1 Raja-Raja

7 Dipajongjong si Salomo ma istanana,+ jala saleleng 13 taon ma ibana pajongjokkon i sahat tu na sae.+

2 Dibahen ibana ma muse sada jabu na digoari Jabu Tombak Libanon.+ Ganjang ni jabu i 100 asta,* bidangna 50 asta, jala timbona 30 asta. Dibahen do di toru ni jabu i opat baris tiang na sian hau ares. Dung i, dibahen do akka hau ares di ginjang ni akka tiang i.+ 3 Di bagian atas ni jabu i, dibahen ma akka papan na sian hau ares. Akka papan on dibahen di atas ni akka hau na disusun marganjang-ganjang jala na ditopang ni akka tiang. Godang ni tiang i 45, jala 15 ma sabaris. 4 Adong tolu tingkat jandela ni jabu i jala markusen do sude jandela i. Marsiadop-adopan do jandela na di dinding na sada tu jandela na di dinding na sada nai. 5 Markusen do sude pintu ni jabu i dohot sude jandelana na tolu tingkat i. Jala segi opat do bentuk ni sude kusenna i.

6 Dipajongjong ibana ma muse sada jabu na martiang-tiang. Digoari ma i Jabu* Tiang. Ganjangna 50 asta jala bidangna 30 asta. Adong do terras di jolo ni jabu i na ditopang akka tiang jala adong atapna.

7 Dibahen si Salomo do muse sada jabu. Disi ma ibana mamutusson nasa parkaro. Digoari ma i Jabu* Tahta+ manang Jabu Pengadilan.+ Dilappis ibana do bagasan ni jabu i mamakke hau ares, mulai sian lantena sahat tu langit-langitna.

8 Dipajongjong ibana ma muse istanana di pudi ni Jabu Tahta. Jala dang saalaman i+ dohot Jabu Tahta i. Alai dos do bahan na dipakke dohot carana pajongjokkon i. Dibahen ibana ma muse jabu na songon Jabu Tahta i lao gabe inganan ni istrina, boru ni si Firaun.+

9 Sian akka batu na arga+ do akka jabu i dibahen, mulai sian fondasina sahat tu dindingna parginjang jala sahat muse tu luar, i ma tu alaman na balga.+ Nungnga diukkur hian akka batu i, ditokkoki, jala digosok asa halus. 10 Sian akka batu na arga dohot na massai balga do dibahen fondasi ni jabu i. Adong na sappulu asta, jala adong na ualu asta. 11 Dindingna dibahen sian batu na arga naung diukkur jala ditokkoki, dohot sian hau ares. 12 Dos songon tembok ni alaman na di bagasan+ ni jabu ni Jahowa dohot terrasna,+ songon i ma dibahen tembok ni alaman na balga. Dibahen do tembok i sian tolu lappis batu naung ditokkok dohot salappis hau ares.

13 Disuru Raja Salomo ma halak mangalap si Hiram+ sian Tirus. 14 Anak ni sahalak ina na mabalu na sian marga Naptali do si Hiram. Jala bapakna sahalak tukkang tombaga+ na sian Tirus. Sahalak tukkang na malo+ jala na marpengalaman do si Hiram. Godang do na boi dibahen ibana sian tombaga.* Ro ma ibana tu jolo ni raja jala diulahon ibana ma sude na nidok ni raja.

15 Dibahen si Hiram ma dua tiang+ sian tombaga.+ Timbo ni ganup tiang i 18 asta jala kalilingna 12 asta.* 16 Dibahen ibana ma dua ulu ni tiang i sian tombaga. Timbo ni ganup ulu ni tiang i lima asta. Dung i, dibahen ma i tu ginjang ni tiang i. 17 Dibahen ma muse tu ganup ulu ni tiang i pitu ratte. Jala disusun ma pitu ratte i gabe jaring.+ 18 Dibentuk ma muse hiasan buah delima tu ulu ni tiang i. Disusun ma i gabe dua baris makkaliangi jaring i. 19 Di akka ulu ni tiang na di terras i, dibentuk ma akka bunga lili na timbona opat asta. 20 Dibahen ma ulu ni tiang i tu ginjang ni tiang na dua i. Dililit ma jaring tu partoru ni ulu ni tiang i. Jala dibentuk do muse disi 200 hiasan buah delima.+

21 Dipajongjong ibana ma akka tiang di jolo ni terras ni bagas joro i,*+ jala dibahen ma i di sabola kanan* dohot di sabola kiri.* Na di sabola kanan dibahen ma goarna Jakin,* jala na di sabola kiri dibahen ma goarna Boas.*+ 22 Dibentuk ma akka gambar ni bunga lili di ulu ni tiang i. Ujungna, sae ma akka tiang i dipature.

23 Dibahen si Hiram ma muse inganan ni aek na balga jala na bulat, digoari ma i Laut Tombaga.+ Bidangna sian pinggir na sada tu pinggir na sada nai 10 asta, timbona 5 asta, jala kalilingna 30 asta.*+ 24 Di toru ni pinggir ni Laut Tombaga i adong do dua baris hiasan na songon labu.+ Sappulu labu ma di bagasan sada asta. Jala di bagasan sada cetakan do dibahen labu i dohot Laut Tombaga i. 25 Dibahen ma 12 patung lombu jantan.+ Tolu patung i mangida tu utara, tolu tu barat, tolu tu selatan, jala tolu tu timur. Masitundalan do sude patung lombu jantan i. Dung i dibahen ma Laut Tombaga i tu ginjang ni 12 patung lombu i. 26 Nasa bidang ni talapak ni tangan* ma hapal ni Laut Tombaga i. Pinggirna songon pinggir ni cakkir jala songon bunga lili na kabbang. Siat do 2.000 bat* aek disi.

