2 Korint

6 Ala dongan saulaon ni Debata do hami, hupangido hami ma tu hamu, unang ma marisuang bahen hamu asi ni roha ni Debata na mansai balga i naung jinalomuna. 2 Ai didok Debata do, “Hutangihon do hamu di ari parasirohaon i. Jala huurupi do hamu di ari haluaon i.” Ida ma! Saonari ma ari parasirohaon i. Jala saonari ma ari haluaon i.

3 Ndang olo hami mambahen halak tartuktuk di sude ulaonnami, asa unang adong halak na mandok na so denggan taringot tu ulaonnami marhobas tu Debata. 4 Alai, di sasudena hupatuduhon hami do molo hami parhobas ni Debata. Sabar do hami manaon marragam sitaonon, tingki marhahurangan dohot tingki susa. 5 Dipungkuli do hami, dipenjarahon, dipungkuli natorop, loja mula ulaon, jotjot ndang modom, jala jotjot ndang mangan. 6 Badia do parngoluonnami, huihuthon hami do hata ni Debata, sabar do hami jala burju. Hupatudu hami do holong sian ias ni roha jala ditogu-togu tondi parbadia ni Debata do hami. 7 Huhatahon hami do na sintong, mangasahon huaso ni Debata do hami, jala hutiop hami do sinjata di tangan siamun* dohot di tangan hambirangnami* na boi mangurupi hami mangulahon na sintong. 8 Dipasangap do hami jala dileai. Diinsahi do hami jala dipuji. Dibahen do hami songon panipu hape sintong do na huhatahon hami. 9 Dibahen do hami songon na so ditanda, hape ditanda do hami. Songon halak na naeng mate* do hami, hape mangolu dope. Nang pe diuhum, alai ndang mate hami. 10 Nang pe songon halak na marsak, alai marlas ni roha do hami. Nang pe songon na pogos, alai godang do halak mamora hubahen hami. Songon na so adong do manang aha di hami, alai sude do adong di hami.

11 Hamu ale angka dongan na di Korint, nunga tangkas hupaboa hami tu hamu jala mansai holong do rohanami* tu hamu. 12 Hulehon hami do rohanami tu hamu, alai hamu do na hurang mangalehon rohamuna tu hami. 13 Songon na mangkatai tu ianakhonku do hubahen tu hamu, songon i ma bahen hamu tu hami, haholongi hamu ma hami.*

14 Unang ma marsada* hamu dohot halak na so porsea. Ai aha ma pardomuan ni na sintong dohot na jahat? Jala aha ma pardomuan ni na tiur dohot na holom? 15 Ai aha ma pardomuan ni Kristus dohot Sibolis?* Jala aha ma pardomuan ni halak na porsea* dohot halak na so porsea? 16 Aha ma pardomuan ni bagas joro ni Debata dohot gana-ganaan? Ai hita do bagas joro ni Debata na mangolu i, songon na nidok ni Debata, “Maringanan ma ahu rap dohot nasida, jala di tonga-tonga ni nasida ma ahu maringanan. Ahu ma gabe Debata ni nasida jala nasida ma na gabe bangsongku.” 17 “‘Alani i, kaluar ma hamu sian tonga-tonga ni nasida jala padao hamu ma dirimuna sian nasida,’ ninna Jahowa, ‘unang be jama hamu na ramun’”, “‘dung i jaloonku ma hamu.’” 18 “‘Ahu ma gabe Amamuna jala hamu ma na gabe anak dohot borungku,’ ninna Jahowa Debata na Sun Hinagogo.”