Pangungkapon
3 “Surathon ma tu suru-suruan ni huria na di Sardes: On ma hata sian ibana nampuna pitu tondi parbadia dohot nampuna pitu bintang i: ‘Huboto do angka na niulam, mangolu do ho idaon, alai sasintongna mate do ho. 2 Jaga ma jala patogu ma angka na tading dope, na naeng mate. Ai huida ndang adong diulahon ho manang aha na pinangido ni Debata ulahononmu. 3 Alani i, tongtong ma ingot naung jinalom dohot naung binegem. Tongtong ma ulahon i jala muba ma ho. Molo ndang dungo ho, ro ma ahu songon panangko jala ndang botoonmu sadihari ahu ro mandapothon ho.
4 “‘Alai adong dope sian ho na di Sardes na so mangaramuni pangkeanna. Rap mardalan ma nasida dohot ahu, ai tama do nasida mangulahon i. 5 Manang ise na monang, pangkeonna ma abit na bontar. Ndang sesaonku goarna sian buku hangoluan. Alai dohononku do na hutanda ibana di jolo ni Damang dohot di jolo ni suru-suruanna. 6 Manang ise na marpinggol, ditangihon ma na nidok ni tondi parbadia tu angka huria.’
7 “Surathon ma tu suru-suruan ni huria na di Piladelpia: On ma na nidok ni ibana na badia i, na sintong i, na maniop kunci ni si Daud. Molo dung dibungka ibana pintu, ndang adong be na boi manutup i, alai molo dung ditutup ibana pintu, ndang adong be na boi mambungka i: 8 ‘Huboto do angka na niulam. Huboto do otik gogom, alai tongtong do dioloi ho hatangku jala ndang disoadahon ho goarhu. Ida ma! Nunga hubungka pintu di ho jala ndang adong na boi manutup i. 9 Ida ma! Halak na sian sinagoga* ni Sibolis na mandok dirina halak Jahudi hape ndang tutu, alai margabus do nasida, bahenonku ma nasida ro jala marsinggang* di jolom. Botoon ni nasida ma na huhaholongi do ho. 10 Ala nunga diihuthon ho hasabaronku, jagaonku ma ho tingki ro pangunjunan tu tano on. Ai masa do i laho manguji saluhut jolma. 11 Hatop nama ahu ro, tongtong ma tiop na di ho asa unang adong na mambuat mahkotami.*
12 “‘Manang ise na monang, bahenonku ma ibana gabe tiang di bagas joro ni Debatangku jala ndang adong na boi papindahon i sian i. Surathononku ma disi goar ni Debatangku dohot goar ni kota ni Debatangku, i ma Jerusalem na imbaru na turun sian banua ginjang sian Debatangku. Jala surathononku do muse disi goarhu na imbaru. 13 Manang ise na marpinggol, ditangihon ma na nidok ni tondi parbadia tu angka huria.’
14 “Surathon ma tu suru-suruan ni huria na di Laodikea: On ma hata sian si Amen, saksi haposan jala na sintong, mula ni na tinompa ni Debata: 15 ‘Huboto do angka na niulam. Huboto do na so haru ngali ho manang na so haru las. Lomo ni rohangku, ngali ma nian ho manang las. 16 Ala na so haru las manang na so haru ngali ho, utahononku ma ho. 17 Ai didok ho do, “Na mora do ahu, godang do artangku jala ndang porlu be di ahu manang aha.” Alai ndang diboto ho, na susa do ho, na dangol, na pogos, na mapitung jala ndang marpangkean. 18 Hujujui ma ho asa tuhoronmu sian ahu mas naung ias binahen ni api asa gabe mamora ho, tuhoronmu baju na bontar asa unang diida halak ho ndang marpangkean jala gabe maila, jala tuhoronmu ma ubat tu matam asa boi ho marnida.
19 “‘Hupinsang jala hupasingot do sude na huhaholongi. Alani i, muba ma ho jala somba ma Debata sian nasa roham. 20 Ida ma! Jongjong do ahu di jolo ni pintu jala manuktuhi. Manang ise na mambege soarangku jala dibungka pintu i, masuk ma ahu tu jabuna jala rap mangan ma ahu dohot ibana. 21 Manang ise na monang, loasonku ma ibana rap hundul dohot ahu di habangsangku, songon ahu naung monang jala rap hundul dohot Damang i di habangsana. 22 Manang ise na marpinggol, ditangihon ma na nidok ni tondi parbadia tu angka huria.’”