2 Petrus
1 Sian si Simon Petrus, naposo jala apostel ni Jesus Kristus, mandapothon angka halak naung mandapot haporseaon na arga songon hami, marhite hatigoran ni Debata dohot hatigoran ni Jesus Kristus Sipalua hita:
2 Anggiat ma lam tamba asi ni roha ni Debata na mansai balga i dohot hadameon di hamu, ala nunga ditanda hamu Debata dohot Jesus Tuanta i. 3 Marhite huasona, dilehon Debata do sude na tahaporluhon asa boi tapangke ngolunta laho marsitutu manomba Ibana. Ai nunga tatanda Ibana na manjou hita marhite hamuliaonna dohot haburjuonna. 4 Marhite angka i dilehon Debata do tu hita angka janjina na balga situtu, asa parsidohot hita mandapot huaso na sian Debata, dung malua hita sian portibi naung sega binahen ni hisap-hisapna na sala i.
5 Alani i marsitutu ma hamu patuduhon haburjuon tamba ni haporseaonmuna, tamba ni haburjuon, parbinotoan. 6 Tamba ni parbinotoan, mangorom diri. Tamba ni mangorom diri, sabar. Tamba ni sabar, marsitutu manomba Debata. 7 Tamba ni marsitutu manomba Debata, holong tu dongan sahaporseaon. Tamba ni holong tu dongan sahaporseaon, holong tu sude jolma. 8 Molo adong di hamu angka i jala gok, gabe ringgas ma hamu, ulahononmuna ma tongtong na denggan mamangke parbinotoan na bagas taringot tu Tuan Jesus Kristus.
9 Molo ndang adong angka i di sasahalak, na mapitung do ibana. Ai ditutup ibana do matana sian na tiur jala lupa do ibana naung ias dibahen Debata angka dosana najolo i. 10 Ala nunga dijou jala dipillit Debata hamu, marsitutu ma hamu mampartahanhon i. Molo diulahon hamu i, ndang mago haporseaonmuna i. 11 Sasintongna, marhite i lehononna ma tu hamu hamuliaon masuk tu Harajaon na saleleng ni lelengna, i ma Harajaon ni Jesus Kristus Tuan jala Sipalua hita.
12 Alani i, naeng pasingotonku do hamu tongtong taringot tu sudena i, nang pe naung diboto hamu jala naung togu hamu di hasintongan naung jinalomuna. 13 Ai didok rohangku, ingkon pasingotonku do hamu saleleng di pardagingon* dope ahu. 14 Ndang sadia leleng nai, tadingkononku nama dagingkon songon naung tangkas dipaboa Tuanta Jesus Kristus. 15 Sai pasingotonku do hamu sian nasa gogongku. Asa boi ingotonmuna angka i dung laho ahu.
16 Ndang hata na so tutu na hupaboa hami tu hamu taringot tu huaso dohot haroro ni Tuanta Jesus Kristus. Alai hami sandiri do na mangida hasangaponna i. 17 Dijalo ibana do hasangapon dohot hamuliaon sian Debata Ama i, tingki didok Debata hata on di bagasan hamuliaonna, “On do Anakku, haholonganki, halomoan ni rohangku do ibana.” 18 Hubege hami do ro hata i sian banua ginjang, tingki rap hami dohot ibana di dolok na badia i.
19 Alani i, lam pos ma rohanami tu angka surirang. Denggan do molo diparrohahon hamu angka surirang i. Ai dos do i songon lampu na marsinondang di inganan na holom di bagasan rohamuna, paima binsar mata ni ari jala tarida bintang manogot-nogot. 20 Nunga diboto hamu sian mulana, ndang adong surirang di Surat na Badia i na ro sian pingkiran ni jolma. 21 Ai ndang hea surirang ro sian lomo ni roha ni jolma. Alai sian Debata do ro na nidok ni nasida marhite panogu-noguon ni tondi parbadia.