Pangungkapon

14 Dung i huida ma Anak ni Biru-biru i jongjong di Dolok Sion. Rap do ibana dohot 144.000 halak, jala tarsurat do goarna dohot goar ni Amana di pardompahan ni nasida. 2 Hubege ma soara sian banua ginjang. Soarana songon soara ni aek godang dohot soara ni ronggur na gogo. Jala soara na hubege i, songon soara ni angka parende na huhut mamangke harpa. 3 Marende ma nasida di jolo ni habangsa i, di jolo ni opat kerubim i, dohot di jolo ni angka sintua i. Songon ende na imbaru do ende ni nasida i. Holan na 144.000 halak na dituhor sian tano on do na boi mangendehon ende i. 4 Ndang hea nasida mangulahon seks na so patut* tu borua. Sasintongna, ias* do nasida. Sai diihuthon nasida do Anak ni Biru-biru i tudia pe ibana laho. Nunga dituhor nasida sian tonga-tonga ni jolma. Nasida ma na gabe parbue na parjolo* na dipelehon tu Debata dohot tu Anak ni Biru-biru i. 5 Ndang hea nasida margabus jala ndang adong hahurangan* ni nasida.

6 Dung i huida ma suru-suruan na asing habang di tonga-tonga ni langit. Dibaritahon ibana do barita na uli sisaleleng ni lelengna tu angka jolma na di tano on, tu saluhut bangso, marga dohot bahasa. 7 Gogo ma didok ibana, “Habiari hamu ma Debata jala pasangap ma Ibana, ai nunga dapot tingkina laho manguhumi. Somba hamu ma Ibana na manompa banua ginjang, tano on, laut dohot angka mata mual.”

8 Dung i mangihut ma muse suru-suruan na paduahon mandok, “Nunga rumpak, nunga rumpak Babel na Balga i! Dibahen ibana do sude bangso manginum anggurna, i ma giot-giot ni dagingna laho mangulahon seks na so patut.”*

9 Dung i mangihut ma muse suru-suruan na patoluhon, gogo ma didok, “Manang ise na manomba binatang buas i dohot patungna jala na manjalo tanda di pardompahanna manang di tanganna, 10 inumonna ma anggur ni Debata, i ma rimasna. On ma anggur na so marcampur na niusehon ni Debata tu mangkuk ni rimasna. Diuhum ma ibana marhite api dohot barerang di jolo ni angka suru-suruan na badia dohot di jolo ni Anak ni Biru-biru i. 11 Jala nangkok ma timus ni api panguhuman ni nasida saleleng ni lelengna. Manang ise na manomba binatang buas i dohot patungna, jala manang ise na manjalo tanda ni goarna, ndang marnaso panguhuman tu nasida arian nang borngin. 12 Alani i, ingkon martahan do angka na badia i, i ma angka halak na tongtong mangoloi parenta ni Debata jala na tongtong marhaporseaon tu Jesus.”

13 Hubege ma sada soara sian banua ginjang na mandok, “Surathon ma on: Mulai saonari, marlas ni roha ma halak na mate di bagasan Tuan i. Ai tutu do i didok marhite tondi parbadia, loas ma nasida maradi sian angka ulaon ni nasida, ai ndang lupa Debata tu ulaon ni nasida i.”

14 Huida ma ombun na bontar jala adong halak na hundul songon anak ni jolma di ginjang ni ombun i. Ibana mamangke mahkota na sian mas jala maniop sasabi na tajom.

15 Dung i kaluar ma suru-suruan na asing sian bagas joro* i. Gogo ma didok suru-suruan i tu ibana na hundul di ginjang ni ombun i, “Sabihon ma sasabimi! Nunga jumpang tingkina panen, ai nunga masak situtu sisabion na di tano on.” 16 Dung i disabihon na hundul i ma sasabina tu tano on jala disabi ma panenan na di tano on.

17 Kaluar ma muse suru-suruan na asing sian bagas joro na di banua ginjang jala dohot do ibana maniop sasabi na tajom.

18 Dung i kaluar ma suru-suruan na asing sian langgatan jala marhuaso do ibana tu api. Gogo ma didok ibana tu suru-suruan na maniop sasabi na tajom i, “Sabihon ma sasabim na tajom i jala papungu ma anggur na di tano on, ai nunga masak* parbuena.” 19 Disabihon suru-suruan i ma sasabina tu tano on jala dipapungu ma anggur na di tano on. Disampathon ma i tu inganan pamoroan ni anggur na balga na manggombarhon rimas ni Debata. 20 Didegei ma anggur i di luar kota. Kaluar ma mudar sian i hira-hira 296 kilometer* daona jala timbona sahat tu baba ni hoda.