Jeremia

36 Di taon na paopatton pamarettaon ni si Jehoyakim+ anak ni si Josia raja ni Juda, didok Jahowa ma muse songon on tu si Jeremia, 2 “Buat ma sada gulungan,* surat ma sude na huhatahon tu ho mulai sian na parjolo makkatai Au tu ho di tikki pamarettaon ni si Josia sahat tu sadari on.+ Surat ma sude aha na hudok taringot tu Israel, taringot tu Juda,+ dohot taringot tu sude bangso on.+ 3 Atik boha molo dung dibege halak Juda taringot tu sude jea na lao huparo tu nasida, gabe olo nasida muba sian pangalaho ni nasida na jahat i. Gabe husesa ma dosa ni nasida dohot hasalaan ni nasida.”+

4 Dung i dijou si Jeremia ma si Baruk+ anak ni si Neria. Didiktehon si Jeremia ma sude hata ni Jahowa tu ibana. Disurat si Baruk ma i di gulungan* i.+ 5 Diparettahon si Jeremia ma muse tu si Baruk songon on, “Dang dipaloas be au masuk tu jabu ni Jahowa. 6 Alani i, ho nama na ikkon masuk tusi jala jahahon ma sude hata ni Jahowa na hudiktehon tu ho naung disurat ho di gulungan i. Lao ma ho tu jabu ni Jahowa di ari tikki marpuasa bangso on. Jahahon ma gogo isi ni gulungan i tu halak Juda na ro sian akka kota ni nasida. 7 Atik boha gabe dipangido nasida asa asi roha ni Jahowa mangida nasida. Jala gabe muba nasida sude sian pangalaho ni nasida na jahat i. Ai nungnga dipaboa Jahowa naung muruk jala tarrimas situtu Ibana tu bangso on.”

8 Dung i diulahon si Baruk anak ni si Neria do sude paretta ni Panurirang* Jeremia i. Dijahahon ibana ma gogo sude hata ni Jahowa na adong di gulungan* i di jabu ni Jahowa.+

9 Di bulan na pasiahon, di taon na palimahon pamarettaon ni si Jehoyakim+ anak ni si Josia raja ni Juda, ro ma sude penduduk ni Jerusalem dohot sude halak na sian akka kota na di Juda marpungu tu Jerusalem. Ai nungnga dipaboa na ikkon marpuasa sude halak di jolo ni Jahowa.+ 10 Dijaha si Baruk ma hata ni si Jeremia na adong di gulungan* i tu sude halak na adong di jabu ni Jahowa. Dijahahon ibana ma i sian ruangan ni si Gemaria+ anak ni si Sapan+ panalin* i, na adong di alaman parginjang na di jolo ni gerbang na baru na di jabu ni Jahowa.+

11 Tikki dibege si Mikaya anak ni si Gemaria anak ni si Sapan sude hata ni Jahowa na sian gulungan* i, 12 pittor lao ma ibana tu ruangan ni akka sekretaris na di istana ni raja. Hundul do disi sude akka pejabat,* i ma si Elisama+ sekretaris i, si Delaya anak ni si Semaya, si Elnatan+ anak ni si Akbor,+ si Gemaria anak ni si Sapan, si Sedekia anak ni si Hanania, dohot sude akka pejabat na asing. 13 Jadi dipaboa si Mikaya ma tu nasida hata na dibege ibana sian isi ni gulungan* na dijahahon si Baruk tu akka halak.

14 Dung i disuru sude pejabat i ma si Jehud anak ni si Netania anak ni si Selemia anak ni si Kusi manjuppangi si Baruk lao mandok, “Ro ma ho jala boan ma gulungan na dijahahon ho tu akka halak i.” Dung i diboan si Baruk anak ni si Neria ma gulungan i jala lao ma ibana mandapotton nasida. 15 Didok nasida ma tu ibana, “Hundul ma ho, jala gogo ma jahahon gulungan i tu hami.” Dung i dijahahon si Baruk ma i tu nasida.

