Judas

1 Ahu si Judas, naposo ni Jesus Kristus, anggi ni si Jakobus. Ahu manurat tu angka halak na tarpillit na hinaholongan ni Debata, Ama i, jala na diramoti ala marsada dohot Jesus Kristus.

2 Anggiat ma ditambai Debata asi ni roha, dame, dohot holong di hamu.

3 Hamu angka dongan na huhaholongi, nunga marsitutu ahu manurat taringot tu haluaon naung tadapot i. Alai ringkot do huhilala manurathon on, laho manjujui hamu mampartahanhon haporseaon sian nasa gogomuna, i ma haporseaon na dilehon sahali ro di saleleng ni lelengna tu angka halak na badia. 4 Ai adong do angka halak na sipsip masuk tu tonga-tongamuna. Nasida ma naung leleng ditontuhon di Surat na Badia laho diuhum. Ndang dipasangap nasida Debata, ai dipangke nasida do asi ni roha ni Debata na mansai balga i laho mangulahon ulaon ni halak na so umboto ila.* Jala ndang marsihohot nasida tu Jesus Kristus, Tuan dohot nampunasa hita.

5 Tangkas do nian diboto hamu sudena on, alai hupaingot ma hamu muse. Nang pe naung dipalua Jahowa bangsona sian tano Mesir, alai diripashon do na so marhaporseaon. 6 Nang angka suru-suruan na so hot di surgo, na manadingkon inganan ni nasida hian. Dirante do nasida di haholomon situtu salelengna paima ro ari paruhuman na balga i. 7 Songon i do nang Sodom dohot Gumora ro di angka kota di humaliangna, sai diulahon nasida do seks na so patut* jala sai diadu nasida do hisap-hisap ni daging na so somal. Diuhum do nasida di api saleleng ni lelengna asa gabe sipasingot i tu hita.

8 Suang songon i, diihuthon nasida do angan-angan ni nasida, diramuni do dagingna, leas do roha ni nasida tu na marhuaso, jala dileai nasida do angka na mandapot hasangapon sian Debata. 9 Tingki marsalisi si Mikhael pamimpin ni suru-suruan i tu Sibolis taringot tu bangke ni si Musa, didok rohana ndang patut ibana manguhum Sibolis i marhite hata na mangaleai. Alai ninna do, “Jahowa ma na maminsang ho.” 10 Alai dileai nasida do sude na so niantusan ni nasida. Ai diihuthon nasida do pangantusion ni nasida songon binatang na so marroha na mangihuthon hasomalanna, alani i gabe sega ma nasida.

11 Marjea ma nasida, ala diihuthon nasida do dalan ni si Kain, jala alani upa marlojong do nasida mangihuthon ulaon ni si Bileam na sala. Gabe diripashon do nasida ala dialo nasida do na marhuaso marhite angka hata songon na binahen ni si Kora! 12 Songon batu karang na buni di toru ni aek do nasida tingki rap marpesta* hamu dohot nasida. Ai songon parmahan na so maila do nasida na holan manarihon butuhana sandiri. Songon ombun do nasida na niullus ni alogo na so parohon udan. Songon hau do nasida na so marparbue di tingkina, naung mate jala naung diumpat. 13 Ai songon galumbang ni laut do nasida na margumo-gumo mamboan hailaon ni nasida. Songon bintang na so hot di dalanna naung ditontuhon tu haholomon saleleng ni lelengna.

14 Si Henok i ma sundut papituhon sian si Adam. Disurirangkon ibana do taringot tu nasida, tingki didok, “Ida ma! Nunga ro Jahowa rap dohot marpulu ribu* suru-suruanna na badia 15 laho manguhumi sude jolma. Uhumonna ma angka jolma na so pasangaphon Debata alani pambahenan ni nasida na jahat dohot hata ni nasida na mangaleai Debata.”

16 Marungut-ungut do nasida taringot tu parngoluon ni nasida, diihuthon nasida do hisap-hisap ni nasida, marhata manggang, mamuji-muji halak laho mandapot laba.

17 Alai hamu angka dongan na hinaholongan, ingot ma hata ni angka apostel ni Tuan Jesus Kristus. 18 Didok nasida do tu hamu, “Di tingki parpudi, ro ma angka pangarehei na mangihuthon hisap-hisap ni nasida na jahat.” 19 Pamola-mola do nasida, jala mangihuthon hisap-hisap ni daging* ala ndang adong tondi parbadia di nasida. 20 Alai hamu angka dongan na hinaholongan, patogu hamu ma haporseaonmuna na badia i jala martangiang ma di bagasan panogu-noguon ni tondi parbadia, 21 asa tongtong hamu di bagasan holong ni roha ni Debata, huhut paimahon asi ni roha ni Tuanta Jesus Kristus na parohon hangoluan saleleng ni lelengna. 22 Tongtong ma patudu asi ni roha tu angka halak na ganggu rohana. 23 Tarik hamu ma nasida sian api asa malua nasida. Tongtong ma patuduhon asi ni roha tu na asing, alai jaga ma hamu, jala hasogohon hamu ma dosa na niulahon ni nasida.*

24 Debata do na manjaga hamu asa unang tartuktuk, jala tongtong ndang marsala, asa marlas ni roha hita di adopan ni hamuliaonna. 25 Sasada Ibana do Debata Sipalua hita marhite Jesus Kristus Tuanta i. Di Ibana ma hamuliaon, hasangapon, hagogoon, dohot huaso sian najolo, saonari sahat ro di saleleng ni lelengna. Amen.