Ulaon ni Apostel

5 Adong ma sahalak baoa na margoar si Ananias rap dohot tunggane boruna si Sapira, digadis nasida ma tanona. 2 Alai ditabunihon ibana ma deba tuhor ni tanona i jala diboto tunggane boruna do i. Deba nai diboan jala dilehon ma i tu angka apostel. 3 Didok si Petrus ma tu ibana, “Ananias, boasa loasonmu Sibolis* mangela-ela ho, gabe gabusanmu tondi parbadia jala ditabunihon ho deba sian tuhor ni tanomi? 4 Ai andorang so digadis ho dope tano i, nda ho do nampunasa i? Jala dung digadis ho i, nda lomom do mamangke hepeng tuhorna i? Boasa tubu di roham mambahen sisongon i? Ndang jolma digabusi ho, alai Debata do.” 5 Dung dibege si Ananias hata i, tinggang ma ibana laos mate. Gabe mabiar situtu ma sude na mambege na masa i. 6 Dung i jongjong ma angka na poso, dibungkus ma ibana dohot abit, diboan ma tu luar, jala dikubur ma ibana.

7 Hira-hira tolu jom dungkon i, ro ma tunggane boruna alai ndang diboto dope na masa i. 8 Disungkun si Petrus ma ibana, “Paboa ma tu ahu, nasa on do digadis hamu tanomuna i?” Dialusi ibana ma, “I do, nasa i do.” 9 Alani i, ninna si Petrus ma tu ibana, “Boasa sahata ho dohot tunggane dolim laho mangunjuni tondi parbadia ni Jahowa? Angka na mananom tunggane dolim nunga di pintu i, jala boanon ni nasida ma dohot ho.” 10 Satongkin i, tinggang ma ibana tu pat ni si Petrus laos mate. Tingki masuk angka na poso i, diida nasida ma nunga mate ibana, diboan ma ibana tu luar, jala dikuburhon di lambung ni tunggane dolina i. 11 Gabe mabiar situtu ma sude huria i dohot sude halak na mambege na masa i.

12 Sai masa do angka tanda halongangan* dibahen angka apostel i di tonga-tonga ni angka jolma. Jala sai marpungu do nasida sude di Emper ni si Salomo. 13 Nang pe ndang adong halak na asing na barani parsidohot tu nasida, alai sai dipuji angka jolma do angka sisean i. 14 Dung i lam tamba ma godang ni angka na porsea tu Tuan i, angka baoa dohot angka borua. 15 Dipamboani dope angka na marsahit tu angka sirpang ni dalan jala dipeakkon do nasida di ginjang ni podoman, asa molo mamolus si Petrus, nanggo apala halinuna i hona tu deba sian nasida. 16 Jala torop do halak marroan sian angka kota di humaliang ni Jerusalem. Dipamboan nasida do angka na marsahit dohot angka na sinonggopan ni suru-suruan na jahat. Jala dipamalum do nasida sude.

17 Alai hehe ma sintua ni malim dohot sude na mangihuthon ibana sian sekte Saduse, ai mangiburu do roha nasida. 18 Ditangkup jala dipamasuk nasida ma angka apostel i tu penjara kota. 19 Alai di bornginna i, ro ma suru-suruan ni Jahowa mambungka pintu ni penjara i. Diboan ma nasida tu luar jala ninna ma, 20 “Laho ma hamu jala jongjong di bagas joro, tongtong ma paboa hamu sude hata taringot tu hangoluan on tu angka jolma.” 21 Mambege i, masuk ma nasida tu bagas joro tingki sogot dope ari jala mangajari ma nasida.

