1 Korint

11 Tiru hamu ma ahu, songon ahu na maniru Kristus.

2 Hupuji do hamu, ala tongtong do diingot hamu ahu, jala diihuthon hamu do tudu-tudu na hupasahat tu hamu.* 3 Alai lomo do rohangku naeng botoonmuna, molo ulu ni ganup baoa i ma Kristus, ulu ni borua i ma baoa jala ulu ni Kristus i ma Debata. 4 Manang ise baoa na martangiang manang na manurirangi manutup simanjujungna, na mangaleai uluna do ibana disi. 5 Alai manang ise borua na martangiang jala na manurirangi, alai ndang ditutup simanjujungna,* na mangaleai uluna do ibana disi. Jala dos ma ibana songon sahalak borua naung dicukkur obukna. 6 Molo so dipangke sahalak borua tutup ni simanjujungna tumagon ma digusting obukna i. Alai molo maila do ibana digusting obukna i manang dicukkur, ingkon ditutup do simanjujungna.*

7 Ndang pola tutupon ni baoa simanjujungna. Ai suman ni Debata do baoa i jala dipatuduhon baoa i do hasangapon ni Debata. Alai anggo borua, hasangapon ni baoa do na pinatuduna. 8 Ai ndang ditompa Debata baoa sian borua, alai borua do ditompa Debata sian baoa. 9 Asing ni i, ndang ditompa Debata baoa alani borua, alai ditompa do borua alani baoa. 10 Jala alani angka suru-suruan, ingkon pangkeon ni borua do tutup ni simanjujungna tanda na unduk ibana tu tunggane dolina.

11 Alai di tonga-tonga ni siihuthon Tuan i, ringkot do borua di baoa jala ringkot do baoa di borua. 12 Ai ditompa do borua sian baoa, songon i ma, tubu do baoa sian borua alai Debata do na manompa nasa na adong. 13 Hamu sandiri ma na manontuhon: Denggan do sahalak borua martangiang tu Debata alai ndang dipangke tutup ni simanjujungna? 14 Nda sian mulai ditompa jolma i, nunga diajarhon na parohon lea do molo ganjang obuk ni baoa? 15 Alai molo ganjang obuk ni borua, hamuliaon do i di ibana. Ai dilehon do obuk na ganjang tu borua gabe tutup ni uluna. 16 Alai molo adong na naeng mangalo jala naeng mangihuthon hasomalan na asing, paboa ma tu ibana na so adong hasomalan na asing di hita dohot di huria ni Debata.

17 Tingki hulehon tudu-tudu on, ndang hupuji hamu. Ai ndang parohon na denggan parpunguanmuna i alai parohon na roa do. 18 Parjolo sahali na hubege, adong do parsalisian di tonga-tongamuna tingki marpungu hamu di huria. Ra sintong do na hubege i. 19 Ndang tarbahen so adong di tonga-tongamuna sekte-sekte. Alani i, tarida ma ise sian tonga-tongamuna na dihalomohon ni Debata.

20 Jala molo marpungu hamu, ndang na tutu songon na mangan di ulaon Borngin Parningotan ni Tuan i hamu. 21 Ai tingki na mangan i hamu di ulaon i, adong do deba sian hamu naung mangan hian. Adong ma sian hamu na male jala adong ma na mabuk. 22 Na so adong do jabumuna ingananmuna mangan dohot minum? Na mangaleai huria ni Debata do hamu jala naeng pailahon angka na pogos? Songon dia ma dohononku tu hamu? Pujionku do hamu disi? Ndang pujionku hamu disi.

23 Ai na hujalo sian Tuan i do na huajarhon tu hamu. Di borngin tingki dijehehon Tuan Jesus, dibuat ibana do roti, 24 dung didok ibana mauliate tu Debata, diponggoli ma i jala ninna ma, “On manggombarhon dagingku, na nilehon humongkop hamu. Tongtong ma ulahon on bahen parningotan di ahu.” 25 Songon i ma muse dibahen ibana tu panginuman i. Dung sae nasida mangan, ninna ma, “Panginuman on i ma padan na imbaru na hot marhite mudarhu. Ganup diinum hamu sian panginuman i, bahen hamu ma i gabe parningotan di ahu.” 26 Ai ganup diallang hamu roti i, jala diinum hamu anggur sian panginuman i, na mamaritahon hamamate ni Tuan i do hamu disi sahat tu na ro ibana.

27 Alani i, manang ise na mangallang roti dohot na minum anggur sian panginuman i, hape ndang tama ibana tusi, mardosa do ibana tu daging dohot tu mudar ni Tuan i. 28 Ingkon manat do paresoon ni sasahalak dirina andorang so diallang ibana roti manang andorang so diinum ibana anggur sian panginuman i. Asa diboto ibana naung tama manang ndang ibana mangulahon i. 29 Ai manang ise na mangallang roti manang na manginum anggur i, alai ndang jolo diantusi ibana aha na digombarhon ni daging ni Tuan i, na parohon panguhuman do ibana tu dirina. 30 Alani i do gabe godang sian hamu na gale, na marsahit, dohot na mate.* 31 Alai molo nunga manat tapareso dirinta, ndang hona uhum be hita. 32 Nang pe hona uhum hita, sipasingot sian Jahowa do i. Asa unang hona uhum hita rap dohot portibi on. 33 Alani i, hamu angka dongan, molo marpungu hamu laho mangan di Borngin Parningotan ni Tuan i, ingkon masipaimaan ma hamu. 34 Molo adong na male, mangan hian ma ibana sian jabu. Asa unang hona uhum hamu tingki na marpungu i. Alai taringot tu angka na asing, jolo ro pe ahu asa hupareso i.