4 Musa

15 Didok Jahowa ma muse tu si Musa, 2 “Songon on ma dokkon tu halak Israel, ‘Molo dung sahat hamu tu luat na lao lehonokki gabe ingananmuna,+ 3 pelehon hamu ma lombu, manang biru-biru, manang hambing gabe pelean na ditutung dohot api tu Jahowa lao mambahen uap na palashon roha ni Jahowa.+ Tikki dilehon hamuna i gabe pelean situtungon,+ manang pelean na dilehon hamu ala nungnga mambahen janji, manang pelean na dilehon sian na nionjar ni roha,+ manang pelean na dilehon hamu saleleng adong perayaan,+ 4 ikkon lehononmuna do tu Jahowa pelean sipanganon,* i ma saparsappulu epa* topung na halus+ na dicampur dohot saparopat hin* miak. 5 Jala ikkon lehononmuna do muse saparopat hin anggur gabe pelean siinumon tikki mamelehon pelean situtungon,+ manang tikki mamelehon anak ni biru-biru na jantan. 6 Manang tikki mamelehon biru-biru jantan, ikkon lehononmu do pelean sipanganon,* i ma dua parsappulu epa topung na halus na dicampur dohot sapartolu hin miak. 7 Jala lehon ma sapartolu hin anggur gabe pelean siinumon na uapna palashon roha ni Jahowa.

8 “‘Alai molo sada lombu jantan do dilehon hamu gabe pelean situtungon,+ manang gabe pelean na dilehon ala mambahen janji,+ manang gabe pelean pardamean* tu Jahowa,+ 9 ikkon lehononmuna do rap dohot pelean i pelean sipanganon, + i ma tolu parsappulu epa topung na halus na dicampur dohot satonga hin miak. 10 Ikkon lehononmuna do muse satonga hin anggur gabe pelean siinumon,+ gabe pelean na ditutung dohot api, na uapna mambahen las roha ni Jahowa. 11 Akka i ma na ikkon diulahon tikki dilehon sada lombu jantan, manang biru-biru jantan, manang biru-biru jantan na poso, manang hambing gabe pelean. 12 Manang sadia godang pe binatang na dilehon hamu gabe pelean, ikkon bahenonmuna do songon i tu ganup binatang na dipelehon i. 13 Songon i ma na ikkon bahenonmuna tikki mangalehon pelean na ditutung dohot api tu Jahowa, na uapna palashon rohana.

14 “‘Molo adong halak na sian bangso na asing na rap tinggal dohot hamu, manang halak naung leleng rap dohot hamu, na naeng mangalehon pelean na ditutung dohot api jala uapna palashon roha ni Jahowa, ikkon bahenonna do dos songon na binahenmuna i.+ 15 Marlakku do peraturan on tu hamu dohot tu akka halak na sian bangso na asing na tinggal rap dohot hamu. On ma peraturan na marlakku saleleng ni lelengna tu hamu dohot tu sude pinopparmuna. Sarupa do hamu dohot halak na sian bangso na asing i di jolo ni Jahowa.+ 16 Sarupa do patik dohot aturan naung ditottuhon na marlakku tu hamu dohot tu akka halak na sian bangso na asing na tinggal rap dohot hamu.’”

17 Didok Jahowa ma muse tu si Musa, 18 “Songon on ma dok tu halak Israel, ‘Molo dung sahat hamu tu inganan na lao hulehon tu hamu, 19 jala molo dung diallang hamu sipanganon* manang aha pe sian luat i,+ ikkon lehononmuna do silehon-lehon tu Jahowa. 20 Ikkon lehononmuna do hasil panenmuna na parjolo,+ i ma hasil ni topung kasar na parjolo na dibahen gabe roti na marbentuk golang. Pelehon ma i dos songon tikki mangalehon silehon-lehon sian inganan pardegean. 21 Ikkon lehononmuna dohot pinopparmuna do deba topung na kasar gabe silehon-lehon tu Jahowa, i ma topung kasar na dibahen sian hasil panenmuna na parjolo.*

