1 Raja-Raja

6 Di taon na paopatton si Salomo mamaretta gabe raja, mulai ma dipajongjong ibana jabu ni Jahowa*+ di bulan Siw,*+ i ma bulan na paduahon. Tikki i, i ma taon na paopatratus ualupuluhon halak Israel malua sian Mesir.+ 2 Ganjang ni jabu* na dipajongjong Raja Salomo tu Jahowa, i ma 60 asta,* bidangna 20 asta, jala timbona 30 asta.+ 3 Adong do terras+ di jolo ni bagas joro* i. Bidangna 20 asta,* dos tu bidang ni jabu i. Jala sappulu asta ma ganjangna, gabe tamba ma ganjang ni jabu i alani terrasna i.

4 Dibahen si Salomo do akka jandela ni jabu i jala dibahen do kusenna. Alai dang sarupa ukkuran ni kusenna i.+ Umbalga do ukkuran ni kusen ni jandela i di bagasan sian na di luar. 5 Dipajongjong si Salomo ma muse sada bangunan na makkaliangi jabu i. Godang do ruangan di bagasan ni bangunan i.+ Jala sadinding do akka ruangan i tu dinding ni Inganan na Badia dohot dinding ni Inganan na Massai Badia+ na adong di jabu i. 6 Dibahen ma bangunan i gabe tolu tingkat. Tingkat na parjolo, lima asta ma bidangna. Tingkat na paduahon, onom asta ma bidangna. Jala tingkat na patoluhon, pitu asta ma bidangna. Umhapal do dinding ni tingkat na parjolo sian tingkat na paduahon. Jala umhapal do dinding ni tingkat na paduahon sian tingkat na patoluhon. Dibahen pe songon i, asa boi do dipeakkon disi hau na sian dinding ni bangunan i tu dinding ni jabu i.+

7 Nungnga ditokkoki hian akka batu na lao dipakke pajongjokkon jabu i.+ Alani i, dang adong tarbege soara ni tokkok, kampak, dohot akka parkakas na sian bosi saleleng dipajongjong jabu i. 8 Di sabola selatan* ni jabu i+ do pintu masuk tu tingkat na parjolo i. Sada do tangga tu tingkat na paduahon dohot tu tingkat na patoluhon jala marlekkuk-lekkuk do bentuk ni tangga i. 9 Dipajongjong ibana ma jabu i sappe sae.+ Dibahen ibana ma atap ni jabu i sian akka papan dohot hau ares.+ 10 Dibahen do akka ruangan i makkaliangi jabu i+ jala lima asta ma timbo ni ganup ruangan i. Dipeakkon do akka hau ares sian dinding ni bangunan i tu dinding ni jabu i.

11 Dung i didok Jahowa ma tu si Salomo, 12 “Molo diihutton jala dioloi ho sude aturanku, patikku, dohot parettakku,+ pasautokku ma janji na hubahen tu si Daud bapakmu taringot ho,+ tarlumobi taringot tu jabu na pinajongjongmon. 13 Maringanan ma Au di tonga-tonga ni Israel+ jala dang tadikkonokku bangsokku Israel.”+

14 Dipajongjong si Salomo ma jabu i sahat tu na sae. 15 Dilappis ibana do dinding ni jabu i sian bagasan mamakke hau ares. Dipasang ibana do akka papan tu dinding ni jabu i sian bagasan, tu lantena, dohot tu langit-langitna. Alai anggo lantena sian hau juniper do dibahen.+ 16 Di bagian pudi ni jabu i, dibahen ibana ma sada ruangan.+ Ganjang ni ruangan i 20 asta. Dibahen ibana do dinding, lante, dohot langit-langitna sian hau ares. Jala digoari do ruangan i Inganan na Massai Badia.+ 17 Di bagian jolo ni jabu i, adong sada ruangan na digoari bagas joro,*+ ganjangna 40 asta. 18 Sude do dinding na di bagasan ni jabu i dilappis mamakke hau ares. Alani i, dang adong nanggo sada batu na tarida. Dung i, diukir ma gambar ni labu+ dohot bunga na kabbang+ di hau ares na di dinding i.

