2 Raja-Raja
19 Dung dibege Raja Hiskia na pinaboa ni nasida, diribak ibana ma bajuna. Dipakke ibana ma abit goni jala lao ma ibana tu jabu ni Jahowa.+ 2 Dung i disuru si Hiskia ma si Eliakim na mangurus istana, si Sebnah sekretaris i, dohot akka pamimpin ni malim manjuppangi Panurirang* Jesaya+ anak ni si Amos. Marabit goni do nasida manjuppangi ibana. 3 Didok nasida ma tu si Jesaya, “On ma na nidok ni si Hiskia, ‘Ari hasusaan do sadari on, disonggak* do hita, jala dipaila. Ai dos do hita songon ina na lao partus, na so margogo lao manubuhon hape nungnga dapot tikkina.+ 4 Alani i, tangiakkon+ ma akka na tinggal on. Sai anggiat ma dibege Jahowa Debatam hata ni Rabsake i. Ai disuru raja ni Asiria do ibana mangaleai Debata na mangolu i.+ Jala anggiat ma ibana dihukum alani akka hata na binege ni Jahowa Debatami.’”
5 Dung i borhat ma akka pejabat ni Raja Hiskia manjuppangi si Jesaya.+ 6 Didok si Jesaya ma tu nasida, “Dokkon ma songon on tu tuanmuna, ‘On ma na nidok ni Jahowa, “Unang ma mabiar ho+ alani akka hata na binegemi, i ma akka hata ni pejabat ni raja ni Asiria na mangaleai Au.+ 7 Bahenokku ma guga pikkiranna. Adong ma barita begeonna jala gabe mulak ma ibana tu hutana. Bahenokku ma ibana mate alani podang di hutana sandiri.”’”+
8 Dibege Rabsake i ma naung lao raja ni Asiria sian Lakis.+ Lao ma ibana manjuppangi raja ni Asiria. Tikki i marporang do raja ni Asiria mangalo kota Libna.+ 9 Dibege raja ni Asiria ma naung ro si Tirhaka raja ni Etiopia naeng mangalo ibana. Gabe disuru ibana ma muse akka halak+ manjuppangi si Hiskia. Didok ma, 10 “Songon on ma dokkon tu si Hiskia raja ni Juda, ‘Unang ma olo ho dioto-otoi Debata na dipangasahonmi, na mandok, “Dang na lao lehonokku Jerusalem tu tangan ni raja ni Asiria.”+ 11 Nungnga dibege ho naung ditaluhon akka raja ni Asiria sude luat.+ Dirippu ho, boi ho malua? 12 Nungnga godang bangso naung ditaluhon akka ompukku. Boi do debata ni nasida paluahon nasida? Didia ma saonari halak Gozan, halak Haran,+ halak Resep, dohot halak Eden na tinggal di Tel-asar? 13 Didia ma saonari raja ni Hamat dohot raja ni Arpad? Jala didia ma saonari raja ni akka kota na di Separwaim, di Hena, dohot di Iwa?’”+
14 Dibuat si Hiskia ma surat i sian akka halak na disuru raja ni Asiria i, jala dijaha ibana ma surat i. Dung i lao ma ibana tu jabu ni Jahowa jala dipahembang ma surat i di jolo ni Jahowa.+ 15 Martangiang ma si Hiskia+ di jolo ni Jahowa. Didok ibana ma, “Ale Jahowa Debata ni Israel, na hundul di tahta na di ginjang* ni akka kerubim.*+ Holan Ho do Debata na sittong, Debata ni saluhut harajaon na di tano on.+ Ho do na mambahen langit dohot tano on. 16 Parrohahon ma ale Jahowa jala tangihon ma!+ Parrohahon ma+ ale Jahowa jala ida ma! Tangihon ma hata ni si Sanherib na mangaleai Debata na mangolu i. 17 Ale Jahowa, huboto hami do nungnga dihancurhon akka raja ni Asiria be akka bangso dohot akka luat ni nasida.+ 18 Jala ditutung halak Asiria do akka debata ni bangso i. Ai dang tutu i Debata,+ sian batu dohot hau do i dibahen jolma.+ Alani i do boi dihancurhon nasida sudena i. 19 Alani i palua ma hami sian Asiria ale Jahowa Debatanami, asa sude harajaon na di tano on mamboto holan Ho do Debata na sittong, ale Jahowa.”+
20 Dung i, disuru si Jesaya anak ni si Amos ma halak mandok tu si Hiskia, “On ma na nidok ni Jahowa Debata ni Israel, ‘Nungnga hubege tangiangmu+ taringot tu si Sanherib raja ni Asiria.+ 21 Au, Jahowa, songon on ma dohonokku taringot tu ibana:
“Dileai jala direhei anak boru Sion do ho.
