Kolosse

1 Sian si Paulus na gabe apostel ni Kristus Jesus mangihuthon lomo ni roha ni Debata dohot sian si Timoteus donganta. 2 Mandapothon angka na badia dohot angka dongan na marsihohot di bagasan Kristus na di Kolosse:

Anggiat ma dipatuduhon tu hamu asi ni roha na mansai balga dohot hadameon na sian Debata Ama i.

3 Tingki hutangiangkon hami hamu, mandok mauliate do hami tu Debata, Ama ni Tuanta Jesus Kristus. 4 Ai hubege hami do taringot tu haporseaonmuna tu Kristus Jesus dohot holongmuna tu angka na badia, 5 ala mangkirim hamu tu hangoluan na di surgo. Nunga dibege hamu taringot tu pangkirimon on sian barita na uli 6 na dipaboa tu hamu. Ai sian mulai dibege hamu barita na uli jala tangkas diboto hamu asi ni roha ni Debata na mansai balga, nunga lam tarsar jala lam martamba na manangihon barita na uli di tonga-tongamuna, songon i ma nang di liat portibi on. 7 Nunga dibege hamu barita na uli sian si Epapras, dongan saulaon na tahaholongi, na marsihohot marhobas tu Kristus i humongkop hami. 8 Dipaboa ibana do muse tu hami taringot tu holong na pinatudumuna marhite panogu-noguon ni tondi parbadia.

9 Dung dibege hami i, ndang hea so hami manangiangkon hamu jala mangido asa dapotmuna parbinotoan na bagas taringot tu lomo ni roha ni Debata, di bagasan bisuk dohot pangantusion na dilehon marhite tondi parbadia. 10 Dung i, boi ma hamu marpangalaho hombar tu lomo ni roha ni Jahowa huhut mangulahon angka ulaon na denggan, jala lam martamba parbinotoanmuna na bagas taringot tu Debata. 11 Hutangiangkon hami do muse asa lam margogo hamu alani huaso ni Debata na mansai balga i. Dung i boi ma hamu martahan, sabar, jala marlas ni roha 12 huhut mandok mauliate tu Debata, na mambahen hamu manjalo janji na nilehonna tu angka na badia na mardalan di bagasan hatiuron.

13 Nunga dipalua hita sian huaso ni haholomon jala dipapinda tu harajaon ni Anak haholonganna. 14 Dipalua ibana do hita marhite tobusan na manesa angka dosanta. 15 Ibana do gombaran ni Debata na so tarida i, jala na parjolo ditompa sian saluhutna. 16 Marhite ibana do ditompa saluhut na di surgo dohot na di tano on, na tarida dohot na so tarida, angka raja, angka pamimpin, angka pamarenta, manang angka parhuaso. Marhite ibana jala laho di ibana do ditompa saluhutna. 17 Nunga adong ibana andorang so adong na asing jala marhite ibana do saluhutna dibahen. 18 Ibana do ulu ni huria, i ma daging i. Ibana do mula ni saluhutna, na parjolo hehe sian angka na mate, asa gabe na parjolo ibana sian saluhutna. 19 Ai lomo do roha ni Debata asa sun denggan ibana di saluhutna. 20 Jala marhite Anakna i do mardame saluhut na di tano on dohot na di banua ginjang tu Debata, i ma marhite mudar ni Anakna i na durus di hau partinaonan.*

21 Dao do hamu najolo sian Debata jala musuna do hamu, ai angka na jahat do dipingkiri hamu. 22 Alai saonari nunga mardame be hamu tu Debata marhite Anakna na mangalehon dagingna tu hamatean, asa badia hamu, ndang marcacat,* jala ndang marsala di jolona. 23 Alai ingkon tongtong do hamu marhaporseaon, togu di ginjang ni fondasi ni haporseaon, ndang tarhutur, jala ndang manimbil sian pangkirimon na binegemuna sian barita na uli na dibaritahon tu sude tompaan na di tano on. Alani barita na uli on do, ahu si Paulus gabe parhobas.

24 Marlas ni roha do ahu saonari nang pe manaon hasusaan humongkop hamu jala marsitaonon songon Kristus. Alai ndang marujung dope hasusaanki humongkop daging ni Kristus, i ma huria. 25 Gabe parhobas do ahu tu huria i hombar tu tanggung jawab na dilehon Debata tu ahu humongkop hamu, laho paboahon hata ni Debata sian nasa gogongku, 26 i ma rahasia na badia na ditabunihon sian portibi on dohot sian angka halak najolo. Alai nunga dipapatar be i saonari tu angka na badia ni Debata. 27 Ai tu nasida do paboaon ni Debata hamuliaon ni rahasia na badia di tonga-tonga ni angka bangso. On do rahasia na badia i: na marsada Kristus rap dohot hamu, lapatanna mangkirim hamu dipasangap rap dohot ibana. 28 Taringot tu ibana ma na tapaboa huhut na tapasingot tu ganup halak jala mangajari nasida marhite bisuk, asa sun denggan tabahen ganup halak na marsada dohot Kristus di jolo ni Debata. 29 Hubahen do sian nasa gogongku laho pasauthon i marhite huaso na nilehonna tu ahu.