22 “‘Molo diulahon hamu na sala, jala dang diulahon hamu sude paretta naung dipasahat Jahowa tu si Musa, 23 i ma sude paretta na dipaboa Jahowa tu hamu marhite si Musa, na marlakku tu pinopparmuna mulai sian na dipaboa Jahowa paretta i sahat tu saleleng ni lelengna, 24 molo dang sengaja hamu mangulahon na sala i, jala dang diboto bangso i na diulahon dosa i, ikkon lehonon ni bangso i ma sada lombu jantan anakna gabe pelean situtungon na uapna palashon roha ni Jahowa. Dilehon ma i rap dohot pelean sipanganon, dohot pelean siinumon, songon aturan naung dibahen.+ Jala ikkon pelehononmuna do muse sada anak ni hambing gabe pelean hasesaan ni dosa.+ 25 Pangidoon ni malim ma tu Debata asa disesa dosa ni bangso i. Disesa ma dosa ni nasida+ ala dang sengaja nasida mangulahon na sala i. Jala nungnga diboan nasida pelean na ditutung dohot api tu Jahowa, dohot pelean hasesaan ni dosa tu jolo ni Jahowa alani sala ni nasida i. 26 Disesa ma sude dosa ni halak Israel i dohot sude dosa ni halak na sian bangso na asing na tinggal rap dohot nasida. Ai sude do nasida dang sengaja mangulahon i.

27 “‘Molo adong halak na so sengaja mangulahon dosa, ikkon dipelehon ibana do sada hambing boru-boru na marumur sataon manang hurang gabe pelean hasesaan ni dosa.+ 28 Pangidoon ni malim ma tu Jahowa asa disesa dosa ni halak na so sengaja mangulahon dosa i. Dung i, disesa Debata ma dosana.+ 29 Sarupa do patik na marlakku tu halak Israel dohot tu halak na sian bangso na asing na rap tinggal dohot nasida, i ma tikki adong na so sengaja mangulahon dosa.+

30 “‘Alai molo adong halak na sengaja mangulahon dosa,+ halak Israel manang halak na sian bangso na asing, ikkon dipamate do ibana. Ai nungnga dileai ibana Jahowa. 31 Leas do rohana tu hata ni Jahowa jala dialo ibana do parettana. Alani i ikkon dipamate do ibana.+ Alani dosana sandiri do ibana dipamate.’”+

32 Tikki di gurun dope halak Israel diida nasida ma sahalak bawa papunguhon soban di ari Sabat.+ 33 Diboan nasida ma bawa na papunguhon soban i tu jolo ni si Musa, si Aron, dohot bangso i. 34 Dihurung ma bawa i,+ ala dang diboto nasida dope aha na lao bahenon ni nasida tu ibana.

35 Didok Jahowa ma tu si Musa, “Ikkon dipamate do bawa i,+ jala ikkon didangguri bangso i do ibana pakke batu di luar ni perkemahan.”+ 36 Diboan bangso i ma ibana tu luar ni perkemahan, jala didangguri nasida ma ibana sappe mate, songon na diparettahon Jahowa tu si Musa.

37 Didok Jahowa ma muse tu si Musa, 38 “Dokkon ma tu halak Israel asa dibahen nasida rambu di pinggir ni baju ni nasida bagian toru. Jala ikkon dibahen nasida do muse bonang na balau di atas ni renda ni baju ni nasida i.+ Ikkon songon i do bahenon ni nasida dohot sude pinoppar ni nasida. 39 ‘Ikkon bahenonmuna do renda i. Ai tikki diida hamu i, ingotonmuna ma sude paretta ni Jahowa, jala ulahononmuna ma i.+ Unang ihutton hamu pangidoan ni rohamuna dohot pangidoan ni matamuna. Ai boi do i mambahen hamu dang setia* tu Debata.+ 40 Paretta on ma na mangurupi hamu asa mangingot jala mangulahon sude parettakku. Alani i, gabe badia ma hamu di jolo ni Debatamuna.+ 41 Au do Jahowa Debatamuna, na mamboan hamu kaluar sian Mesir lao patuduhon na Au do Debatamuna.+ Au do Jahowa Debatamuna.’”+