1 Kronika
11 Di pudian ni ari, ro ma sude halak Israel manjuppangi si Daud tu Hebron.+ Didok nasida ma, “Na marhaha maranggi do hita.*+ 2 Tikki mamaretta dope si Saul, ho do na mamimpin halak Israel marporang.+ Jala didok Jahowa Debatam do tu ho, ‘Ho ma na gabe parmahan ni bangsokku Israel, jala ho ma na mamimpin nasida.’”+ 3 Ro ma sude pangituai* ni halak Israel mandapotton raja i di Hebron. Jala di jolo ni Jahowa dibahen si Daud ma sada parjanjian tu nasida di Hebron. Dukkon i dilantik* nasida ma si Daud gabe raja ni saluhut Israel,+ songon na nidok ni Jahowa marhite si Samuel.+
4 Dung i lao ma si Daud dohot sude halak Israel tu Jerusalem, i ma kota Jebus.+ Disi do halak Jebus+ tinggal. 5 Direhei halak Jebus ma si Daud. Didok nasida ma, “Dang tolap ho masuk tuson!”+ Alai ditaluhon si Daud ma kota Sion na marbenteng i.+ Jala saonari dibahen ma goarna Kota ni si Daud.+ 6 Didok si Daud ma, “Manang ise na parjolo lao pamatehon halak Jebus, gabe pamimpin ni tentara ma ibana.” Si Joab+ anak ni si Seruya ma na parjolo lao. Dung i gabe pamimpin ni tentara ma ibana. 7 Tinggal ma si Daud di kota na marbenteng i. Jala dibahen ma goarna Kota ni si Daud. 8 Dipajongjong si Daud ma tembok ni kota i dohot bangunan na asing di sakalilingna, mulai sian benteng na sian tano* sahat tu inganan na jonok tusi. Jala si Joab ma padenggatton na deba nai di kota i. 9 Gabe lam marhuaso ma si Daud+ jala didongani Jahowa Pamimpin ni Akka Tentara* i do ibana.
10 Adong do akka pamimpin ni tentara ni si Daud na jago. Diurupi nasida do si Daud asa gabe raja, songon na nidok ni Jahowa tu halak Israel. Jala sude do halak Israel dohot mangurupi si Daud.+ 11 Akka on ma tentara ni si Daud na gogo: si Jasobeam+ anak ni halak Hakmon. Ibana do na mamimpin tolu tentara ni si Daud na gogo.+ Hea do dipamate ibana 300 halak mamakke tombak* tikki marporang.+ 12 Dukkon ibana, i ma si Eleasar+ anak ni si Dodo halak Ahohi.+ Ibana do sada sian tolu tentara na gogo i. 13 Didongani ibana do si Daud tu Pas-damim,+ inganan ni halak Palistim marpungu lao marporang. Disi adong do ladang barli.* Tikki i, lari do halak Israel sian halak Palistim. 14 Alai jongjong ma ibana di tonga-tonga ni ladang i lao mampartahatton ladang i. Jala torus ma dialo ibana halak Palistim i. Ujungna, monang* ma halak Israel dibahen Jahowa.+
15 Lao ma 3 sian 30 pamimpin ni tentara ni Israel tu dolok batu. Didapotton nasida ma si Daud di Gua Adullam.+ Tikki i, nungnga markemah halak Palistim di Rura Repaim.+ 16 Di inganan partabunianna do si Daud jala di Betlehem do tentara ni halak Palistim. 17 Dung i, didok si Daud ma, “Autsugari ma boi huinum aek na sian sumur na di labbung ni gerbang ni Betlehem i!”+ 18 Pittor lao ma tolu tentara ni si Daud i. Dibolus nasida ma perkemahan ni halak Palistim. Dung i, dibuat nasida ma aek na sian sumur na di labbung ni gerbang ni Betlehem i. Diboan nasida ma aek i tu si Daud. Alai dang olo si Daud manginum i. Diusehon ibana ma aek i tu tano di jolo ni Jahowa. 19 Didok ibana ma, “Dang tarinum au aek on, ai mabiar do au tu Debata! Songon na manginum mudar ni halak on do au molo huinum i. Ai nungnga pola martaru hosa nasida lao mambuat aek on!”+ Alani i, dang olo si Daud manginum aek i. Akka i ma na diulahon tolu tentara ni si Daud na gogo i.
