Pangungkapon
8 Tingki dibungka Anak ni Biru-biru i segel na papituhon, ndang adong soara tarbege di banua ginjang hira-hira satonga jom. 2 Huida ma pitu suru-suruan jongjong di jolo ni Debata, jala dilehon ma pitu tarompet tu nasida.
3 Dung i ro ma suru-suruan na asing na maniop inganan panutungan ni daupa na sian mas jala jongjong ma ibana di jolo ni langgatan i. Dilehon ma tu ibana godang daupa, asa ditutung daupa i di atas ni langgatan na sian mas na di jolo ni habangsa i tingki martangiang angka na badia i. 4 Rap nangkok ma timus ni daupa na di tangan ni suru-suruan i dohot tangiang ni angka na badia i tu jolo ni Debata. 5 Alai pintor dibuat suru-suruan i ma inganan ni daupa i, diisi ma tusi gara* na sian langgatan i, jala disampathon ma i tu tano on. Dung i ro ma ronggur, angka soara, hilap, dohot gempa.* 6 Mangarade ma pitu suru-suruan na maniop pitu tarompet i laho mamalu tarompet ni nasida.*
7 Dipalu suru-suruan na parjolo ma tarompetna,* gabe ro ma udan es, udan api na marcampur mudar turun tu tano on. Matutung ma sapartolu ni tano on, sapartolu ni angka hau dohot sapartolu ni suan-suanan na ijo.*
8 Dung i, dipalu suru-suruan na paduahon ma tarompetna.* Adong ma na songon dolok na balga na matutung disampathon tu laut, gabe mudar ma sapartolu ni laut i, 9 mate ma sapartolu ni angka na mangolu di laut i, jala sega ma sapartolu ni angka kapal.
10 Dung i, dipalu suru-suruan na patoluhon ma tarompetna.* Gabe madabu ma bintang na balga na songon api na marnala-nala sian banua ginjang tu angka mata mual dohot tu sapartolu ni angka sunge. 11 Goar ni bintang i, i ma Suan-suanan na Paet. Gabe paet ma sapartolu ni aek jala godang ma jolma na mate alani aek naung paet i.
12 Dung i, dipalu suru-suruan na paopathon ma tarompetna.* Gabe mangkolom ma sapartolu ni mata ni ari, sapartolu ni bulan, dohot sapartolu ni bintang. Ndang adong be hatiuron saleleng sapartolu ni arian dohot sapartolu ni borngin.
13 Dung i huida ma sada lali na habang di tonga-tonga ni langit jala hubege ma soarana gogo mandok, “Marjea, marjea, marjea ma halak na maringanan di tano on alani soara ni tarompet ni suru-suruan na tolu nai, na ingkon ombuson ni nasida dope!”