27 Dibahen si Hiram ma muse sappulu kareta+ tombaga.* Ganup kareta i opat asta ma ganjangna, opat asta ma bidangna, jala tolu asta ma timbona. 28 Songon on ma carana lao mambahen akka kareta i: Dibahen ma akka dindingna sian tombaga jala dipamasuk ma i tu sada inganan na segi opat. 29 Adong do gambar ni singa,+ lombu jantan dohot kerubim*+ di dinding ni kareta i. Jala adong do muse gambar na sarupa di rangka ni kareta i. Di ginjang dohot di toru ni gambar ni singa dohot gambar ni lombu i, diukir do garis na marlekkuk-lekkuk. 30 Adong do opat roda ni kareta i na sian tombaga. Jala dibahen do tombaga lao manghubungkon roda na sada tu roda na sada nai. Di opat sudut ni kareta i adong do tiang na manahan roda i. Adong do muse bak di kareta i. Jala adong do na manahan bak i. Diukir do di panahanna i garis na marlekkuk-lekkuk. 31 Bulat do baba ni bak i jala adong do bingkaina. Marpetak-petak do ukiran di bingkaina i. Jala satonga asta ma timbo ni bingkai i. Molo diukkur sian pat ni panahan ni bak i sahat tu bagian toru ni bingkai i, sada asta ma timbona. Alani i, sada satonga asta ma timbo ni bingkai i sahat tu pat ni panahan ni bak i. 32 Di toru ni bak ni kareta i do rodana na opat i. Jala sada satonga asta ma timbo ni ganup roda i. Adong do tiang na manahan roda i jala tarsambung do i tu bak ni kareta i. 33 Songon roda ni kareta hoda do roda ni kareta i. Adong do tiang na manahan roda i, adong do lingkarna, jari-jarina, dohot pusat ni roda i. Sudena i sian logam do dibahen. 34 Di ganup sudut ni kareta i adong do tiang, i ma rangka ni kareta i. Laos i ma na manahan akka roda i. 35 Adong do bingkai na makkaliangi bak na di ginjang ni kareta i. Timbona satonga asta. Jala lokkot do bingkai i tu panahan ni bak i. 36 Di bingkai ni bak i dohot di dinding ni kareta i diukir ibana do gambar ni akka kerubim, singa, dohot hau palem di ingananna be. Jala diukir do garis na marlekkuk-lekkuk di pinggir ni bingkai i dohot di pinggir ni dinding kareta i.+ 37 Sarupa do cara ni ibana mambahen kareta na sappulu i.+ Sarupa+ do sude ukkuran dohot bentukna.

38 Dibahen si Hiram ma sappulu bak na sian tombaga+ tu sappulu kareta i. Sada bak ma tu sada kareta. Opat asta ma balga ni bak i. Jala siat do 40 bat aek tusi. 39 Dibahen ibana ma lima kareta i di sabola kanan ni jabu i jala dibahen ma lima nai di sabola kiri ni jabu i. Dibahen ma muse Laut Tombaga di sabola kanan ni jabu i, i ma di sabola selatan.+

40 Dibahen si Hiram+ do muse akka bak na asing, sekop,+ dohot akka makkuk.+

Diulahon si Hiram do sude na nidok ni Raja Salomo. Akka on ma na dibahen ibana di jabu ni Jahowa:+ 41 Dibahen do dua tiang,+ dua ulu ni tiang na songon makkuk, dua jaring+ na dibahen tu ulu ni tiang i, 42 dohot 400 hiasan buah delima.+ Disusun do hiasan buah delima i tu jaring na dua i. Jala dibahen ma i dua baris di ganup jaring. Laos jaring i ma na dibahen tu ulu ni tiang na songon makkuk i. 43 Dibahen do sappulu kareta+ dohot sappulu bak+ na dipeakkon tu kareta i. 44 Dibahen do muse Laut Tombaga+ dohot 12 patung lombu jantan na di toru ni Laut Tombaga i. 45 Dibahen ibana do muse akka inganan ni sirabun, sekop, makkuk, dohot akka barang na sian tombaga. Dibahen si Hiram do sudena i tu jabu ni Jahowa, songon na nidok ni Raja Salomo. 46 Disuru raja i do asa sian tano liat dibahen cetakan ni akka barang i. Jala dibahen do i di huta na di holang-kolang ni Sukot dohot Zaretan na di Jordan.

47 Dang ditimbang si Salomo akka barang i alani godangna. Alani i, dang taretong sadia borat ni tombaga na dipakke.+ 48 On ma akka barang na dibahen si Salomo tu jabu ni Jahowa: langgatan+ na sian mas, meja+ inganan ni roti pelean na sian mas, 49 dohot akka inganan ni lampu+ na sian mas murni na dibahen di jolo ni Inganan na Massai Badia. Dibahen do akka inganan ni lampu i lima di kanan jala lima di kiri. Dibahen do muse akka hiasan bunga na kabbang,+ akka lampu, akka penjepit ni sumbu, sudena i dibahen sian mas.+ 50 Dibahen do muse akka bak, alat pamatehon api,+ akka makkuk, akka cakkir,+ dohot inganan ni gara ni api.+ Sudena i dibahen sian mas murni. Dibahen do muse alas ni pamutaran ni pintu di Inganan na Massai Badia+ dohot di Inganan na Badia.+ Sudena i dibahen sian mas.

51 Sae ma sude diulahon si Salomo akka na porlu tu jabu ni Jahowa. Dung i, dipamasuk ibana ma akka barang tu inganan panimpanan ni arta na adong di jabu ni Jahowa.+ Dipamasuk ibana do akka barang naung dipabadia si Daud bapakna,+ i ma akka perak, akka mas, dohot akka barang na asing.