do muse borat ni mas na dipakke lao mambahen akka inganan ni lampu+ dohot lampuna. Dipaboa do muse borat ni perak na dipakke lao mambahen akka inganan ni lampu dohot lampuna. 16 Dipaboa si Daud do muse borat ni mas na lao dipakke mambahen akka meja inganan ni roti pelean,+ dohot borat ni perak na lao dipakke mambahen akka meja. 17 Dipaboa ibana do muse borat ni akka garpu, akka makkuk, dohot akka ceret na dibahen sian mas murni. Dipaboa do muse borat ni akka makkuk na gelleng na dibahen sian mas+ dohot borat ni akka makkuk na gelleng na dibahen sian perak. 18 Dipaboa si Daud ma muse borat ni mas murni na dipakke mambahen langgatan inganan manutung dupa,+ dohot na dipakke mambahen akka kerubim*+ na manggombarhon kareta ni Debata.+ Herbang do habong ni akka kerubim i manghukkupi poti parpadanan ni Jahowa. 19 Didok si Daud ma, “Didongani Jahowa do au. Jala dilehon Ibana do bisuk tu au asa boi hubahen+ sude gambar+ on.”

20 Dung i didok si Daud ma tu anakna si Salomo, “Ikkon barani do ho jala togu. Unang ma mabiar ho. Pajongjong ma jabu i. Ai didongani Jahowa Debatakku do ho.+ Dang na lao pasombuonna manang tinggalhononna ho.+ Dongananna do ho sahat tu na sae jabu ni Jahowa i. 21 Adong do dison akka malim+ dohot halak Lepi+ na dibahen gabe piga-piga punguan. Nasida ma na lao martugas di jabu ni Debata na sittong. Adong do muse akka parkarejo na malo mangulahon tugas ni nasida jala na lomo rohana mangurupi ho.+ Jala adong do akka pejabat+ dohot akka rakyat na lao mangoloi parettam.”