Markus

14 Dua ari nai nama Perayaan Paska dohot Perayaan Roti na So Marragi. Dilului angka malim kepala* dohot angka siboto surat ma dalan laho manangkup jala mambunu Jesus marhite sangkap na jahat. 2 Alai ninna nasida ma, “Unang ma tingki perayaan i, so tung gaor natorop i.”

3 Tingki mangan Jesus di Betania, di jabu ni si Simon na marsahit kusta i, ro ma sahalak borua mamboan botol pualam na marisi miak nardus na angur na mansai arga. Dibungka* ibana ma botol pualam i jala diusehon ma miak i tu ulu ni Jesus. 4 Marnida i, muruk ma manang na piga halak, ninna ma sama nasida, “Boasa dipambolongkon miak i! 5 Ai boi do gadison miak i lobi sian 300 dinar* jala tuhorna i boi lehonon tu na pogos!” Gabe dimuruki nasida ma borua i. 6 Alani i ninna Jesus ma, “Loas ma ibana. Boasa gugaanmuna ibana? Ulaon na denggan do na binahenna i tu ahu. 7 Sai na adong do halak na pogos rap dohot hamu, jala boi do bahenonmu na denggan tu nasida manang sadihari lomo rohamuna. Alai ndang sai rap ahu dohot hamu. 8 Dibahen ibana do nasa na tarbahenna. Diusehon ibana pe miak i tu dagingku, laho paradehon tu panguburanku do i. 9 Tutu do na hudok on tu hamu, manang didia pe barita na uli dibaritahon di liat portibi on, hatahononna do nang na binahen ni borua on songon parningotan di ibana.”

10 Dung i, laho ma si Judas Iskariot sahalak sian apostel na 12 i mandapothon angka malim kepala* laho pasahathon Jesus sipsip tu nasida. 11 Las ma roha ni nasida mambege i, jala marjanji ma nasida mangalehon hepeng perak tu ibana. Mulai sian i, dilului ibana ma tingki na denggan laho manjehehon Jesus.

12 Di ari parjolo Perayaan Roti na So Marragi, di na somal nasida mamelehon pelean Paska, disungkun angka sisean i ma tu Jesus, “Didia do dipangido roham paradeonnami di ho sipanganon Paska i?” 13 Disuru Jesus ma dua halak siseanna, ninna ma tu nasida, “Laho ma hamu tu kota. Jumpangmuna ma disi sahalak baoa na mamboan gunsi inganan ni aek. Ihuthon ma ibana. 14 Tu jabu na dia pe ibana masuk, dok ma tu nampuna jabu i, ‘Didok Guru i, “Didia do kamar inganan di ahu asa mangan Paska ahu rap dohot siseanku?”’ 15 Dung i, patuduhononna ma tu hamu kamar parginjang na bidang naung diatur laho pangkeonta. Disi ma parade hamu.” 16 Laho ma sisean sidua halak i tu kota jala dapot ni nasida do songon na nidok ni Jesus. Dung i, diparade nasida ma na porlu tu Paska i.

17 Dung borngin, ro ma Jesus rap dohot apostel na 12 i. 18 Tingki mangan nasida, didok ibana ma, “Tutu do na hudok on tu hamu, adong do sahalak sian hamu na rap mangan dohot ahu na laho manjehehon ahu.” 19 Marsak ma roha ni nasida mambege i jala ganup ma nasida manungkun, “Ahu do na nidokmu Tuan?” 20 Didok ibana ma tu nasida, “Sahalak sian apostel na 12 on do ibana, i ma na pamasukkon tanganna tu mangkuk rap dohot ahu. 21 Laho mate do nian Anak ni jolma i songon na tarsurat taringot tu ibana. Alai marjea ma halak na manjehehon Anak ni jolma i! Sasintongna, dumenggan do molo ndang tubu ibana.”

