Markus

6 Dung i, borhat ma Jesus sian i jala mulak ma tu hutana. Dohot do angka siseanna mangihuthon ibana. 2 Tingki ari Sabbat, mangajari ma ibana di sinagoga.* Gabe longang ma natorop i mambege ibana mangajari, ninna ma, “Sian dia do dapotna angka i? Boasa dilehon habisuhon i tu ibana jala boi dibahen ibana angka tanda halongangan?* 3 Nda tukang hau i do ibana, anak ni si Maria, haha ni si Jakobus, si Josep, si Judas dohot si Simon? Nda dison do angka ibotona rap dohot hita?” Ujungna ndang olo nasida porsea tu ibana. 4 Ninna Jesus ma tu nasida, “Sai dipasangap do panurirang, alai ndang sangap ibana di hutana, di keluargana dohot di jabuna sandiri.” 5 Alani i, ndang adong tanda halongangan* dibahen ibana disi, asing ni mangampehon tanganna tu manang piga halak na marsahit jala pamalumhon nasida. 6 Tung longang do rohana ala ndang porsea nasida. Dung i, didalani ibana ma angka huta di humaliang ni luat i laho mangajari.

7 Dijou Jesus ma apostelna na 12 i jala dipaborhat ma nasida dua halak sadalanan. Dilehon ma tu nasida huaso palaohon angka suru-suruan na jahat. 8 Jala diparentahon do tu nasida, asa unang mamboan manang aha pe di pardalanan ia so holan tungkot. Ndang boanon ni nasida roti, inganan ni sipanganon dohot hepeng.* 9 Boi do mamangke sipatu alai unang pola mamboan baju ganti.* 10 Didok Jesus ma muse tu nasida, “Molo masuk hamu tu sada jabu, disi ma hamu sahat tu na borhat hamu sian inganan i. 11 Molo ndang dijalo manang ndang ditangihon hamu di sada inganan, kaluar ma hamu sian i. Paspashon ma orbuk sian patmuna gabe sipaingot di nasida.” 12 Dung i borhat ma angka sisean i. Dibaritahon nasida ma tu angka jolma asa muba, 13 dipalao nasida do godang suru-suruan na jahat jala torop do na marsahit dipamalum marhite mandaishon miak.

14 Ala nunga tarbarita goar ni Jesus, tarbege ma i tu Raja Herodes jala adong ma na mandok, “Nunga hehe si Johannes Pandidi sian na mate. I do alana boi dibahen ibana angka tanda halongangan i.”* 15 Alai adong na mandok, “Si Elia do ibana.” Na asing muse mandok, “Panurirang do ibana songon sahalak sian angka panurirang najolo.” 16 Dung dibege si Herodes taringot tusi, ninna ibana ma, “Si Johannes naung huponggol i uluna, ibana do i dipahehe.” 17 Ai si Herodes do marsuru halak laho manangkup si Johannes jala mamenjarahon ibana ala binuatna si Herodias, i ma tunggane boru ni hahana si Pilippus. 18 Ai sai didok si Johannes do tu si Herodes, “Mangihuthon patik, ndang boi buatonmu tunggane boru ni haham.” 19 Alani i, sogo ma roha ni si Herodias tu si Johannes, naeng bunuonna ma ibana alai ndang tarbahenna. 20 Ai mabiar do si Herodes marnida si Johannes, diboto ibana do si Johannes i halak na mangulahon na sintong jala na badia. Alani i, sai diondingi si Herodes do ibana. Ganup ditangihon si Herodes hata ni si Johannes, ndang diboto be aha sibahenonna, ai lomo do rohana mambege hata ni si Johannes.

21 Alai, dapot do tingki na denggan di si Herodias pasauthon sangkapna, i ma tingki pesta ari hatutubu ni si Herodes. Dijou do tu pesta i angka parpangkat na timbo, angka komandan militer dohot halak na sangap di luat Galilea. 22 Dung i, masuk ma boru ni si Herodias manortor di pesta i, gabe las ma roha ni si Herodes dohot roha ni halak na rap mangan dohot ibana. Ninna raja i ma tu borua i, “Pangido ma sian ahu manang aha lomo ni roham, sai na lehononku do i tu ho.” 23 Marsumpa ma si Herodes tu borua i, “Manang aha pe na pinangidom, lehononku do i tu ho, agia pe satonga ni harajaonkon.” 24 Dung i, laho ma ibana manungkun inana, ninna ma, “Aha do pangidoonku?” Didok ma, “Ulu ni si Johannes Pandidi.” 25 Hatop ma ibana mulak tu raja i jala didok ma pangidoanna, “Lehon ma tu ahu saonari ulu ni si Johannes Pandidi di atas ni talam.” 26 Marsak situtu ma raja i, alai ndang tarjua ibana pangidoan ni borua i alani sumpana dohot alani angka tamuna. 27 Pintor disuru raja i ma sahalak pengawal, diparentahon ma tu ibana asa diboan ulu ni si Johannes. Dung i diponggol pengawal ma ulu ni si Johannes di penjara. 28 Diboan ma di atas ni talam, dilehon ma i tu borua i jala dilehon ma muse tu inana. 29 Dung dibege angka sisean ni si Johannes na masa, ro ma nasida, dibuat ma bangkena i jala dikubur ma.

