Johannes

17 Dung sae didok Jesus angka i, diida ma dompak ginjang, ninna ma, “Ale Amang, nunga jumpang tingkina. Pasangap ma anakmi asa dipasangap anakmi Ho. 2 Dilehon Ho do tu ibana huaso mangarajai sude jolma, asa boi lehononna hangoluan na saleleng ni lelengna tu sude jolma na nilehonmu tu ibana. 3 On do hangoluan na saleleng ni lelengna, ingkon tandaon ni nasida do Ho Debata na Sasada i, na sintong i dohot Jesus Kristus na sinurum. 4 Nunga hupasangap Ho di tano on jala nunga hupasae ulaon na pinasahatmi ulahononku. 5 Saonari pe ale Amang, lehon ma tu ahu hasangapon di lambungmi, songon hasangaponku tingki rap ahu dohot Ho andorang so adong dope portibi on.

6 “Nunga hupaboa goarmi tu angka jolma na nilehonmu tu ahu na sian portibi on. Ho do nampuna nasida jala nunga dipasahat Ho nasida tu ahu, jala nunga dioloi* nasida hatam. 7 Saonari nunga diboto nasida, sude na pinasahatmu tu ahu na sian Ho do i. 8 Ai nunga hupasahat tu nasida sude hata na nilehonmu tu ahu, jala nunga dijalo nasida i. Nunga tangkas diboto nasida na ro sian Ho do ahu jala nunga dihaporseai nasida na Ho do na marsuru ahu. 9 Hutangiangkon do nasida. Ndang portibi on hutangiangkon, alai angka na pinasahatmi do, ai Ho do nampuna nasida. 10 Sude ampunangku, ampunam do i jala ampunam, ampunangku do i. Jala nunga dipasangap ahu di tonga-tonga ni nasida.

11 “Na ro ma ahu tu Ho, tadingkononku nama portibi on, alai di portibi on do nasida. Ale Amang na badia, jaga ma nasida alani goarmu na nilehonmi tu ahu, asa gabe sada* nasida, songon Ho na sada* dohot ahu. 12 Tingki rap ahu dohot nasida, hujaga do nasida alani goarmu na nilehonmi tu ahu. Hujaga do nasida jala ndang adong na mago sian nasida, ia so holan halak na ingkon mago i hian, asa saut na tarsurat i. 13 Alai saonari, na ro ma ahu tu Ho. Huhatahon do on sude tingki di portibi on dope ahu, asa marlas ni roha situtu do nasida songon ahu. 14 Nunga hupaboa hatami tu nasida, alai dihasogohon portibi on do nasida. Ai ndang sian portibi on nasida, songon ahu na so sian portibi on.

15 “Ndang hupangido asa buatonmu nasida sian portibi on. Alai asa jagaonmu do nasida sian Sibolis.* 16 Ndang sian portibi on nasida, songon ahu na so sian portibi on. 17 Pabadia ma nasida marhite hasintongan. Hatami do hasintongan. 18 Husuru do nasida tu portibi on songon Ho na marsuru ahu tu portibi on. 19 Hupabadia do diringku alani nasida, asa nasida pe gabe badia marhite hasintongan.

20 “Ndang holan nasida hutangiangkon, alai dohot do angka na porsea tu ahu alani hata ni nasida. 21 Hutangiangkon do asa sada nasida sude, songon Ho Amang na marsada dohot ahu jala ahu marsada dohot Ho. Dung i, gabe marsada ma nasida dohot hita asa porsea portibi on na Ho do marsuru ahu. 22 Nunga hulehon hasangapon tu nasida, i ma hasangapon na nilehonmu tu ahu, asa gabe sada nasida songon Ho na sada dohot ahu. 23 Marsada do ahu dohot nasida, jala marsada do Ho dohot ahu, asa gabe sada situtu nasida. Alani i, botoon ni portibi on ma Ho do na marsuru ahu, jala dihaholongi Ho do nasida songon Ho na mangkaholongi ahu. 24 Ale Amang, dipangido rohangku do asa rap ahu dohot nasida na nilehonmu tu ahu manang didia pe ahu maringanan. Asa idaon ni nasida hasangapon na nilehonmu tu ahu, ai dihaholongi Ho do ahu andorang so adong dope portibi on.* 25 Ale Amang na tigor roha, nang pe ndang ditanda portibi on Ho, alai hutanda do Ho. Jala angka halak na nilehonmu tu ahu, diboto nasida do na Ho marsuru ahu. 26 Nunga hupaboa goarmu tu nasida jala tongtong dope paboaonku i. Alani i, adong ma holong ni roha di nasida songon holong ni rohami tu ahu asa marsada ahu dohot nasida.”