Mateus

24 Dung ditadingkon Jesus bagas joro i, didapothon siseanna ma ibana jala dipatuduhon nasida ma tu ibana bagas joro i. 2 Didok Jesus ma tu nasida, “Diida hamu do sudena i? Tutu do na hudok on tu hamu, ndang na laho adong be muse dison nanggo sada batu na martindi na so dirumpakkon.”

3 Tingki hundul Jesus di Dolok Jetun, pulik ma didapothon angka siseanna ibana, ninna ma, “Paboa ma tu hami, andigan ma masa angka i jala dia ma tanda ni harorom* dohot tanda ni panutup ni jaman on?”*

4 Dialusi Jesus ma nasida, “Manat ma, so tung adong na mangaliluhon hamu. 5 Ai torop ma halak na ro mamangke goarhu, jala mandok, ‘Ahu do Kristus i,’ gabe godang ma liluhonon ni nasida. 6 Begeonmuna ma soara ni na marporang dohot barita taringot tu angka parporangan. Unang ma mabiar hamu, ai ingkon masa do angka i, alai ndang i dope ujungna.

7 “Marporang ma bangso tu bangso jala harajaon tu harajaon. Masa ma haraparon dohot gempa* di godang inganan. 8 Sasudena i, parmulaan ni hasusaan* i dope.

9 “Bahenon ni halak ma na hansit tu hamu jala bunuonna, sogo ma roha ni sude jolma tu hamu alani goarhu. 10 Torop ma halak na manadingkon haporseaonna, mangulahon na jahat tu donganna, jala masihosoman ma nasida. 11 Dung i, marroan ma godang panurirang na mangkatahon na so tutu* jala mangaliluhon torop jolma. 12 Ala lam godang hajahaton,* lam ngali ma holong ni torop jolma. 13 Alai, paluaonna do na manahan ro di ujungna. 14 Jala baritahononhon ma barita na uli taringot tu Harajaon i di liat portibi on,* asa saluhut bangso mambege barita i,* dung pe i asa ro ujungna.

15 “Molo diida hamu na ramun jala na parohon hasesega jongjong di inganan na badia i, songon naung pinaboa ni panurirang Daniel (manat ma diparrohahon angka panjaha), 16 ingkon lari do halak na di Judea tu dolok. 17 Unang ma turun halak na di atap* ni jabu laho mambuat barangna sian jabuna. 18 Jala unang ma mulak halak na di ladang laho mambuat abit luarna. 19 Marjea ma borua na mardenggan daging* jala na patarushon* poso-poso di tingki i! 20 Sai martangiang ma hamu asa unang masa i di ari ngali* manang di ari Sabbat. 21 Ai masa ma di tingki i hasusaan bolon na so hea dope masa sian mulai adong portibi on sahat tu saonari, jala ndang na laho masa be i muse. 22 Sasintongna, molo ndang diorui angka ari i, ndang adong na malua. Alai alani angka na tarpillit i, diorui ma angka ari i.

23 “Dung i, unang ma porsea hamu molo adong na mandok, ‘Dison do Kristus i,’ manang, ‘Disan do!’ 24 Ai marroan ma angka Kristus palsu dohot panurirang na mangkatahon na so tutu.* Bahenon ni nasida ma angka tanda halongangan* laho mangaliluhon, molo boi mangaliluhon angka na tarpillit i. 25 Ingot ma! Nunga hupaingot hian hamu. 26 Alani i, molo adong halak na mandok tu hamu, ‘Di padang pasir do ibana,’ unang laho hamu tusi. Manang molo didok, ‘Di inganan na buni do ibana,’ unang porsea hamu. 27 Ai songon hilap na mullop sian timur jala marsinondang sahat tu barat do haroro* ni Anak ni jolma i. 28 Ia disi adong bangke, tusi ma lali marpungu.

29 “Dung salpu hasusaan i, mangkolom ma mata ni ari jala ndang marsinondang be bulan. Mardabuan ma angka bintang sian langit jala humutur ma angka huaso ni langit. 30 Dung i tarida ma tanda ni Anak ni jolma i di langit, gabe mangangguhi* ma sude jolma* di tano on. Idaon ni nasida ma Anak ni jolma i ro di atas ni ombun di langit, mardongan huaso dohot hasangapon na mansai balga. 31 Jadi, suruonna ma angka suru-suruanna mamalu tarompet* na gogo jala papunguon ni nasida ma angka na tarpillit i sian opat suhi ni tano on, sian ujung ni langit na sada sahat tu ujung ni na sada nai.

32 “Buat ma parsiajaran sian tudosan taringot tu hau ara: Molo tubu dangka na baru jala marbulung, botoonmuna ma naung jonok ari logo. 33 Songon i ma, molo diida hamu sudena i, botoonmuna ma nunga naeng sahat* Anak ni jolma i. 34 Tutu do na hudok on tu hamu, ndang na laho salpu sundut* on so jolo masa i sude. 35 Laho salpu do langit dohot tano on, alai ndang na laho salpu hatangki.

36 “Taringot tu ari dohot jamna ndang adong na mamboto i, nang angka suru-suruan na di banua ginjang, nang anak i, holan Ama i do. 37 Ai songon na masa di tingki ni si Noak, songon i ma haroro* ni Anak ni jolma i. 38 Andorang so ro aek na sumar i, mangan minum do nasida, mangoli dohot marhamulian sahat tu na masuk si Noak tu bagasan parau i. 39 Ndang diparrohahon nasida na masa sahat tu na ro aek na sumar i mangaup nasida saluhutna, jala songon i ma haroro ni Anak ni jolma i. 40 Di tingki i, molo adong dua baoa di ladang, diboan ma na sada jala ditinggalhon ma na sada nai. 41 Molo adong dua borua na manggiling mamangke panggilingan tangan, diboan ma na sada jala ditinggalhon ma na sada nai. 42 Alani i, sai jaga ma hamu, ai ndang diboto hamu ari haroro ni Tuanmuna i.

43 “Pingkirhon ma on: Molo diboto parjabu do jam piga ro panangko, tontu dungo do ibana jala ndang pasombuonna jabuna dibongkar. 44 Alani i, ingkon rade do hamu, ai sian na so pamotoanmuna do ro Anak ni jolma i.

45 “Ise do sasintongna naposo haposan jala na marbisuk, na pinillit ni tuanna laho mangaradoti angka naposona na asing, na mangalehon nasida mangan di tingkina? 46 Marlas ni roha ma naposo na mangulahon songon i didapot tuanna di harorona i! 47 Tutu do na hudok on tu hamu, pilliton ni tuanna ma ibana mangaradoti sude artana.

48 “Alai, autsura didok naposo i di bagasan rohana, ‘Sundat do ro tuanki,’ 49 gabe dipungkuli ibana ma donganna naposo jala mangan minum ma ibana rap dohot angka parmabuk, 50 dung i, di ari na so panagamanna jala di tingki na so pamotoanna ro ma tuan ni naposo i. 51 Borat ma uhumon ni tuanna ibana jala bahenonna ma ibana tu inganan ni halak na munafik. Disi ma ibana mangangguhi jala muruk situtu.*