Lukas

13 Di tingki i, adong ma manang na piga halak paboahon tu Jesus taringot tu halak Galilea naung pinamate ni si Latus tingki mangalehon pelean nasida. 2 Dialusi ibana ma nasida, “Na dirimpu hamu do gumodang dosa ni halak Galilea i sian dosa ni halak Galilea na asing ala songon i ditaon nasida? 3 Ndang songon i. Hudok ma tu hamu, molo ndang marhamubaon hamu, sude ma hamu mate songon nasida. 4 Manang, na dirimpu hamu do gumodang sala ni na 18 halak na mate ditipa menara di Siloam i sian sude halak di Jerusalem? 5 Ndang songon i. Hudok ma tu hamu, molo ndang marhamubaon hamu, sude ma hamu mate songon nasida.”

6 Dung i dipaboa ibana ma tudosan on, “Adong ma hau ara ni sahalak baoa di porlak anggurna, laho ma ibana mangalului parbue ni hau ara i alai ndang adong dapotna. 7 Didok ibana ma tu parkarejo porlakna i, ‘Nunga tolu taon ahu ro mangalului parbue ni hau ara on, alai laos so adong dapothu. Taba ma i! Aha ma guna ni i molo so marparbue?’ 8 Dialusi parkarejo porlak i ma, ‘Tuan, pasombu ma jolo sataon nai. Huhali pe humaliangna asa hubahen pupuk tusi. 9 Molo marparbue do hau i di ari na naeng ro, denggan ma i. Alai molo ndang, tabaon ma i.’”

10 Dung i mangajari ma Jesus di sada sinagoga* tingki ari Sabbat. 11 Disi adong sahalak borua naung marsahit saleleng 18 taon dibahen suru-suruan na jahat. Gabe bungkuk do dagingna jala ndang boi be tigor. 12 Tingki diida Jesus borua i, dijou ma ibana jala ninna ma, “Ale inang, malum ma sahitmi.” 13 Diampehon Jesus ma tanganna tu borua i, laos satongkin i tigor ma ibana jongjong jala dipuji ma Debata. 14 Gabe muruk ma pamimpin ni sinagoga i ala dipamalum Jesus halak di ari Sabbat. Didok ma tu natorop i, “Adong do onom ari di hamu laho mangulahon ulaonmuna. Alani i di ari i ma hamu ro asa dipamalum, unang di ari Sabbat.” 15 Alai ninna Tuan i ma tu ibana, “E halak na munafik, nda dipalua hamu do lombu manang halodemuna sian handangna di ari Sabbat jala diboan hamu laho mangalehon minum? 16 Tarlumobi ma borua on, boru ni si Abraham do ibana jala marsahit dibahen Sibolis saleleng 18 taon, laos so boi ma paluaon ibana di ari Sabbat sian na mamparhatoban ibana?” 17 Dung didok Jesus hatana i, gabe maila ma sude alona. Alai marlas ni roha ma natorop i ala na binahenna i.

18 Dung i didok ibana ma, “Songon dia do Harajaon ni Debata i, jala tu dia ma patudosonku i? 19 Tudos do i tu sada boni na gelleng* na binuat ni sasahalak jala disuan tu ladangna. Tubu ma i jala gabe hau, ro ma angka pidong na martonga-tonga langit tusi jala marasar di angka dangkana.”

20 Didok Jesus ma muse, “Tu dia ma patudosonku Harajaon ni Debata? 21 Dipatudos ma i tu ragi na binuat ni sahalak borua jala disampur ma tu sampulu kilo topung sahat tu na kambang adonan i.”

22 Laho ma Jesus sian kota tu kota jala sian huta tu huta mangajari. Dung i, ditorushon ma pardalananna tu Jerusalem. 23 Adong ma sasahalak na mandok tu Jesus, “Tuan, ai holan saotik do na boi malua?” Didok Jesus ma tu nasida, 24 “Bahen ma nasa gogom laho masuk sian pintu na sompit i. Ai hudok ma tu hamu, godang do halak na naeng masuk tusi, alai ndang tarbahensa. 25 Tingki hehe nampunasa jabu jala dikunci pintu, jongjong ma hamu di luar jala tuktuhanmuna ma pintu i huhut mandok, ‘Tuan, bungka ma jo.’ Alai alusanna ma hamu, ‘Ndang hutanda manang na ise hamu.’ 26 Dung i dohononmuna ma, ‘Mangan minum do hami rap dohot ho jala mangajari do ho di angka sirpang ni dalan di hutanami.’ 27 Alai alusanna ma hamu, ‘Ndang hutanda manang na ise hamu. Laho ma hamu sian lambungkon, hamu sude siula na jahat!’ 28 Disi ma hamu mangangguhi jala muruk situtu.* Idaonmuna ma si Abraham, si Isak, si Jakkob, dohot sude panurirang di Harajaon ni Debata, alai sampathononna ma hamu tu luar. 29 Marroan ma angka halak sian timur dohot barat, jala sian utara dohot selatan. Dung i rap mangan ma nasida di Harajaon ni Debata. 30 Adong do halak na parpudi gabe na parjolo jala adong do halak na parjolo gabe na parpudi.”

31 Di tingki i, ro ma deba sian halak Parise mandok tu ibana, “Kaluar jala laho ma ho sian on, ai naeng bunuon ni si Herodes do ho.” 32 Ninna Jesus ma tu nasida, “Laho ma hamu jala dok ma tu si serigala i, ‘Sadari on dohot marsogot, palaohon suru-suruan na jahat jala pamalumhon angka na marsahit do ahu, alai di ari patoluhon marujung ma ulaonki.’ 33 Alai ingkon laho do ahu sadari on, marsogot, dohot di ari na mangihut, ai na so tupa sahalak panurirang mate di luar ni Jerusalem. 34 Jerusalem, Jerusalem, dibunu ho do angka panurirang jala didangguri ho do halak na sinuru manopot ho. Nunga piga hali naeng hupapungu angka anakmu songon induk ni manuk na papunguhon angka anakna tu toru ni habongna, alai ndang olo hamu. 35 Ida ma! Tadingkonon nama jabumuna. Hudok ma tu hamu, ndang idaonmuna be ahu sahat tu na dohononmuna, ‘Dipasu-pasu ma ibana na ro marhite goar ni Jahowa!’”