22 Tingki na mangan i nasida, dibuat Jesus ma roti, ditangiangkon ma jala diponggoli. Dilehon ma i tu angka siseanna, ninna ma, “Buat hamu ma, on manggombarhon dagingku.” 23 Dung i dibuat ma panginuman i, didok ma mauliate tu Debata jala dilehon ma i tu angka sisean i. Sude ma nasida minum sian i. 24 Didok ma tu nasida, “On manggombarhon mudarhu, i ma ‘mudar parjanjian’ na laho diusehon humongkop torop halak. 25 Tutu do na hudok on tu hamu, ndang inumonku be anggur on sahat tu na inumonku anggur na baru di Harajaon ni Debata.” 26 Dung sae mangendehon ende puji-pujian,* nangkok ma nasida tu Dolok Jetun.

27 Ninna Jesus ma tu nasida, “Sude do hamu manadingkon ahu. Ai tarsurat do, ‘Antukonku ma parmahan i gabe marserak ma angka biru-biru i.’ 28 Alai dung hehe ahu, na laho ma ahu manjoloani hamu tu Galilea.” 29 Ninna si Petrus ma tu ibana, “Nang pe sude nasida manadingkon ho, ndang tadingkononku ho.”* 30 Dung i didok Jesus ma tu ibana, “Tutu do na hudok on tu ho, andorang so martahuak dope manuk paduahalihon di borngin on, nunga tolu hali ahu soadahononmu.” 31 Alai lam marsitutu ma si Petrus mandok, “Nang pe mate ahu rap dohot ho, ndang soadahononku ho.” Jala sude ma angka sisean i mandok songon i.

32 Dung i, laho ma Jesus rap dohot siseanna tu inganan na margoar Getsemane. Didok Jesus ma tu angka siseanna, “Hundul ma hamu dison, asa martangiang jolo ahu.” 33 Ditogihon Jesus ma si Petrus, si Jakobus dohot si Johannes mandongani ibana. Mansai marsak jala mansai susa ma dihilala ibana. 34 Ninna Jesus ma tu nasida, “Marsak situtu do rohangku, naeng mate huhilala. Dison ma hamu jala dungo ma hamu.” 35 Dung i mardalan ma ibana tu jolo otik. Marsinggang ma ibana jala martangiang, asa molo boi salpu nian tingki i sian ibana. 36 Dung i didok ibana ma, “Abba,* Amang, sude do tarbahen ho. Salpuhon ma panginuman on sian ahu. Alai unang ma lomo ni rohangku, lomo ni roham ma.” 37 Dung i, mulak ma muse Jesus jala tarpodom ma nasida dapotna. Didok ma tu si Petrus, “Simon, na modom do ho? Na so boi do ho dungo nanggo apala sajom? 38 Tongtong ma hamu dungo jala sai martangiang, asa unang tarela-ela hamu mangulahon dosa. Rade* do nian roha i, alai gale do ia daging.” 39 Laho ma ibana muse martangiang, jala didok ma songon na ditangiangkonna i. 40 Dung didapothon muse siseanna i, tong do tarpodom nasida, ai tung mansai borat do dihilala mata nasida, ndang diboto nasida be sidohononna tu ibana. 41 Tingki mulak ibana patoluhalihon, didok ma tu nasida, “Modom dope hamu jala maradi di tingki sisongon on! Sae ma i! Nunga dapot tingkina, pasahatonna ma Anak ni jolma i tu tangan ni angka pardosa. 42 Hehe ma, laho ma hita. Ida ma! Nunga ro na manjehehon ahu.”

43 Tingki mangkatai dope Jesus, nunga sahat si Judas sahalak sian apostel na 12 i rap dohot torop halak na mamboan podang dohot antuk-antuk, na sinuru ni malim kepala,* angka siboto surat, dohot angka pangituai. 44 Nunga dipaboa siparjehe i hian tanda tu nasida, ninna ma, “Manang ise na huumma, ibana ma i. Tangkup ma ibana, manat ma jaga hamu asa unang malua.” 45 Pintor didapothon ibana ma Jesus, ninna ma, “Guru!” Laos diumma ma Jesus. 46 Dung i, ditangkup nasida ma Jesus. 47 Alai disintak sahalak sian na jongjong disi ma podangna, diroro ma hatoban ni sintua ni malim jala ditallik ma pinggolna. 48 Alai didok Jesus ma tu nasida, “Na dirimpu hamu do ahu pangarampok, umbahen diboan hamu podang dohot antuk-antuk laho manangkup ahu? 49 Hape, ganup ari do ahu di tonga-tongamuna mangajari di bagas joro, ndang ditangkup hamu ahu. Alai masa pe i, laho manggohi Surat na Badia i do.”

