Heber

7 Si Melkisedek, i ma raja ni Salem jala ibana do malim ni Debata Natumimbul i. Pajumpang do ibana dohot si Abraham dung mulak si Abraham sian parporangan manaluhon angka raja. Di tingki i, dipasu-pasu ibana ma si Abraham. 2 Jala dilehon si Abraham do tu ibana saparsampulu sian sude na binuatna sian parporangan i. Molo diterjemahon, lapatan ni goar ni si Melkisedek, i ma “Raja ni Hatigoran”, alai ala raja ni Salem do ibana, laos marlapatan ma goarna i “Raja ni Hadameon”. 3 Ndang adong na mamboto ise amang dohot inang ni si Melkisedek. Jala ndang adong na manurat taringot tu tarombona, ari hatutubuna, dohot hamamatena. Alai dibahen do ibana songon Anak ni Debata, jala gabe malim ma ibana saleleng ni lelengna.

4 Ida ma songon dia hasangapon ni si Melkisedek i! Pola do dilehon ompunta* si Abraham tu ibana saparsampulu na dumenggan sian sude na binuatna sian parporangan i. 5 Mangihuthon Patik, pinompar ni si Lepi do na dipillit gabe malim. Tu nasida do diparentahon laho papunguhon saparsampulu sian na sinari ni bangso i, i ma angka haha anggi ni nasida. Nang pe sasintongna pinompar ni si Abraham do angka haha anggina i, 6 alai dijalo si Melkisedek do saparsampulu sian si Abraham, nang pe ndang pinompar ni si Lepi ibana. Jala dipasu-pasu ibana do si Abraham na mandapot janji ni Debata. 7 Tangkas do taboto, umsangap do na mamasu-masu sian na manjalo pasu-pasu i. 8 Halak na boi mate do pinompar ni si Lepi na manjalo saparsampulu i. Alai ianggo baoa na songon si Melkisedek na manjalo saparsampulu i tongtong do mangolu songon na tarsurat i. 9 Boi ma didok, gari halak Lepi na manjalo saparsampulu i pe, digarar nasida do saparsampulu marhite si Abraham. 10 Ai pinompar ni si Abraham do si Lepi. Alai ndang tubu dope ibana tingki pajumpang si Abraham dohot si Melkisedek.

11 Nunga disurat di Patik ni si Musa aturan taringot tu hamalimon ni halak Lepi. Antong, molo boi do hamalimon i mangurupi halak malua sian dosa, boasa dipillit dope malim na asing na songon si Melkisedek? Nda naung sae di hita malim na songon si Aron? 12 Molo nunga muba aturan taringot tu hamalimon i, ingkon muba do nang Patik i. 13 Sian marga na asing do baoa na nidokna dison. Jala ndang adong dope sian marga i na hea marhobas di langgatan. 14 Sude do halak mamboto, sian marga Juda do Tuanta i. Alai ndang hea didok si Musa na laho adong malim sian marga i.

15 Lam tangkas ma i dung ro malim na asing na songon si Melkisedek. 16 Ndang ala mangihuthon Patik, manang ala pinompar ni malim umbahen na dipillit ibana gabe malim. Alai ala dilehon do tu ibana huaso na mambahen ibana mandapot hangoluan na so ra suda. 17 Ai adong do ayat na mandok taringot tu ibana, “Ho do malim na saleleng ni lelengna na songon si Melkisedek.”

18 Alani i, ndang pangkeon be aturan na parjolo i, ala gale do i jala ndang marguna. 19 Ai ndang boi Patik i pasauthon sude lomo ni roha ni Debata. Alai diparade Debata do pangkirimon na dumenggan, na boi mambahen hita jonok tu Debata. 20 Asing ni i, nunga marsumpa Debata tingki mamillit Jesus gabe malim 21 (ai ndang marsumpa Debata tingki mamillit angka na asing i gabe malim, alai marsumpa do Ibana tingki mamillit Jesus gabe malim, didok do taringot tu ibana, “Nunga marsumpa Jahowa jala ndang solsolanna sumpana i, ‘Ho do malim na saleleng ni lelengna’”). 22 Alani i, Jesus ma jaminan tu parjanjian na dumenggan i. 23 Dung i muse, mate do angka malim i. Alani i, ingkon gantion ni na asing ma malim na parjolo i laho manorushon ulaon ni nasida. 24 Alai anggo Jesus, ndang porlu ibana gantion ni na asing, ai mangolu do ibana saleleng ni lelengna. 25 Dibahen i, boi do ibana paluahon sude jolma na pajonokkon dirina tu Debata marhite ibana. Ala mangolu do ibana saleleng ni lelengna, gabe boi ma ibana mambahen pangidoan tu Debata taringot tu nasida.

26 Ai sintua ni malim na songon i do na ringkot di hita. Na marsihohot, na so olo mangulahon na jahat, na so ramun, imbar sian halak pardosa, jala nunga dipatimbo di atas ni langit. 27 Ibana ndang songon sintua ni malim na asing, na ingkon ganup ari mangalehon pelean alani dosana dohot alani dosa ni bangso i. Alai holan sahali do ulahononna i ro di saleleng ni lelengna, i ma tingki na nilehonna i dirina gabe pelean. 28 Jolma na mardosa do sintua ni malim na dipillit mangihuthon Patik. Alai, ndang songon i halak na dipillit marhite janji na mardongan sumpa na adong dungkon Patik i. Ibana do Anak naung dibahen sun denggan saleleng ni lelengna i.