Ulaon ni Apostel

9 Alai sai tong dope diancam si Saulus angka sisean ni Tuan jala sai marsitutu do ibana naeng mambunu nasida. Alani i laho ma ibana tu sintua ni malim. 2 Dipangido ibana ma surat laho boanonna tu angka sinagoga* di Damaskus. Marhite i, molo adong jumpang ni ibana angka na mangihuthon Dalan ni Tuan i baoa manang borua, boi ma tangkuponna jala boanonna tu Jerusalem.

3 Dung jonok ibana tu Damaskus, tingki di pardalanan dope, tompu ma ro sinondang sian langit tu humaliangna. 4 Dabu ma ibana tu tano jala dibege ma soara na mandok, “Saulus, Saulus, boasa dibahen ho na hansit tu ahu?” 5 Disungkun si Saulus ma, “Ise do ho Tuan?” Dialusi ibana ma, “Jesus do ahu, na pinaporsuk-porsukmi. 6 Alai hehe ma ho jala laho ma ho tu kota i. Disi pe dipaboa na ingkon siulahononmu.” 7 Gabe tarhatotong ma dongan sapardalanan ni si Saulus i. Ai dibege nasida do soara i, alai ndang adong diida nasida manang ise. 8 Dung i jongjong ma si Saulus, tingki dibungka ibana matana ndang boi be diida manang aha. Ditogu-togu angka donganna i ma ibana jala diboan tu Damaskus. 9 Tolu ari ma ibana ndang boi marnida. Saleleng tolu ari i, ndang mangan jala ndang minum ibana.

10 Adong do di Damaskus sahalak sisean na margoar si Ananias. Marhite parnidaan, didok Tuan i ma tu ibana, “Ananias!” Dialusi ibana ma, “Dison do ahu Tuan.” 11 Ninna Tuan i ma tu ibana, “Hehe ma ho, laho ma ho tu jabu ni si Judas na di Dalan Lurus i. Lului ma disi na margoar si Saulus na sian Tarsus, ai martangiang do ibana saonari. 12 Jala marhite parnidaan, nunga diida ro sasahalak na margoar si Ananias laho mangampehon tanganna tu ibana asa boi marnida muse.” 13 Alai dialusi si Ananias ma, “Tuan, nunga godang na hubege taringot tu ibana dohot taringot tu hajahaton na binahenna tu angka na badiami di Jerusalem. 14 Jala dilehon malim kepala* do tu ibana huaso laho manangkup* sude na manjou goarmu di inganan on.” 15 Alai didok Tuan ma tu ibana, “Laho ma ho! Ai nunga hupillit ibana mamboan goarhu tu angka bangso, tu angka raja dohot tu halak Israel. 16 Ai tangkas ma patuduhononku tu ibana godang ni sitaononna alani goarhu.”

17 Laho ma si Ananias jala masuk ma ibana tu jabu i. Diampehon ma tanganna tu si Saulus, ninna ma, “Saulus, dongan, Tuan Jesus na niidam di pardalanan tingki ro ho tuson, ibana do na manuru ahu asa boi ho marnida muse jala asa digohi tondi parbadia ho.” 18 Laos satongkin i, madabu ma na songon sisik ni dengke sian matana, gabe boi ma ibana marnida muse. Hehe ma ibana dung i tardidi. 19 Mangan ma ibana, gabe mulak ma muse gogona.

Manang na piga ari nai, tading do ibana rap dohot angka sisean na adong di Damaskus. 20 Dung i pintor dibaritahon ibana ma di angka sinagoga,* na Anak ni Debata do Jesus i. 21 Alai gabe longang ma roha ni sude halak na manangihon ibana, ninna ma, “Ai ndang ibana na mambahen marsitaonon halak na manjou goar ni Jesus di Jerusalem? Ai nda na laho manangkup nasida do ibana umbahen na ro tuson asa boi boanonna tu malim kepala?”* 22 Alai lam balga ma huaso ni si Saulus jala boi do tangkas dipatuduhon ibana, Jesus i do Kristus. Gabe ndang taralusi halak Jahudi na maringanan di Damaskus be hatoranganna i.