20 Adong do muse tolu nai tentara ni si Daud na gogo. Si Abisai+ abang ni si Joab+ ma pamimpin ni nasida. Hea do dipamate si Abisai 300 halak mamakke tombakna. Jala tarbarita do ibana songon tolu tentara ni si Daud na gogo na parjolo i.+ 21 Ibana do pamimpin ni tolu tentara ni si Daud na asing na gogo i jala ibana do na ussangap sian dua tentara nai. Alai dang unjago ibana sian tolu tentara ni si Daud na gogo na parjolo i.
22 Adong ma muse sahalak tentara na barani.* Goarna si Benaya,+ anak ni si Jehoyada. Godang do na dibahen ibana di Kabseel+ lao patuduhon habaranionna. Dipamate ibana do dua anak ni si Ariel halak Moab i. Turun do ibana tu sumur tikki musim salju jala dipamate ibana do sada singa.+ 23 Hea do dibunu si Benaya sada bawa halak Mesir pardaging na balga, lima asta ma timbona.*+ Adong do tombak ni halak Mesir i na balgana songon balga ni hau ni partonun.+ Alai tikki dialo si Benaya ibana mamakke tukkotna, dirampas si Benaya ma tombakna i jala dipamate ma halak Mesir i mamakke tombakna.+ 24 Akka i ma na diulahon si Benaya anak ni si Jehoyada. Jala tarbarita do ibana songon tolu tentara ni si Daud na gogo na parjolo i. 25 Ussangap do si Benaya sian na 30 halak i. Alai dang unjago ibana sian tolu tentara ni si Daud na gogo na parjolo i.+ Nang pe songon i, dipillit do ibana gabe pamimpin ni pengawal ni si Daud.
26 Akka tentara ni si Daud na gogo i, i ma si Asahel+ anggi ni si Joab, si Elihanan anak ni si Dodo na sian Betlehem,+ 27 si Sammot halak Haror, si Heles halak Peloni, 28 si Ira+ anak ni si Ikes halak Tekoa, si Abi-eser+ halak Anatot, 29 si Sebekkai+ halak Husa, si Ilai halak Ahohi, 30 si Maharai+ halak Netopa, si Heled+ anak ni si Baana halak Netopa, 31 si Itai anak ni si Ribai na sian Gibea huta ni halak Benjamin,+ si Benaya halak Piraton, 32 si Hurai na sian huta na jonok tu akka sunge* na di Gaas,+ si Abiel halak Arbati, 33 si Asmapet halak Bahurim, si Eliaba halak Salabim, 34 akka anak ni si Hasem halak Gison, si Jonatan anak ni si Sage halak Harari, 35 si Ahiam anak ni si Sahar halak Harari, si Elipal anak ni si Ur, 36 si Heper halak Meherati, si Ahia halak Peloni, 37 si Hesrai halak Karmel, si Naarai anak ni si Esbai, 38 si Joel adek ni si Natan, si Mibhar anak ni si Hagri, 39 si Selek halak Ammon, si Naharai halak Beerot, siboan sinjata ni si Joab anak ni si Seruya, 40 si Ira halak Itri, si Gareb halak Itri, 41 si Uria+ halak Het, si Sabad anak ni si Ahloi, 42 si Adina anak ni si Sisa halak Ruben, sahalak pamimpin ni marga Ruben dohot 30 halak na mandongani ibana, 43 si Hanan anak ni si Maaka, si Josapat halak Mitni, 44 si Usia halak Astera, si Sama dohot si Jeiel akka anak ni si Hotam halak Aroer, 45 si Jediael dohot adekna si Joha akka anak ni si Simri halak Tisi, 46 si Eliel halak Mahapa, si Jeribai dohot si Josabia akka anak ni si Elnaam, si Itma halak Moab, 47 si Eliel, si Obed, dohot si Jasiel halak Mezobaya.