Ulaon ni Apostel

17 Ditorushon si Paulus dohot si Silas ma pardalanan ni nasida, dibolus ma Ampipolis dohot Apolonia jala sahat ma nasida di Tessalonik. Disi adong do sinagoga* ni halak Jahudi. 2 Songon na somal, didapothon si Paulus ma nasida. Saleleng tolu minggu, ganup ari Sabbat, dipangke si Paulus ma Surat na Badia laho mangkata-hatai tu nasida. 3 Dipatorang jala dipatuduhon ibana ma marhite angka ayat, na ingkon marsitaonon Kristus i jala dipahehe sian na mate. Ninna ma, “Jesus na hubaritahon i tu hamu, ibana do Kristus i.” 4 Gabe porsea ma piga-piga sian nasida jala diihuthon nasida ma si Paulus dohot si Silas. Songon i do nang torop halak Junani naung manomba Debata dohot torop borua na sangap.

5 Gabe mangiburu ma halak Jahudi. Dipapungu nasida ma angka pareman na so adong karejona di pasar. Marpungu ma nasida laho mambahen guntur kota i. Laho ma nasida tu jabu ni si Jason mangalului si Paulus dohot si Silas asa boanonna tu jolo ni na manggunturi i. 6 Alai ndang dapot ni nasida si Paulus dohot si Silas disi, gabe disarat nasida ma si Jason dohot manang na piga angka dongan tu jolo ni angka na marhuaso* di kota i. Gogo ma didok nasida, “Nunga sahat be tuson angka halak na manggunturi liat portibi on, 7 jala dipaloas si Jason do nasida di jabuna. Dialo nasida do angka parenta ni Kesar. Ai didok nasida do adong raja na asing, i ma Jesus.” 8 Gabe gaor ma natorop i dohot angka na marhuaso dung dibege hata ni nasida. 9 Alai dung dijalo nasida hepeng jaminan sian si Jason dohot sian dongan na asing i, diloas ma nasida laho.

10 Di borngin i, pintor dipaborhat angka dongan i ma si Paulus dohot si Silas tu Berea. Dung sahat nasida disi, masuk ma nasida tu sinagoga* ni halak Jahudi. 11 Umburju do halak na di Berea sian halak na di Tessalonik. Ai dijalo nasida do hata ni Debata sian nasa rohana. Ganup ari do dipareso nasida Surat na Badia i laho mangida sintong manang ndang na binege ni nasida i. 12 Alani i, godang ma sian nasida na gabe porsea. Torop do nang angka baoa dohot borua na sangap sian halak Junani na gabe porsea. 13 Alai dung dibege halak Jahudi na di Tessalonik naung dibaritahon si Paulus hata ni Debata di Berea, ro ma nasida tusi manjujui natorop i laho mangalo nasida. 14 Pintor disuru angka dongan na disi ma asa ditaruhon si Paulus sahat tu topi ni laut. Anggo si Silas dohot si Timoteus, tading do disi. 15 Alai ditaruhon do si Paulus sahat tu Atena. Didok si Paulus ma tu nasida asa disuru hatop ro si Silas dohot si Timoteus mandapothon ibana. Dung i mulak ma nasida.

16 Tingki di Atena si Paulus paimahon si Silas dohot si Timoteus, marsak ma rohana mangida godang ni gana-ganaan na di kota i. 17 Dung i, martukar pingkiran ma ibana di sinagoga rap dohot halak Jahudi songon i nang halak na sian bangso na asing na manomba Debata. Jala ganup ari do ibana di pasar laho martungkar pingkiran dohot ganup halak na adong disi. 18 Dung i marsoal ma si Paulus dohot deba sian na mangihuthon Epikurus* dohot Stoa.* Adong ma na mandok, “Aha do na naeng dohonon ni sigodang hata on?” Na asing muse mandok, “Debata na asing do ra na pinaboa ni ibana.” Didok nasida pe songon i, ala dibaritahon si Paulus do barita na uli taringot tu Jesus dohot haheheonna. 19 Dung i diboan nasida ma si Paulus tu Areopagus.* Ninna ma, “Boi do botoonnami ajaran baru na pinaboami? 20 Ai ndang hea dope hubege hami taringot i, paboa ma jolo tu hami aha lapatan ni i.” 21 Ai las do roha ni sude halak Atena dohot angka halak panompang na disi* mangalehon tingkina laho mangkata-hatai jala manangihon barita na baru. 22 Jongjong ma si Paulus di tonga-tonga ni Areopagus* i, ninna ma,

“Hamu angka halak Atena, huida di sude ulaonmuna, dihabiari hamu do angka debatamuna lobi sian na binahen ni halak na asing. 23 Tingki mardalan-dalan ahu di kotamuna on, huparrohahon ma angka na sinombamuna, adong do huida sada langgatan jala tarsurat do disi ‘Tu Debata na So Tinanda’. Alani i, Debata na sinombamuna na so tinandamuna i, taringot tu ibana ma na laho paboaonku tu hamu. 24 Debata na manompa portibi on dohot nasa isina, Ibana do Tuan ni langit dohot tano on. Ndang maringanan Ibana di joro na binahen ni jolma. 25 Ndang hurangan manang aha Ibana jala ndang porlu urupan ni jolma Ibana. Ai Ibana do na mangalehon hangoluan, hosa, ro di saluhutna tu sude jolma. 26 Sian sada jolma do dibahen Ibana sude bangso na laho mangingani saluhut tano on. Ibana do na manontuhon angka tingki dohot angka batas ni inganan ni nasida, 27 asa luluan ni nasida Debata. Molo marsitutu nasida mangalului, jumpang ni nasida ma Ibana. Ai sasintongna, ndang dao Ibana sian ganup hita on. 28 Ai alani Ibana do hita mangolu, marhosa jala adong. Songon na didok di angka umpasa, ‘Ai hita pe anakkonna do.’

29 “Antong, ala anak ni Debata do hita, unang ma didok rohanta Debata i songon patung na pinature ni angka jolma sian mas, perak manang batu. 30 Tutu, hea do dipasombu Debata jolma ndang mananda Ibana. Alai saonari, dipaboa Debata do tu sude jolma di sude inganan asa muba nasida. 31 Ai nunga ditontuhon Debata sada ari laho manguhumi portibi on di bagasan hatigoran marhite sasahalak naung pinillitna. Dipahehe Debata do ibana sian na mate, asa porsea sude jolma na tutu ari paruhuman i.”

32 Tingki dibege nasida taringot tu haheheon ni halak na mate, adong ma deba sian nasida mangarehei si Paulus, na deba nai muse mandok, “Sahali nai ma patorang taringot tusi.” 33 Dung i ditadingkon si Paulus ma nasida. 34 Alai adong ma deba na mangihuthon ibana jala gabe porsea, i ma si Dionisius sahalak hakim sian pengadilan Areopagus* dohot sahalak borua na margoar si Damaris jala godang dope na asing.