Dung sahat sintua ni malim dohot angka halak na rap dohot ibana, dijou ma Sanhedrin* dohot punguan ni angka pangituai ni halak Israel. Disuru nasida ma angka petugas tu penjara, asa diboan angka apostel i tu jolo ni nasida. 22 Alai dung sahat angka petugas i tu penjara, ndang disi be didapot nasida angka apostel i. Gabe mulak ma nasida paboahon, 23 ninna nasida ma, “Tarkunsi do pintu ni penjara i jala jongjong do disi angka panjaga. Alai tingki dibungka hami pintu i, ndang adong be manang ise di bagasan.” 24 Dung dibege kepala panjaga ni bagas joro dohot angka malim kepala* hatorangan i, gabe sungkun-sungkun ma roha nasida aha do na laho masa muse. 25 Alai ro ma sasahalak paboahon tu nasida, “Di bagas joro do halak na pinamasukmuna i tu penjara, jongjong mangajari angka halak.” 26 Dung i, laho ma kepala panjaga i rap dohot angka petugas manangkup nasida. Alai ndang pola dipaksa nasida angka apostel i, ala mabiar nasida didangguri natorop i.

27 Dung i diboan ma nasida jala dipajongjong tu jolo ni Sanhedrin.* Disungkuni sintua ni malim ma nasida, 28 dung i ninna ma, “Tangkas do huorai hami asa unang mangajari hamu marhite goar i, alai gabe digohi hamu do Jerusalem marhite pangajarionmuna. Jala naeng do salahononmuna hami alani hamamatena.”* 29 Alai didok si Petrus dohot angka apostel i ma mangalusi, “Rumingkot do di hami mangoloi Debata gabe parhuaso unang apala jolma. 30 Dibunu hamu do Jesus tingki digantung hamu ibana tu hau, alai nunga dipahehe Debata ni angka ompunta ibana. 31 Dipatimbo Debata do ibana tu siamunna gabe Pamimpin dohot Sipalua, asa marhamubaon halak Israel jala asa disesa dosa nasida. 32 Hami ma angka saksi taringot tu sudena i dohot tondi parbadia na nilehon ni Debata tu angka na mangoloi Ibana gabe parhuaso ni nasida.”

33 Dung dibege nasida i, mansai muruk ma nasida, gabe naeng ma bunuon ni nasida angka apostel i. 34 Alai jongjong ma di tonga-tonga ni Sanhedrin* i sahalak Parise na margoar si Gamaliel. Sahalak guru na mangajarhon Patik do ibana jala sangap do sude jolma tu ibana. Disuru ibana ma asa diboan satongkin angka apostel i tu luar. 35 Dung i ninna ibana ma tu nasida, “Hamu halak Israel, manat ma pingkirhon hamu andorang so dibahen hamu manang aha tu halak on. 36 Najolo hehe do si Teudas, dipatimbo do dirina jala adong do hira-hira 400 baoa mangihuthon ibana. Alai dibunu ma ibana, gabe marserak ma sude na mangihuthon ibana jala laos mago songon i. 37 Dungkon ibana, hehe ma muse si Judas halak Galilea tingki masa sensus penduduk jala torop do halak mangihuthon ibana. Alai ibana pe tong do mate gabe marserak ma sude na mangihuthon ibana. 38 Alani i marningot na masa saonari, on do sidohononku tu hamu, unang ma pola gugai hamu halak on alai pasombu hamu ma nasida. Ai molo sian jolma do ulaon ni nasida i, mago songon i do i. 39 Alai molo sian Debata do i, ndang tarbahen hamu mangago nasida. Gariada, boi do ra gabe Debata na nialomuna.” 40 Dioloi nasida ma na nidok ni si Gamaliel i. Dung i, dijou ma angka apostel i, dilinsingi,* diorai ma nasida mangkatai marhite goar ni Jesus jala dipalua ma nasida.

41 Dung i kaluar ma angka apostel i sian adopan ni Sanhedrin,* alai las do roha ni nasida ala diboto tama do nasida dileai alani goar i. 42 Ganup ari do nasida di bagas joro, jala tongtong do nasida sian jabu tu jabu mangajari dohot mamaritahon barita na uli taringot tu Kristus Jesus.