Mateus

23 Dung i, didok Jesus ma tu natorop i dohot tu angka siseanna, 2 “Dihunduli siboto surat dohot halak Parise do hundulan ni si Musa. 3 Alani i, ulahon ma sude na nidok ni nasida, alai unang tiru pambahenanna. Ai holan mandok do nasida alai ndang diulahon. 4 Ditali nasida do boban na borat jala dibahen tu abara ni halak, hape nasida ndang olo mandaishon jari-jari ni nasida tusi. 5 Sude na niulahon ni nasida, diulahon asa diida halak. Ai dipabalga nasida do kotak na gelleng* na di pardompahan dohot na di tangan ni nasida. Dung i, dipaganjang nasida do rambu ni pangkean ni nasida. 6 Lomo do roha ni nasida hundul di inganan na sangap di parpestaan jala sai di jolo do nasida hundul di angka sinagoga.* 7 Lomo do roha ni nasida dipangkulingi di pasar jala dijou Guru. 8 Alai, unang ma dijou hamu guru, ala sada do Gurumuna jala na marhaha maranggi do hamu sude. 9 Jala, unang ma jou ama tu manang ise di tano on, ai sada do Amamuna, i ma na di banua ginjang i. 10 Unang ma olo hamu dijou pamimpin, ai holan sada do Pamimpinmuna, i ma Kristus i. 11 Alai halak na umbalga sian hamu, ingkon gabe parhobasmuna. 12 Ai patutoruon do manang ise na patimbo dirina, jala patimboon do manang ise na patutoru dirina.

13 “Marjea ma hamu siboto surat dohot halak Parise, halak na munafik! Ai ditutup hamu do dalan tu Harajaon banua ginjang i sian jolo ni jolma, hape hamu sandiri pe ndang masuk tusi. Jala diambati hamu do halak na mardalan tusi. 14 *——

15 “Marjea ma hamu siboto surat dohot halak Parise, halak na munafik! Ai ditaripari hamu do laut dohot darat laho mambahen sasahalak masuk tu agamamuna.* Hape ia dung masuk, gabe tu Gehena* do ibana dibahen hamu jala gabe umjahat dua hali lompit sian hamu.

16 “Marjea ma hamu panogu-nogu na mapitung, ai didok hamu do, ‘Molo marsumpa sasahalak marhite bagas joro, ndang adong guna ni i, alai molo marsumpa sasahalak marhite mas na adong di bagas joro, ingkon pasautonna do sumpana i.’ 17 Na oto do hamu jala na mapitung! Dia do na rumingkot, mas i do manang bagas joro na mambahen badia mas i? 18 Didok hamu do muse, ‘Molo marsumpa sasahalak marhite langgatan, ndang adong guna ni i. Alai molo marsumpa sasahalak marhite silehon-lehon na di atas ni langgatan i, ingkon pasautonna do sumpana i.’ 19 Na mapitung do hamu! Dia do na rumingkot, silehon-lehon i do manang langgatan na mambahen badia silehon-lehon i? 20 Sasintongna, molo marsumpa manang ise marhite langgatan, ndang holan marsumpa marhite langgatan i ibana, alai marhite sude na adong di atasna i do. 21 Jala, manang ise na marsumpa marhite bagas joro, ndang holan marsumpa marhite bagas joro, alai dohot do marhite Debata na maringanan di bagas joro i. 22 Jala manang ise na marsumpa marhite banua ginjang, ndang holan marsumpa marhite habangsa ni Debata ibana, alai dohot do marhite na hundul di habangsa i.

23 “Marjea ma hamu siboto surat dohot halak Parise, halak na munafik! Dilehon hamu do saparsampulu sian suan-suanan mint, adas dohot jintan na bontar,* alai ditadingkon hamu na rumingkot sian Patik, i ma hatigoran, asi ni roha dohot roha na marsihohot. Ringkot do mangalehon saparsampulu i, alai unang ma alani i gabe tading na asing. 24 Hamu angka panogu-nogu na mapitung, dipasisi hamu do agas alai dibondut hamu do unta!

25 “Marjea ma hamu siboto surat dohot halak Parise, halak na munafik! Ai dipaias hamu do mangkuk dohot piringmuna sian luar, alai kotor do di bagasan alani angka na binuatmuna marhite mangarampok dohot hahisapon. 26 Hamu halak Parise na mapitung, parjolo ma paias mangkuk dohot piringmuna sian bagasan asa ias dohot na di luar.

27 “Marjea ma hamu siboto surat dohot halak Parise, halak na munafik! Tudos do hamu tu kuburan na hinapuran, bagak di luar alai di bagasan gok holi-holi ni jolma dohot nasa na ramun. 28 Songon i ma nang hamu, sintong do hamu idaon sian luar. Alai di bagasan, panipu do hamu jala silaosi uhum.

29 “Marjea ma hamu siboto surat dohot halak Parise, halak na munafik! Dibahen hamu do kuburan ni angka panurirang jala dipabagak hamu do kuburan ni halak na mangulahon lomo ni roha ni Debata. 30 Jala didok hamu, ‘Autsura mangolu hami di tingki ni ompunami, ndang ihuthononnami nasida mangusehon mudar ni angka panurirang.’ 31 Laos hatamuna i do patuduhon na anak ni sibunu angka panurirang hamu. 32 Alani i, pasae hamu ma ulaon naung pinungka ni angka ompumuna.

33 “Hamu angka ulok, pinompar ni ulok na marbisa, songon dia ma hamu boi malua sian Gehena?* 34 Alani i, suruonku ma tu hamu angka panurirang, halak na marbisuk dohot angka guru.* Bunuon jala uhumonmuna ma deba sian nasida di hau, linsinganmuna di angka sinagogamuna* jala leleanmuna ma nasida sian kota tu kota. 35 Alani i, mangonai ma tu hamu mudar ni sude halak na mangulahon lomo ni roha ni Debata na use di tano on. Mulai sian mudar ni si Abel sahat tu mudar ni si Sakaria anak ni si Berekia, na pinamatemuna di holang-holang ni bagas joro dohot langgatan i. 36 Tutu do na hudok on tu hamu, mangonai do sudena i tu sundut on.

37 “Jerusalem, Jerusalem, dibunu ho do angka panurirang jala didangguri ho do halak na sinuru manopot ho. Nunga piga hali naeng hupapungu angka anakmu songon induk ni manuk na papunguhon angka anakna tu toru ni habongna, alai ndang olo hamu. 38 Alani i, tadingkonon nama jabumuna. 39 Hudok ma tu hamu, ndang idaonmuna be ahu sian saonari sahat tu na dohononmuna, ‘Dipasu-pasu ma ibana na ro marhite goar ni Jahowa!’”