Pangungkapon

11 Dung i dilehon ma tu ahu hau-hau na songon tungkot pangungkur jala didok ma tu ahu, “Hehe ma ho! Ukur ma bagas joro* ni Debata dohot langgatanna jala etong* ma angka halak na manomba Ibana disi. 2 Alai unang ma ukur alaman luarna, pasombu ma i. Ai nunga dipasahat i tu angka bangso jala dege-degean ni nasida ma kota na badia i saleleng 42 bulan. 3 Suruonku ma dua saksiku asa manurirangi saleleng 1.260 ari mamangke abit goni.” 4 Saksi na dua i do na digombarhon ni dua hau jetun dohot dua lampu i. Jongjong do nasida di jolo ni Tuan ni tano on.

5 Molo adong musu na naeng manjahati, kaluar ma api sian pamangan ni nasida manutung musu ni nasida i. Molo adong na naeng manjahati nasida, ingkon songon i do ibana mate. 6 Marhuaso do nasida manutup langit asa unang ro udan saleleng manurirangi nasida. Marhuaso do nasida mambahen aek gabe mudar jala parohon angka jea tu tano on sadihari pe lomo roha nasida.

7 Dung sae nasida manurirangi, diporangi, ditaluhon jala dibunu binatang buas na kaluar sian lombang na mansai bagas i ma nasida. 8 Peak ma bangke ni nasida di dalan ni kota na balga i, i ma inganan ni Tuan ni nasida na diuhum mate di hau. Kota i ma na digombarhon ni Sodom dohot Mesir. 9 Dipabereng-bereng angka jolma na sian marragam marga, bahasa dohot bangso ma bangke i saleleng tolu satonga ari. Ndang diloas angka bangke i dikuburhon. 10 Marlas ni roha ma sude jolma na maringanan di tano on, marpesta ma nasida jala masileanan hadiah ala nunga mate panurirang na dua i. Ai dibahen nasida do na hansit tu angka jolma na di tano on marhite barita na pinaboa ni nasida.

11 Dung salpu tolu satonga ari, diombushon Debata ma hosa hangoluan tu panurirang na dua i. Mangolu jala jongjong ma nasida, gabe mabiar situtu ma angka halak na mangida i. 12 Dibege nasida ma soara na gogo sian banua ginjang na mandok, “Nangkok ma hamu tuson.” Dung i nangkok ma nasida tu banua ginjang di bagasan ombun jala diida angka musu ni nasida do i. 13 Di tingki i, masa ma gempa* na gogo. Sega ma saparsampulu ni kota i jala mate ma 7.000 halak. Gabe mabiar ma angka na tading i jala dipasangap nasida ma Debata na marhuaso di banua ginjang.

14 Nunga salpu jea na paduahon. Alai hatop nama ro jea na patoluhon.

15 Dipalu suru-suruan na papituhon ma tarompetna.* Dung i tarbege ma soara na gogo di banua ginjang mandok, “Harajaon ni tano on nunga gabe Harajaon ni Tuhanta* dohot Kristusna jala mamarenta ma Ibana gabe raja saleleng ni lelengna.”

16 Dung i marsinggang ma 24 sintua na hundul di habangsa ni nasida na di jolo ni Debata jala disomba ma Debata. 17 Didok nasida ma, “Ale Debata Jahowa na Sun Hinagogo, na adong nuaeng jala naung adong hian, mandok mauliate do hami tu Ho ala dipangke ho do huasom na balga i jala nunga mamarenta ho gabe raja. 18 Alai tarrimas ma sude bangso, gabe ro ma rimasmu. Dapot ma tingki naung ditontuhon laho manguhumi halak naung mate jala mangalehon upa tu angka naposom, i ma angka panurirang, angka na badia, dohot angka na mangkabiari goarmu, na lea nang na sangap. Jala ripashononmu ma halak na manegai tano on.”

19 Dung i tarbungka ma bagas joro* ni Debata na di banua ginjang, tarida ma poti parpadanan na di bagas joro i. Gabe ro ma angka hilap, angka soara, ronggur, gempa* dohot udan es.