Mangupir do boru ni Jerusalem mangida ho.
22 Ise do na nialom jala ise do na nileaanmu?+
Tu ise do gogo soaram?+
Jala tu ise do leas pamerengmu?
Tu Au do i, Debata Nabadia ni Israel!+
23 Dileai ho do Jahowa+ marhite akka pejabatmu+ jala didok ho do,
‘Pakkeonku nama kareta porangku na massai godang i,
Nakkok nama au tu akka dolok na timbo,
Tu akka inganan na undao di Libanon.
Tabaokku ma akka hau ares na timbo dohot akka hau juniper na dumenggan na disi.
Ro nama au tu akka ingananna na undao sahat tu tonga-tonga ni tombakna.
24 Galiokku ma akka sumur jala inumokku ma aek na sian akka luat na asing.
Pakoringokku ma sude sunge* na di Mesir mamakke talapak ni pattu.’
25 Na so hea do dibege ho? Nungnga hutottuhon* i mulai sian najolo.+
Nungnga huparade* i sian najolo.+
Saonari pasautokku nama i.+
Bahenonmu ma gabe maruppak akka kota na marbenteng jala pasombuonmu ma hancur akka kota i.+
26 Gabe dang margogo be pangisi ni kota i.
Gabe mabiar jala dipaila ma nasida.
Ai doshon suan-suanan na di ladang ma nasida jala songon akka duhut-duhut,+
Songon duhut-duhut na tubu di ginjang ni atap na gabe koring alani alogo na mohop na sian timur.
27 Alai takkas do huboto sude na niulahonmu, tikki hundul ho, tikki lao ho, tikki ro ho,+
Dohot tikki muruk ho tu Au,+
28 Ai nungnga sahat be tu pinggolhu+ murukmi dohot soaram na mangamuk i.+
Alani i, bahenokku ma hait-hait tu igungmu dohot kokkang+ tu babami.
Jala boanokku ma ho mulak sian dalan haroroanmi.”+
29 “‘On ma na gabe tanda di ho Hiskia: Taon on, allangonmu ma hasil ni suan-suanan na tubu sandiri, jala songon i ma sahat tu taon na paduahon.+ Alai taon na patoluhon, manabur boni ma ho jala panenonmu ma i. Suanonmu ma hau anggur jala allangonmu ma parbuena.+ 30 Songon suan-suanan na marurat jala na marparbue ma halak Juda na malua dohot na tinggal dope.+ 31 Ai na lao kaluar do sian Jerusalem akka halak na mangolu dope. Jala kaluar do sian Dolok Sion akka halak na malua. Ai pasti ulahonon ni Jahowa Pamimpin ni Akka Tentara* do i.+
32 “‘On ma na nidok ni Jahowa taringot tu raja ni Asiria,+
“Dang na lao ro be ibana tu kota on+
Manang manembakkon anak panah tuson
Manang mamboan perisai tuson
Manang mambahen benteng lao makkaliangi kota on.+
33 Na lao mulak ma ibana sian dalan haroroanna.
Dang na lao ro ibana tu kota on,” ninna Jahowa.
35 Di borngin i ro ma suru-suruan ni Jahowa. Dipamate suru-suruan i ma 185.000 tentara na adong di perkemahan ni halak Asiria.+ Tikki dungo akka halak manogotna i, diida nasida ma marpeakan sude bakke i.+ 36 Gabe mulak ma si Sanherib raja ni Asiria tu Ninive+ jala disi ma ibana tinggal.+ 37 Di sada tikki lao ma si Sanherib tu inganan manomba Nisrok debatana. Tikki marsomba ibana disi, ro ma anakna si Adramelek dohot si Sareser mambunu ibana mamakke podang.+ Jala lari ma nasida tu luat Ararat.+ Dung i, anakna si Esar-haddon+ ma na gabe raja manggattihon ibana.