23 Dung manang na piga ari, marpungu ma halak Jahudi mangalului dalan laho mambunu si Saulus. 24 Arian dohot borngin dijaga nasida ma harbangan laho mambunu ibana. Alai tarboto do sangkap ni nasida i tu si Saulus. 25 Tingki borngin, diboan angka sisean i ma ibana jala dipaturun sian tembok di bagasan karanjang.

26 Dung sahat di Jerusalem, lomo do roha ni si Saulus naeng mandapothon angka sisean i. Alai mabiar do sude sisean i tu ibana, ai ndang porsea nasida naung gabe sisean ni Jesus ibana. 27 Dung i, ro ma si Barnabas mangurupi si Saulus jala diboan ma ibana tu angka apostel i. Dipatorang si Barnabas ma tu nasida naung diida si Saulus Tuan i di pardalanan jala naung mangkatai Tuan i tu ibana. Laos dipatorang do muse taringot tu habaranion ni si Saulus mangkatai di bagasan goar ni Jesus di Damaskus. 28 Dung i gabe sai rap ma si Saulus dohot nasida. Diihuthon ibana ma angka apostel i tingki didalani nasida Jerusalem jala ndang mabiar ibana mangkatai di bagasan goar ni Tuan i. 29 Mangkatai jala marsoal ma ibana dohot angka halak Jahudi na marbahasa Junani. Alai gabe naeng dibunu nasida ma ibana. 30 Dung diboto angka dongan sahaporseaon taringot tu na masa i, diboan nasida ma ibana tu Kaesarea jala dipaborhat ma ibana tu Tarsus.

31 Manang na sadia leleng, lam dame jala lam togu ma sude huria di Judea, di Galilea, dohot di Samaria. Lam tamba ma godang ni sisean i, ai dihabiari nasida do Jahowa di parngoluon ni nasida jala diihuthon nasida do tudu-tudu ni tondi parbadia.

32 Tingki didalani si Petrus sude luat i, didapothon ibana do muse angka na badia na maringanan di Lidda. 33 Pajumpang ma ibana disi dohot sahalak baoa na lumpu na margoar si Eneas naung ualu taon peak di podoman. 34 Didok si Petrus ma tu ibana, “Ale Eneas, malum ma ho bahenon ni Jesus Kristus. Jongjong ma ho, padenggan ma podomanmi.” Satongkin i jongjong ma ibana. 35 Sude do na maringanan di Lidda dohot di Saron mangida ibana, alani i gabe porsea ma nasida tu Tuan i.

36 Di Joppe adong ma sahalak sisean na margoar si Tabita, molo diterjemahon lapatanna “Dorkas”.* Godang do angka na denggan diulahon ibana jala diurupi do angka na pogos. 37 Alai di tingki i, marsahit ma ibana laos mate. Dididi nasida ma bangkena jala dipeakkon ma di kamar parginjang. 38 Jonok do Lidda tu Joppe. Alani i tingki dibege angka sisean na di Joppe na di Lidda do si Petrus, disuru nasida ma dua halak sisean mandapothon ibana. Didok nasida ma tu si Petrus, “Hatop ma jolo ho ro tuson.” 39 Satongkin i, borhat ma si Petrus rap dohot nasida. Dung sahat, ditogihon nasida ma ibana tu kamar parginjang i. Sude ma angka ina na mabalu na disi mandapothon ibana huhut tumatangis, dipatuduhon nasida ma sude abit na binahen ni si Dorkas di nasida tingki mangolu dope ibana. 40 Disuru si Petrus ma kaluar nasida sude. Dung i marsinggang ma ibana huhut martangiang. Diida ibana ma dompak bangke i jala ninna ma, “O Tabita, hehe ma ho!” Dung i bungka ma matana, diida ma si Petrus jala hundul ma ibana. 41 Ditiop si Petrus ma tanganna, ditogu ma ibana asa jongjong. Dung i dijou si Petrus ma angka na badia dohot angka ina na mabalu i, laos dipatudu ma naung mulak mangolu si Dorkas. 42 Sar ma barita i tu sude luat di Joppe, gabe godang ma na porsea tu Tuan i. 43 Manang na piga ari nai, tading ma si Petrus di Joppe di jabu ni sahalak tukang kulit na margoar si Simon.