Ulaon ni Apostel

19 Tikki di Korint si Apollos,+ lao do si Paulus mandalani akka huta na dao sian kota jala sahat ma ibana di Epesus.+ Pajuppang ma ibana disi dohot piga-piga sisean. 2 Disukkun si Paulus ma tu nasida, “Adong do dijalo hamu tondi parbadia tikki gabe halak na porsea i hamu?”+ Dialusi nasida ma, “Dang hea dibege hami adong tondi parbadia.” 3 Disukkun ibana ma muse, “Attong, pandidion na songon dia do dijalo hamu?” Dialusi nasida ma, “Hami tardidi songon na diajarhon si Johannes.”+ 4 Didok si Paulus ma, “Dididi si Johannes do akka jolma lao gabe tanda patuduhon naung muba roha ni nasida.+ Alai didok si Johannes do asa porsea nasida tu halak na ro dukkon ibana,+ i ma Jesus i.” 5 Dung dibege nasida i, tardidi ma nasida di bagasan goar ni Tuan Jesus. 6 Tikki dibahen si Paulus tanganna tu atas ulu ni nasida, songgop ma tondi parbadia tu nasida.+ Dung i, mulai ma nasida makkatai di akka bahasa na asing jala dipaboa nasida ma akka na lao masa di ari na naeng ro.+ 7 Hira-hira 12 halak ma nasida jala bawa do sude.

8 Saleleng tolu bulan, sai lao do si Paulus tu sinagoga.*+ Dang mabiar ibana makkatai tu akka halak. Marjamita do ibana disi jala marsitutu paposson roha ni nasida taringot tu Harajaon ni Debata.+ 9 Alai adong do piga-piga halak na jogal rohana. Dang olo nasida porsea jala diissaki nasida do Dalan ni Tuan i+ di jolo ni godang halak. Alani i, ditinggalhon si Paulus ma nasida+ jala ditogihon ma akka sisean lao sian nasida. Ganup ari do ibana marjamita di parsikkolaan ni Tiranus. 10 Saleleng dua taon ma diulahon ibana songon i. Gabe sude ma halak na di Provinsi Asia mambege hata ni Tuhan* i dohot ma i halak Jahudi nang halak Junani.

11 Jala sai dipatuduhon Debata do akka tanda halongangan* na massai balga marhite si Paulus.+ 12 Holan saputangan manang pakkean naung dipakke si Paulus pe dibahen tu akka na marsahit i,+ malum do nasida jala kaluar do suru-suruan na jahat i sian nasida.+ 13 Alai, adong do halak Jahudi na markaliling tu akka huta lao palaohon akka suru-suruan na jahat. Naeng dicoba nasida do palaohon i mamakke goar ni Tuan Jesus. Didok nasida ma, “Di bagasan goar ni Jesus na dibaritahon si Paulus, kaluar ma ho.”+ 14 Adong do malim kepala* ni Jahudi disi, goarna si Sikewa. Adong pitu anakna jala dohot do nasida mangulahon i. 15 Alai didok suru-suruan na jahat i ma tu nasida, “Hutanda do Jesus,+ hutanda do si Paulus,+ alai ise do hamu?” 16 Diranggutton halak na disonggopi suru-suruan na jahat i ma nasida. Dung i lari ma nasida sian jabu i, dang marpakkean be nasida jala marlukkaan ma daging ni nasida. 17 Sude do halak mamboto na masa on, halak Jahudi nang halak Junani na tinggal di Epesus. Gabe mabiar ma nasida sude jala lam dipasangap ma goar ni Tuan Jesus. 18 Godang do sian akka naung porsea i ro mangakkui parniulaon ni nasida na jahat jala dipaboa nasida do i di jolo ni akka jolma. 19 Godang do sian nasida hea mamakke ilmu gaib. Dipapungu nasida ma akka bukku na dipakke nasida jala ditutung ma i di jolo ni godang halak.+ Dung dietong nasida argana, adong hira-hira 50.000 hepeng perak. 20 Alani huaso ni Jahowa,* lam rarat ma hata i jala lam balga ma labana tu akka jolma.+

21 Dung salpu akka na masa i, direncanahon si Paulus ma tu Jerusalem+ dukkon sian Makedonia+ dohot sian Akaya ibana. Didok ibana ma muse, “Dung sian i, tu Rom+ nama au.” 22 Dung i disuru ibana ma lao dua halak na mangurupi ibana i, i ma si Timoteus+ dohot si Erastus+ tu Makedonia. Alai tinggal dope anggo si Paulus piga-piga leleng nai di Provinsi Asia.

