Pangungkapon

1 On ma pangungkapon sian Jesus Kristus, na nilehon ni Debata tu ibana laho patuduhon tu angka naposona angka na laho masa satongkin nai. Disuru Jesus do suru-suruanna paboahon i tu si Johannes naposo ni Debata. 2 Dipaboa si Johannes do sude na niidana, i ma taringot tu hata na nilehon ni Debata dohot na pinaboa ni Jesus Kristus. 3 Marlas ni roha ma halak na manjaha surirang on dohot soara na gogo. Jala marlas ni roha ma halak na manangihon dohot na mangoloi angka na tarsurat di surirang on. Ai nunga jonok tingki naung ditontuhon i.

4 Sian si Johannes tu pitu huria na adong di propinsi Asia:

Sai didongani asi ni roha na mansai balga dohot hadameon ma hamu, na sian “Debata naung adong hian, na adong nuaeng, dohot na naeng ro” dohot sian pitu tondi parbadia na adong di jolo ni habangsana. 5 Dohot sian Jesus Kristus, “Saksi Haposan” na parjolo hehe sian angka na mate jala “Na marhuaso tu angka raja na di tano on”.

Dihaholongi ibana do hita jala dipalua sian angka dosanta marhite mudarna. 6 Dibahen ibana do hita gabe raja dohot malim laho marhobas tu Amana, i ma Debatanta. Di ibana ma hasangapon dohot hagogoon saleleng ni lelengna. Amen.

7 Ida ma! Ro do ibana marhite ombun. Sude ma halak mangida ibana, dohot nang angka na manullang ibana. Sude ma bangso na di tano on mangandungi alani ibana. I ma tutu. Amen.

8 “Ahu do Alpa dohot Omega,”* ninna Debata Jahowa, “naung adong hian, na adong nuaeng, dohot na naeng ro, Debata na Sun Hinagogo.”

9 Ahu si Johannes, haha anggimuna, donganmuna rap mamarenta, donganmuna sapartinaonan jala donganmuna rap martahan ala mangihuthon Jesus. Na tarbuang do ahu di pulo Patmos ala hubaritahon taringot tu Debata dohot taringot tu Jesus. 10 Marhite panogu-noguon ni tondi parbadia, diboan ma ahu tu ari ni Tuan i. Hubege ma di pudingku soara na gogo na songon soara ni tarompet, 11 na mandok, “Surathon ma na niidam di sada gulungan jala tongoshon ma i tu pitu huria, i ma huria na di Epesus, Smirna, Pergamos, Tiatira, Sardes, Piladelpia, dohot na di Laodikea.”

12 Huida ma tu pudi laho mamereng ise na mangkatai tu ahu. Gabe huida ma pitu inganan ni lampu na sian mas. 13 Jala di tonga-tonga ni inganan ni lampu i adong ma na songon anak ni jolma. Dipangke ibana do baju na ganjang sahat tu patna jala lilit do di andorana ikat pinggang na sian mas. 14 Asing ni i, obukna mansai bontar songon salju jala matana songon api na marnala-nala. 15 Patna songon tombaga na marhillong di bagasan api na marsigorgor jala soarana songon soara ni aek na marhasak.* 16 Di tangan siamunna adong do pitu bintang jala sian pamanganna kaluar do podang sidua baba na ganjang jala na tajom. Bohina songon mata ni ari na marsinondang. 17 Dung huida ibana, tungkap ma ahu tu patna songon jolma na mate.

Diampehon ibana ma tangan siamunna tu ahu, jala ninna ma: “Unang ho mabiar! Ahu do na Parjolo dohot na Parpudi, 18 jala ahu do ibana na mangolu i. Hea do ahu mate alai ida ma! Mangolu do ahu nuaeng sahat tu saleleng ni lelengna. Di ahu do kunci ni hamatean dohot kunci ni Kuburan.* 19 Alani i surathon ma angka na niidami, angka na masa saonari dohot angka na laho masa muse. 20 Pitu bintang na niidam di tangan siamunku dohot pitu inganan ni lampu na sian mas, rahasia na badia* do i. Pitu bintang manggombarhon suru-suruan ni pitu huria, jala pitu inganan ni lampu manggombarhon pitu huria.