16 Dung sae dibege nasida sude hata i, tarsonggot ma nasida huhut marsiberengan jala mabiar. Didok nasida ma tu si Baruk, “Ikkon tapaboa do sudena on tu raja.” 17 Disukkun nasida ma tu si Baruk, “Paboa ma jo tu hami, ai songon dia do boi disurat ho sude hata i. Na disuru si Jeremia do ho manurat sudena i?” 18 Dialusi si Baruk ma, “Ido. Ibana do na mandiktehon sude hata i tu au. Husurat ma i di gulungan* on mamakke tinta.” 19 Didok akka pejabat i ma tu si Baruk, “Lao ma ho rap dohot si Jeremia, martabuni ma hamu jala unang adong na mamboto manang didia hamu.”+

20 Lao ma akka pejabat i tu alaman manjuppangi raja. Disippan nasida do gulungan i di ruangan ni si Elisama sekretaris i. Jala dipaboa nasida ma sude hata na binege ni nasida tu raja.

21 Dung i disuru raja ma si Jehud+ mambuat gulungan i. Dibuat si Jehud ma gulungan i sian ruangan ni si Elisama sekretaris i. Dijahahon ibana ma musena i tu raja dohot tu sude pejabat na jongjong di labbung ni raja i. 22 Di tikki i bulan na pasiahon,* jala di tikki i hundul do raja di jabuna di ruangan na dipakke di tikki musim dingin. Di jolona adong do parapian na marsigorgor apina. 23 Dung sae dijaha si Jehud tolu manang opat kolom isi ni gulungan i, pittor diseat raja ma bagian i mamakke piso ni sekretaris. Disappatton ibana ma i tu parapian na marsigorgor i. Songon i ma dibahen ibana sappe habis gulungan i ditutung. 24 Nang pe nungnga dijaha muse gulungan i, dang mabiar nasida sude, raja dohot sude pegawaina. Dang adong nanggo sahalak pe sian nasida na mangaribak baju ni nasida. 25 Nang pe nungnga sai dielek-elek si Elnatan,+ si Delaya,+ dohot si Gemaria+ asa unang ditutung raja i gulungan i, dang olo ibana manangihon nasida. 26 Dung i disuru raja ma si Jerahmeel anak ni raja i, si Seraya anak ni si Asriel, dohot si Selemia anak ni si Abdeel manakkup si Baruk sekretaris i dohot Panurirang Jeremia. Alai ditabunihon Jahowa do nasida na dua.+

27 Dung habis ditutung raja sude isi ni gulungan na marisi hata ni si Jeremia na disurat si Baruk i, makkatai ma muse Jahowa tu si Jeremia,+ didok ma, 28 “Buat ma muse gulungan na asing jala surat ma muse sude isi ni gulungan na parjolo i, i ma gulungan naung ditutung+ si Jehoyakim raja ni Juda i. 29 Jala ikkon dokkononmu do songon on tu si Jehoyakim raja ni Juda i, ‘Songon on do hata ni Jahowa, “Nungnga ditutung ho be gulungan i jala didok ho, ‘Boasa disurat ho di gulungan i na ikkon ro raja ni Babel manghancurhon luat on jala pamatehon sude jolma dohot binatang sian on?’+ 30 Alani i songon on ma hata ni Jahowa taringot tu si Jehoyakim raja ni Juda, ‘Dang na lao adong sian pinopparna lao hundul di tahta ni si Daud.+ Dipasombu ma bakkena hona las ni ari di tikki arian, jala hona ngali ni ari di tikki borngin.+ 31 Hukumokku ma ibana, pinopparna, dohot sude parkarejona alani hasalaan ni nasida. Parookku ma jea tu nasida, tu penduduk ni Jerusalem dohot tu halak Juda songon naung hupaboa hian.+ Ai dang ditangihon nasida Au.’”’”+

32 Dung i dibuat si Jeremia ma gulungan na asing. Dilehon ma i tu si Baruk anak ni si Neria sekretaris i.+ Disurat si Baruk ma muse sude hata na didiktehon si Jeremia, i ma na disurat di gulungan* na parjolo naung ditutung+ si Jehoyakim raja ni Juda i. Disurat ibana do muse akka hata na asing tamba ni akka hata na disurat di gulungan na parjolo.