Rom

12 Alani i, hamu ale angka dongan, alani asi ni roha ni Debata, hupangido ma tu hamu: Pelehon hamu ma dirimuna gabe pelean na mangolu, na badia, jala na palashon roha ni Debata. Marhobas ma hamu tu Ibana sian nasa pingkiranmuna. 2 Jala unang ma tiru hamu angka halak na di portibi* on. Alai muba ma hamu marhite paubahon pingkiranmuna. Asa diboto hamu lomo ni roha ni Debata na denggan, na sintong, jala na palashon rohana.

3 Alani asi ni roha ni Debata na mansai balga na nilehonna tu ahu, hupaboa ma tu hamu sude: Unang ma didok rohamuna tumimbo dirimuna. Alai marbisuk ma hamu, hombar tu haporseaon na nilehon ni Debata tu hamu ganup marsada-sada. 4 Ai sada do pamatang i alai godang do ruasna, jala marasing-asing be do ulaonna. 5 Songon i ma nang hita, nang pe godang hita alai marsada do hita di bagasan Kristus. Jala sude do angka ruas ni pamatang i masiurupan. 6 Alani asi ni roha ni Debata na mansai balga i, dilehon do tu hita marragam silehon-lehon.* Alani i, molo tadapot do silehon-lehon laho manurirangi, manurirangi ma hita hombar tu haporseaon naung dilehon tu hita. 7 Molo tadapot do gogo laho mangurupi, tongtong ma hita mangurupi. Molo tadapot do silehon-lehon laho mangajari, tongtong ma hita mangajari. 8 Molo mandapot silehon-lehon laho mamodai,* tongtong ma mamodai. Molo mandapot silehon-lehon laho mangalehon, tongtong ma mangalehon sian las ni rohana. Molo mandapot silehon-lehon laho manguluhon, ringgas ma mangulahon i. Molo mandapot silehon-lehon laho marasi ni roha, tongtong ma marlas ni roha mangulahon i.

9 Masihaholongan ma hamu sian nasa roha, hasogohon hamu ma na jahat, jala haholongi* hamu ma na denggan. 10 Haholongi hamu ma na asing songon mangkaholongi haha anggimuna. Jala parjolo ma hamu pasangaphon halak na asing. 11 Ringgas ma hamu, unang malas, loas ma tondi parbadia mambahen hiras rohamuna,* jala gabe hatoban ni Jahowa ma hamu. 12 Marlas ni roha ma di bagasan pangkirimon. Sabar ma tingki marsitaonon. Tongtong ma martangiang. 13 Lehon ma angka na porlu tu angka na badia. Jala burju ma hamu manjalo angka dongan na asing. 14 Tongtong ma pangido hamu asa dipasu-pasu Debata halak na mambahen na hansit tu hamu. Jala unang ma burai hamu nasida. 15 Marlas ni roha ma hamu dohot halak na marlas ni roha, jala tangis ma hamu dohot halak na tangis. 16 Sarihon hamu ma halak na asing dos songon hamu manarihon dirimuna. Unang ma ginjang rohamuna. Alai marserep ni roha ma hamu jala unang ma didok rohamuna naung marbisuk hamu.

17 Unang ma baloshon na jahat alo ni na jahat tu manang ise pe. Alai marsitutu ma hamu mambahen na denggan tu sude jolma.* 18 Molo boi dope, sian nasa na tarbahenmuna mardame ma hamu tu sude halak. 19 Ale angka dongan, unang ma baloshon hamu sogo ni rohamuna. Alai pasombu ma Debata patuduhon rimasna tu halak na mangulahon na jahat. Ai tarsurat do “‘Ahu do na marhak mambalos. Baloshononku do hajahaton ni nasida,’ ninna Jahowa.” 20 Alai “molo male musum, lehon ma ibana mangan, molo mauas, lehon ma ibana minum. Molo dibahen ho songon i, gabe salpu ma murukna”.* 21 Unang ma olo ho ditaluhon hajahaton, alai tongtong ma taluhon hajahaton i marhite na denggan.