50 Dung i lari ma sude sisean i, ditinggalhon ma Jesus. 51 Adong ma disi sahalak doli-doli na mangihuthon Jesus sian na jonok, na holan mamangke abit linen. Naeng ditangkup nasida ma ibana, 52 alai lari ma ibana ndang marpangkean* jala ditadingkon do abit linenna i.

53 Diboan nasida ma Jesus tu sintua ni malim. Marpungu ma sude malim kepala,* angka pangituai dohot angka siboto surat. 54 Alai, diihuthon si Petrus do Jesus sian na dao sahat tu alaman ni jabu ni sintua ni malim i. Jala hundul ma ibana rap dohot angka hatoban na disi mansisulu di lambung ni api. 55 Dilului angka malim kepala* dohot saluhut Sanhedrin* ma hatorangan na so sintong laho mangalo Jesus asa boi diuhum mate ibana. Alai sada pe ndang adong dapot ni nasida. 56 Godang do na mangalehon hatorangan na so sintong laho mangalo Jesus, alai ndang adong na domu hatorangan ni nasida i. 57 Adong do muse manang na piga halak na jongjong mangkatindangkon na so tutu taringot tu ibana, ninna ma, 58 “Hubege hami do didok ibana, ‘Rumpakkononku ma bagas joro na pinajongjong ni tangan ni jolma on, jala di bagasan tolu ari pajongjongonku ma muse bagas joro na asing na so pinajongjong ni tangan ni jolma.’” 59 Alai taringot tusi pe ndang domu hatorangan ni nasida.

60 Ujungna, jongjong ma sintua ni malim di tonga-tonga ni nasida jala disungkun ma Jesus, “Na so dibege ho do na nidok ni nasida laho mangalo ho?” 61 Alai sai hohom do Jesus ndang adong didok manang aha. Dung i, disungkun sintua ni malim i ma muse ibana, ninna ma, “Ho do Kristus Anak ni Debata Natumimbul i?” 62 Dialusi Jesus ma, “Ahu do i, jala idaonmuna ma Anak ni jolma i hundul di siamun ni Debata na marhuaso i jala ro ma ibana di atas ni ombun di langit.” 63 Diribakkon sintua ni malim i ma pangkeanna, ninna ma, “Tu aha be luluan saksi? 64 Nunga dibege hamu ibana mangaleai. Boha do didok rohamuna?” Sude ma nasida mandok na patut ibana diuhum mate. 65 Mulai ma manang na piga halak manijuri Jesus. Ditutup ma bohina, ditinju ma ibana jala ninna ma, “Molo panurirang do ho, paboa ma tu hami ise na mamungkul ho!” Dung i, dipastap ma bohina jala diboan panjaga ni pengadilan i ma ibana.

66 Tingki di toru si Petrus, di alaman, ro ma sahalak hatoban borua ni sintua ni malim tusi. 67 Tingki diida ibana si Petrus mansisulu, dipanotnoti borua i ma ibana jala ninna ma, “Ho pe, dohot do ho rap dohot Jesus na sian Nasaret i.” 68 Alai margabus do si Petrus, ninna ma, “Ndang hutanda i, jala ndang huantusi manang aha na nidokmi.” Dung i laho ma ibana tu lambung ni harbangan.* 69 Diida hatoban borua i ma muse si Petrus, didok ibana ma tu angka na jongjong disi, “Sahalak sian nasida do baoa on.” 70 Alai disoadahon si Petrus do muse. Ndang sadia leleng, didok angka na jongjong i ma muse tu si Petrus, “Toho, dohot do ho sahalak sian nasida, ai halak Galilea do ho.” 71 Alai marsumpa ma ibana, “Ndang hutanda halak na hinataanmuna i!” Jala didok ma uhumon ni Debata ma ibana molo margabus. 72 Pintor martahuak ma manuk paduahalihon, gabe diingot si Petrus ma na nidok ni Jesus tu ibana, “Andorang so martahuak dope manuk paduahalihon, nunga tolu hali ahu soadahononmu.” Mansai lungun ma rohana, dung i tumatangis ma ibana.