19 Diparade si Salomo ma Inganan na Massai Badia na di bagasan ni jabu i,+ asa boi dipeakkon poti parpadanan ni Jahowa tusi.+ 20 Ganjang ni Inganan na Massai Badia i, i ma 20 asta, bidangna 20 asta, jala timbona 20 asta.+ Dilappis ibana ma inganan i mamakke mas murni. Jala dilappis ibana ma muse langgatan* i+ mamakke hau ares. 21 Dilappis si Salomo ma sude bagasan ni jabu i mamakke mas.+ Jala dibahen do ratte na sian mas di jolo ni Inganan na Massai Badia+ naung dilappis mamakke mas i. 22 Dilappis ibana do muse langgatan+ na jonok tu Inganan na Massai Badia i mamakke mas. Ujungna, sae ma dilappis ibana sude bagasan ni jabu i mamakke mas.

23 Di Inganan na Massai Badia i, dibahen si Salomo ma dua patung kerubim*+ na sian hau pinus.* Timbo ni ganup patung kerubim i sappulu asta.+ 24 Ganup kerubim adong dua habongna. Ganup habongna i ganjangna lima asta, sian ujung ni habongna na sada tu ujung ni habongna na sada nai ganjangna sappulu asta. 25 Dos do ganjang ni habong ni kerubim na paduahon i tu kerubim na parjolo i. Ganjang ni habongna duassa, i ma sappulu asta. Jala dos do bentuk dohot ukkuran ni kerubim na dua i. 26 Timbo ni kerubim na sada sappulu asta, jala dos do timbona tu kerubim na sada nai. 27 Dung i dibahen si Salomo ma patung kerubim+ na dua i di Inganan na Massai Badia. Dipahembang do habong ni akka kerubim i. Hona do sabbariba habong ni kerubim na sada tu dinding, jala habong ni kerubim na sada nai hona tu ujung ni dinding na sada nai. Alai habong ni nasida na sambariba nai masidaisan do di tonga-tonga ni inganan i. 28 Dilappis ibana ma akka kerubim i mamakke mas.

29 Diukir si Salomo ma gambar ni akka kerubim,+ hau palem,+ dohot bunga na kabbang+ di sude dinding ni jabu i di bagasan.* 30 Dilappis ibana do lante ni Inganan na Badia dohot Inganan na Massai Badia na adong di jabu i mamakke mas. 31 Lao masuk tu Inganan na Massai Badia i, dibahen ibana do dua pintu na sian hau pinus, akka tiang di sappingna, dohot kusen ni pintu i na gabe bagian na palimahon.* 32 Sian hau pinus do dibahen pintu na dua i. Dung i diukir ibana ma gambar ni akka kerubim, hau palem, dohot bunga na kabbang di pintu i jala dilappis mamakke mas. Dipakke ibana do tokkok lao mangalappis gambar ni kerubim dohot gambar ni hau palem i mamakke mas. 33 Lao masuk tu Inganan na Badia* i, dibahen ibana do kusen ni pintuna sian hau pinus, jala i ma bagian na paopatton.* 34 Sian hau juniper do dibahen ibana duassa pintu i, jala ganup pintu adong dua daun pintuna na boi marputar.+ 35 Diukir ibana ma gambar ni akka kerubim, akka hau palem, dohot bunga na kabbang di pintu i. Jala dilappis ma i mamakke mas.

36 Dibahen ma tembok lao tu alaman ni jabu i na di bagasan.+ Tembok i dibahen sian tolu lappis batu naung ditokkoki dohot salappis hau ares.+

37 Di bulan Siw,* di taon na paopatton si Salomo mamaretta, dibahen ma fondasi ni jabu ni Jahowa.+ 38 Di bulan Bul,* i ma bulan na paualuhon, di taon na pasappulu sadahon si Salomo mamaretta, sae ma jabu i dipajongjong songon naung direncanahon hian.+ Jadi, pitu taon ma dipature si Salomo jabu i.