Panguhum
3 Adong do akka bangso na dipasombu Jahowa toktong maringanan di Kanaan. Marhite nasida, diuji ma halak Israel na so hea dope marporang mangalo halak Kanaan.+ 2 Dibahen pe songon i, asa boi do halak Israel na so hea dope marporang i marsiajar marporang. On ma akka bangso na toktong maringanan disi: 3 lima pamimpin ni halak Palistim,+ sude halak Kanaan, halak Sidon,+ dohot halak Hevi+ na maringanan di Libanon,+ mulai sian Dolok Baal-hermon sahat tu Lebo-hamat.*+ 4 Akka bangso i do dipakke lao manguji halak Israel. Marhite songon i, tarida ma na dioloi halak Israel do paretta ni Jahowa manang na dang. Paretta i do na dilehon tu akka ompu ni nasida marhite si Musa.+ 5 Alani i, rap tinggal ma halak Israel dohot halak Kanaan,+ halak Het, halak Amori, halak Perisi, halak Hevi, dohot halak Jebus. 6 Dibuat nasida do boru ni akka bangso i gabe istri ni nasida, jala dilehon do boru ni nasida tu akka anak ni bangso i. Jala disomba nasida ma akka debata ni bangso i.+
7 Dibahen halak Israel ma sogo roha ni Jahowa. Dihalupahon nasida do Jahowa Debata ni nasida. Disomba nasida do akka patung ni Baal+ dohot akka tiang sisombaon.*+ 8 Gabe muruk situtu ma Jahowa tu halak Israel. Dipasombu ma nasida ditaluhon* si Kusan-risataim raja ni Mesopotamia.* Gabe dioloi halak Israel ma si Kusan-risataim saleleng ualu taon. 9 Tikki dipangido halak Israel tu Jahowa asa diurupi nasida,+ dipillit Jahowa ma si Otniel+ paluahon nasida.+ Anak ni si Kenas, adek ni si Kaleb do si Otniel. 10 Dilehon Jahowa ma tondi parbadia tu si Otniel+ jala ibana ma na gabe panguhum ni halak Israel. Tikki marporang ibana mangalo si Kusan-risataim raja ni Mesopotamia* i, diurupi Jahowa do ibana. Gabe boi ma ditaluhon ibana si Kusan-risataim. 11 Alani i, dame ma ngolu ni halak Israel saleleng 40 taon. Dung i mate ma si Otniel, anak ni si Kenas i.
12 Dibahen halak Israel ma muse sogo roha ni Jahowa.+ Alani i, dipasombu Jahowa ma halak Israel ditaluhon Raja Eglon raja ni halak Moab.+ Ai dibahen nasida do sogo roha ni Jahowa. 13 Ditogihon Raja Eglon ma muse halak Ammon+ dohot halak Amalek+ mangalo halak Israel. Marporang ma nasida mangalo halak Israel jala ditaluhon ma kota hau palem.*+ 14 Gabe tunduk ma halak Israel tu Raja Eglon, raja ni halak Moab i saleleng 18 taon.+ 15 Dung i dipangido halak Israel ma asa diurupi Jahowa nasida.+ Alani i dipillit Jahowa ma si Ehud+ halak Benjamin+ i paluahon nasida.+ Anak ni si Gera do si Ehud jala kidal+ do ibana. Marhite ibana do dipasahat halak Israel pajak tu Raja Eglon, raja ni halak Moab i. 16 Dibahen si Ehud ma sada podang sidua baba, hira-hira 38 sentimeter* ma ganjangna. Diikkat ibana ma i di hae-haena sabola kanan jala ditutup ma i dohot bajuna. 17 Dung i lao ma si Ehud mangalehon pajak tu Raja Eglon, raja ni Moab i. Mokmok hian do Raja Eglon i.
18 Dung dipasahat si Ehud pajak i, lao ma ibana rap dohot akka halak na mamboan pajak i. 19 Alai dung sahat di inganan ni akka patung na di Gilgal,*+ mulak ma si Ehud sahalakna mandapotton raja i. Dung i didok ma, “Ale rajanami, adong sipaboaokku tu ho.” Didok raja i ma tu akka pegawaina, “Kaluar jo hamu.” Jadi kaluar ma nasida. 20 Didapotton si Ehud ma raja i, ai sahalakna do hundul di kamar parginjang marangin-angin. Didok si Ehud ma, “Adong na lao dipaboa Debata tu ho.” Dung i jongjong ma raja i. 21 Dibuat si Ehud ma podang na di hae-haena i mamakke tangan kirina. Jala ditikkam ma butuha ni raja i. 22 Masuk do sude podang i dohot gagangna tu butuha ni raja i. Dang ditarik si Ehud be podangna i, ai nungnga ditutupi tabo-tabo ni raja i podang i jala kaluar ma kotoranna. 23 Dikucci si Ehud ma sian bagasan akka pintu di inganan parginjang i, jala kaluar ma ibana sian teras* ni inganan i. 24 Dung lao si Ehud, ro ma akka pegawai ni raja i. Tarkucci do diida nasida akka pintu ni inganan i. Gabe didok nasida ma, “Na buang air* do ra ibana disi.” 25 Alai dung leleng dipaima nasida, jala dang marna bukka pintu i, gabe sukkun-sukkun ma roha ni nasida. Dibuat nasida ma kucci jala dibukka ma pintu i. Diida nasida ma nungnga mate raja i peak di lante.*
26 Saleleng na paimahon i akka pegawai ni raja i, nungnga sanga lari si Ehud. Dibolus ibana do inganan ni akka patung*+ jala selamat do ibana sahat di Seira. 27 Dung sahat ibana disi, diombus ibana ma tarompet*+ di huta na mardolok-dolok di Epraim.+ Turun ma halak Israel sian dolok i jala si Ehud ma na mamimpin nasida. 28 Dung i didok si Ehud ma tu nasida, “Ihutton hamu ma au. Ai nungnga dipasahat Jahowa musumuna halak Moab i tu tanganmuna.” Diihutton nasida ma ibana. Dung i, lao ma nasida tu Sunge Jordan jala dirajai nasida ma inganan ni halak Moab manaripar di sunge i. Alani i, dang adong nanggo sahalak pe halak Moab i na boi manaripar. 29 Hira-hira 10.000 ma halak Moab na dipamate nasida di tikki i.+ Dang adong nanggo sahalak pe sian nasida na boi lari. Sude nasida na mate i akka bawa na gogo jala na barani.+ 30 Di ari i, talu ma halak Moab dibahen halak Israel. Dame ma ngolu ni halak Israel saleleng 80 taon.+
31 Dukkon si Ehud, dipillit ma si Samgar+ anak ni si Anat paluahon halak Israel. Dipamate ibana do 600 halak Palistim+ mamakke tukkot ni parmahan.*+