23 Di tikki i, godang ma halak na gaor+ alani Dalan ni Tuan i.+ 24 Adong ma disi sahalak tukkang perak na margoar si Demetrius. Dibahen ibana do akka patung na marbentuk joro ni debata Artemis. Dibahen do i sian perak, jala parohon uttung na balga do i tu akka tukkang perak na asing na rap karejo dohot ibana.+ 25 Dipapungu ibana ma nasida dohot akka tukkang perak na asing, ninna ma, “Hamu akka dongan, takkas do diboto hamu sian on do ro godang hepengta. 26 Saonari, diida hamu jala dibege hamu sandiri do, nungnga dihasut si Paulus godang halak asa porsea nasida molo akka debata na binahen ni jolma i dang debata na sittong.+ Dang holan di Epesus+ didok ibana songon i, alai hampir di sude Provinsi Asia. 27 Parohon hasusaan do on tu hita, ai gabe roa ma goar ni ulaonta on. Alai dang holan i, dohot do joro ni debata Artemis gabe so marguna. Dang dipasangap akka jolma be debata Artemis, hape i do na disomba jolma di sude Provinsi Asia dohot di sude portibi on.” 28 Mambege i, gabe muruk situtu ma nasida, gogo ma didok, “Dipuji ma Artemis, debata ni halak Epesus!”

29 Gabe gaor ma sude penduduk ni kota i. Rap masuk ma nasida sude tu stadion. Jala disarat nasida do tusi si Gayus dohot si Aristarkus+ halak Makedonia na mandongani si Paulus di pardalananna. 30 Naeng masuk do si Paulus tu bagasan mandapotton akka jolma i, alai dang diloas akka sisean i. 31 Adong do piga-piga sian akka pengurus ni perayaan dohot pertandingan na marale-ale tu si Paulus. Disuru nasida do halak paboahon asa unang ro si Paulus tu stadion i. 32 Gaor situtu ma di stadion i. Adong na marsurak mandok songon on, na deba nai mandok songon an. Jala godang do na so mangattusi alani aha nasida ro tusi. 33 Dung i disuru ma si Aleksander makkatai tu akka jolma i, ai nungnga dionjar halak Jahudi ibana tu jolo. Dibahen si Aleksander ma tanda dohot tanganna asa sip akka jolma i, ala naeng makkatai ibana. 34 Alai dung diboto nasida na halak Jahudi do si Aleksander, rap marsurak ma nasida sude saleleng dua jom mandok, “Dipuji ma Artemis, debata ni halak Epesus!”

35 Ujungna, sip ma na gaor i dibahen walikota. Ninna ibana ma, “Hamu akka halak Epesus, ise ma na so mamboto, kota Epesus do panjaga ni joro ni Artemis na sangap i dohot patungna na madabu sian langit i? 36 Dang adong na boi mandok na so tutu i. Alani i tenang ma hamu, jolo manat ma pikkiri hamu aha na lao sibahenonmu. 37 Ai dang adong gunana dibahen hamu songon i tu akka bawa on. Dang dirampok nasida joro ni debatanta jala dang dileai nasida debatanta. 38 Alani i molo adong parsoalan ni si Demetrius+ dohot akka parkarejo na asing tu sasahalak, lok ma diboan ibana i tu pengadilan. Adong do disi akka gubernur.* Disi ma nasida paboahon na di rohana be. 39 Alai molo adong dope pangidoanmuna na asing, boan hamu ma i tu pengadilan. 40 Ai boi do parohon jea na masa sadari on. Boi do hita ditudu mangalo tu pamaretta, ala dang adong na boi dohonotta alani aha masa na gaor on.” 41 Dung didok ibana songon i, disuru ma mulak akka jolma i.