1 Raja-Raja
4 Mamaretta do Raja Salomo tu sude halak Israel.+ 2 On ma goar ni akka pejabatna: Si Azaria anak ni si Sadok+ ma na gabe malim, 3 si Elihorep dohot si Ahia akka anak ni si Sisa ma na gabe sekretaris,+ si Jehosapat+ anak ni si Ahilud ma na gabe juru tulis, 4 si Benaya+ anak ni si Jehoyada ma na gabe pamimpin ni tentara, si Sadok dohot si Abiatar+ ma na gabe malim, 5 si Azaria anak ni si Natan+ ma kepala pejabat ni daerah, si Sabud anak ni si Natan ma na gabe malim jala na gabe ale-ale* ni raja,+ 6 si Ahisar ma na mangaradoti istana, jala si Adoniram+ anak ni si Abda ma na gabe pamimpin ni akka halak na dipangido lao karejo tu raja.+
7 Adong 12 pejabat daerah ni Raja Salomo di sude luat ni Israel. Nasida ma na paradehon sipanganon tu Raja Salomo dohot tu sude halak na di istana. Ganup pejabat daerah martanggung jawab paradehon sipanganon saleleng sabulan di bagasan sataon.+ 8 On ma akka pejabat daerah i: Anak ni si Hur ma di akka kota na di Dolok Epraim, 9 anak ni si Bendeker ma di Makas, di Salabim,+ di Bet-semes, dohot di Elon-bet-haran, 10 anak ni si Benhesed ma di Arubot (ibana do na mamaretta di Soko dohot di sude luat Heper), 11 anak ni si Abinadab ma di sude huta na mardolok-dolok na di Dor (si Tafat boru ni si Salomo do istrina), 12 si Baana anak ni si Ahilud ma di Taanak, di Megiddo,+ dohot di sude Bet-sean+ na jonok tu Zaretan na di toru ni kota Jisreel, mulai sian Bet-sean sahat tu Abel-mehola na di luat Jokmeam,+ 13 anak ni si Geber ma di Ramot-gilead+ (ibana do na mamaretta di sude huta di perkemahan ni si Jair+ anak ni si Manasse na di Gilead,+ mamaretta do ibana muse di Argob+ na di Basan,+ i ma 60 kota na balga na martembok jala na marpalang tombaga), 14 si Ahinadab anak ni si Iddo ma di Mahanaim,+ 15 si Ahimas ma di Naptali (si Basemat boru ni si Salomo ma istrina), 16 si Baana anak ni si Husai ma di Aser dohot di Belot, 17 si Jehosapat anak ni si Parua ma di Isasar, 18 si Simei+ anak ni si Ela ma di Benjamin,+ 19 si Geber anak ni si Uri ma di luat Gilead,+ i ma luat ni si Sihon+ raja ni halak Amori dohot si Og+ raja ni Basan. Adong do muse sahalak pejabat na gabe pamimpin ni sude pejabat daerah i.
20 Songon pasir na di topi ni laut do godang ni halak Juda dohot halak Israel.+ Sonang do ngolu ni nasida. Adong do sipanganon dohot siinumon ni nasida.+
21 Mamaretta do si Salomo tu sude bangso, mulai sian Sunge Euprat+ sahat tu luat ni halak Palistim jala sahat muse tu parbatasan ni Mesir. Digarar nasida do pajak* tu ibana jala sai dioloi nasida do si Salomo saleleng ngoluna.+
22 Ganup ari, ikkon diparade do di istana ni si Salomo 30 kor* topung na denggan dohot 60 kor topung biasa, 23 10 lombu na dipamokmok di kandang, 20 lombu na sian ladang, 100 biru-biru, rusa, kijang, rusa jenis na asing, dohot akka pidong na mokmok. 24 Si Salomo do na mamaretta sude luat na di sabola barat ni Sunge Euprat,+ mulai sian Tifsa sahat tu Gasa.+ Jala tunduk do sude raja na mamaretta di luat i tu ibana. Dame do sude luat na nirajaan ni si Salomo i.+ 25 Saleleng mamaretta si Salomo, dame do ngolu ni halak Juda dohot halak Israel mulai sian Dan sahat tu Ber-seba. Adong be do hau anggur dohot hau ara ni nasida.
26 Adong do 12.000 hoda* ni si Salomo. Jala adong do 4.000* kandang ni hodana,+ i ma hoda na dipakke manarik kareta porang.
27 Ganup bulan mangihutton giliranna be, diparade akka pejabat daerah i do sipanganon ni Raja Salomo dohot sipanganon ni sude halak na mangan di mejana. Jala ikkon dipastihon nasida do dang adong na hurang.+ 28 Diparade nasida do muse barli* dohot durame na porlu tu akka hoda, dohot ma i tu hoda na dipakke manarik kareta, dohot na dipakke tu ulaon na asing.
29 Dibahen Debata do si Salomo massai marbisuk, jala diurupi do ibana asa malo manottuhon dia na denggan. Dilehon do muse tu ibana godang parbinotoan dos songon godang ni pasir na di topi ni laut.+ 30 Umbisuk do si Salomo sian sude halak na di luat sabola Timur dohot halak na di Mesir.+ 31 Umbisuk do si Salomo sian manang ise pe, dohot ma i sian si Etan+ pinoppar ni si Esrahi dohot sian akka anak ni si Mahol, i ma si Heman,+ si Kalkol,+ dohot si Darda. Jala tarbarita do goar ni si Salomo di sude bangso na di sakalilingna.+ 32 Dibahen* si Salomo do 3.000 uppama+ dohot 1.005 ende.+ 33 Boi do dipatorang si Salomo taringot tu akka hau, mulai sian hau ares na di Libanon songon i nang suan-suanan hisop+ na tubu di tembok. Boi do dipatorang ibana taringot tu akka binatang,+ akka pidong,*+ akka binatang na mangissir,*+ dohot akka dekke. 34 Marroan do akka halak sian sude bangso naeng mamboto songon dia bisuk ni si Salomo, dohot do ro akka raja na sian saluhut tano on.+