30 Marpungu ma muse angka apostel i jala dipaboa nasida ma tu Jesus sude naung diulahon dohot na niajarhon ni nasida. 31 Dung i, didok Jesus ma tu nasida, “Laho ma hita tu inganan na lungun asa boi hita maradi satongkin.” Ai torop do halak marlaho ro, gabe so sanga be Jesus dohot angka siseanna mangan. 32 Laho ma nasida marparau tu inganan na lungun asa pulik sian natorop i. 33 Alai adong do na marnida jala na mamboto na laho borhat nasida, gabe marlojongi ma halak sian sude kota tu inganan i jala parjolo do natorop i sahat disi. 34 Dung kaluar Jesus sian parau, diida ma mansai torop halak disi. Gabe asi ma rohana, ai songon biru-biru na so adong parmahanna do nasida. Dung i, godang ma diajarhon ibana tu natorop i.

35 Dung botari, ro ma angka siseanna jala ninna ma, “Mansai lungun do inganan on jala nunga botari. Suru ma mulak nasida asa laho tu angka huta na di humaliang manuhor sipanganon di nasida. 36 Suru ma nasida laho, asa boi nasida manuhor sipanganon tu angka huta na di humaliang.” 37 Didok Jesus ma tu nasida, “Lehon hamu ma nasida mangan.” Gabe didok nasida ma tu ibana, “Ingkon tuhoronnami ma roti sahat tu 200 dinar* laho allangon ni nasida?” 38 Ninna Jesus ma tu nasida, “Ida hamu ma jolo sadia godang do roti na adong di hamu!” Dung dipareso nasida, ninna ma, “Adong lima roti dohot dua dengke.” 39 Disuru Jesus ma natorop i asa hundul sasapunguan di duhut-duhut. 40 Dung i hundul ma nasida, adong na 100 halak jala adong na 50 halak sapunguan. 41 Dibuat Jesus ma roti na lima i dohot dengke na dua i, diida ma tu langit jala ditangiangkon* ma. Dung i, diponggoli ma roti i jala dilehon ma tu angka siseanna asa dibagihon tu natorop i. Laos songon i do dengke na dua i, dibagihon do tu nasida sude. 42 Mangan ma nasida sude jala butong. 43 Dung i dipapungu nasida ma lobi-lobi ni roti i, gok 12 karanjang ndang dope dengke. 44 Adong do 5.000 baoa na mangallang roti i.

45 Dung i, hatop ma disuru Jesus angka siseanna asa parjolo laho marparau tu bariba mamolus sian Betsaida. Laos disuru Jesus ma mulak natorop i. 46 Dung laho natorop i, nangkok ma Jesus tu dolok martangiang. 47 Dung borngin, sahat ma parau i tu tonga-tonga ni laut, alai di darat dope Jesus sahalakna. 48 Mandapothon manogot,* diida Jesus ma mansai loja siseanna mangalugai parau i ala mangalo alogo do nasida. Ro ma ibana mandapothon nasida mardalan di atas ni aek, alai songon naeng bolusonna ma nasida. 49 Tingki diida nasida mardalan ibana di atas ni aek, didok nasida ma, “Aha do i!”* Gabe marsuraki ma nasida. 50 Ai tarsonggot do nasida sude marnida ibana. Alai, didok Jesus ma tu nasida, “Pos ma rohamuna! Ahu do on, unang mabiar hamu.” 51 Dung i nangkok ma Jesus tu parau i jala so ma alogo i. Longang ma angka siseanna, 52 hape ndang diantusi nasida dope lapatan ni angka roti i jala maol do i diantusi nasida.

53 Dung taripar tu bariba, sahat ma nasida di Genesaret jala disi ma nasida marlabu. 54 Disi kaluar nasida sian parau, pintor ditanda angka jolma i do Jesus. 55 Marlojongi ma angka jolma i tu sude luat jala dipamboan ma tu Jesus angka na marsahit di atas ni tandu. 56 Manang tudia pe Jesus laho, tu angka huta, dohot tu angka kota, dipamboan halak do angka na marsahit tu pasar jala dielek-elek nasida ma Jesus asa boi dijama nasida rambu ni abit luarna. Gabe malum ma sude na manjama i.