Ulaon ni Apostel

18 Dung i borhat ma si Paulus sian Atena jala laho ma ibana tu Korint. 2 Pajumpang ma ibana disi dohot halak Jahudi na margoar si Akuila na tubu di Pontus. Baru ro do ibana dohot si Priskilla tunggane boruna sian Italia, ala nunga diparentahon Kesar Klaudius asa sude halak Jahudi manadingkon Rom. Alani i, didapothon si Paulus ma si Akuila dohot si Priskilla. 3 Tading ma ibana di jabu ni nasida jala rap karejo dohot nasida. Ai rap sibahen tenda do nasida. 4 Ganup ari Sabbat, marjamita* do si Paulus di sinagoga* jala marsitutu do ibana mambahen halak Jahudi dohot halak Junani asa porsea tu barita na pinaboana.

5 Dung ro si Silas dohot si Timoteus sian Makedonia, dipangke si Paulus ma sude tingkina laho mamaritahon hata ni Debata. Dipaboa jala dipatuduhon ibana do tu halak Jahudi na tutu Jesus i Kristus. 6 Ala sai dialo jala diinsahi nasida do si Paulus, dipaspashon ibana ma pangkeanna jala ninna ma tu nasida, “Manang na mahua hamu, hamu ma na martanggung jawab disi, ias do ahu sian mudarmuna. Mulai sian saonari laho nama ahu tu bangso na asing.” 7 Dung i kaluar ma ibana sian sinagoga* i, laho ma ibana tu jabu ni si Titius Justus sahalak sisomba Debata. Di lambung ni sinagoga* i do ibana marjabu. 8 Alai gabe porsea do si Krispus pamimpin ni sinagoga i tu Tuan i rap dohot sude donganna sajabu. Jala godang do halak Korint na mambege barita na uli i gabe porsea jala tardidi. 9 Di tingki borngin, mandapot parnidaan ma si Paulus, didok Tuan i ma tu ibana, “Unang mabiar ho, tongtong ma baritahon jala unang ma ho mandele, 10 sai na dongananku do ho, jala ndang tarbahen ni manang ise parohon jea tu ho, ai torop do halak di kota on na laho porsea tu ahu.” 11 Disi ma si Paulus tading saleleng sada satonga taon jala diajarhon ibana ma hata ni Debata tu nasida.

12 Dung gabe gubernur* si Gallio di Akaya, marsada ma halak Jahudi mangalo si Paulus jala diboan ma ibana tu jolo ni kursi panguhuman.* 13 Didok nasida ma, “Diela-ela ibana do angka jolma asa manomba Debata marhite dalan na maralo tu patik.” 14 Tingki naeng mangkatai si Paulus, didok si Gallio ma tu angka halak Jahudi i, “Hamu angka halak Jahudi! Molo diulahon ibana na sala manang na jahat, olo do ahu manangihon hamu. 15 Alai molo alani mamparsoalhon hata, angka goar dohot patikmuna do i, hamu sandiri ma na pasaehon i. Ndang olo ahu gabe hakim tu parsoalan sisongon i.” 16 Dung i disuru ibana ma natorop i laho sian kursi panguhuman* i. 17 Gabe sude ma nasida manangkup si Sostenes pamimpin ni sinagoga* i. Dipungkuli nasida ma ibana di jolo ni kursi panguhuman* i. Alai nang pe songon i ndang parduli si Gallio.

18 Dung manang na piga ari si Paulus tading disi, dipaboa ibana ma tu angka dongan na disi naeng borhat nama ibana. Markapal ma ibana rap dohot si Priskilla dohot si Akuila tu Siria. Di Kenkrea, digusting si Paulus ma obukna alani janji na binahenna tu Debata. 19 Dung sahat nasida di Epesus, ditadingkon si Paulus ma donganna na asing i. Laho ma ibana tu sinagoga* jala martukar pingkiran ma ibana dohot halak Jahudi. 20 Nang pe dipangido nasida asa umleleng si Paulus tading disi, alai ndang olo ibana. 21 Dipaboa ibana ma na naeng borhat nama ibana, ninna ma, “Molo lomo roha ni Jahowa, ro do ahu muse mandapothon hamu.” Dung i markapal ma ibana sian Epesus, 22 jala sahat ma di Kaesarea. Laho ma ibana tu Jerusalem, dijumpangi ibana ma satongkin angka dongan na di huria i. Sian i borhat ma ibana tu Antiokia.

23 Dung manang na sadia leleng si Paulus disi, borhat ma ibana jala laho tu angka kota na di Galatia dohot di Prigia. Dipatogu ibana ma sude sisean na adong disi.

24 Adong ma halak Jahudi na margoar si Apollos na tubu di Aleksanderia ro tu Epesus. Halak na malo mangkatai do ibana jala godang do diboto ibana taringot tu Surat na Badia i. 25 Nunga diajarhon tu ibana dalan ni Jahowa. Marhite pangurupion ni tondi parbadia, gabe marsigorgor ma pangkilalaanna marbarita. Tangkas do diajarhon ibana taringot tu Jesus, alai holan pandidion ni si Johannes dope diboto ibana. 26 Dung i mulai ma ibana marbarita di sinagoga* di bagasan habaranion. Tingki dibege si Priskilla dohot si Akuila pangajarionna i, ditogihon nasida ma ibana jala dipatorang nasida ma dalan ni Debata tu ibana asa lam tangkas pangantusionna. 27 Ala marsangkap si Apollos naeng laho tu Akaya, gabe dibahen angka dongan na di Epesus ma surat tu angka sisean na disi, asa denggan dijalo nasida ibana. Dung sahat ibana disi, godang do diurupi ibana angka na porsea alani asi ni roha ni Debata na mansai balga i. 28 Barani do ibana patuduhon di jolo ni natorop na sala do na niajarhon ni halak Jahudi. Dipatuduhon ibana do marhite Surat na Badia i, Jesus i do Kristus.