Kolosse

2 Naeng do nian di rohangku botoonmuna taringot tu angka naung huulahon sian nasa gogongku humongkop hamu, humongkop angka na di Laodikea, dohot humongkop sude halak na so hea mangida ahu. 2 Anggiat ma tarapul roha ni nasida, marsada di bagasan holong, jala mandapot pasu-pasu alani pangantusion ni nasida na tangkas jala na sintong. Dung i, dapot ni nasida ma parbinotoan na bagas taringot tu rahasia na badia ni Debata, i ma Kristus. 3 Di bagasan ibana do buni saluhut arta, i ma bisuk dohot parbinotoan. 4 Hupaboa do on tu hamu asa unang adong na mangaliluhon hamu marhite angka hata na paoto-otohon. 5 Nang pe ndang rap ahu dohot hamu alai tu hamu do rohangku. Las do rohangku ala taratur hamu jala togu haporseaonmuna di bagasan Kristus.

6 Ala nunga dijalo hamu Kristus Jesus Tuan i, tongtong ma hamu marpangalaho songon ibana. 7 Songon naung diparsiajari hamu, ingkon marurat, togu, jala dipajongjong di ginjang ni Kristus i ma haporseaonmuna. Jala tongtong ma hamu mandok mauliate.

8 Manat ma hamu tu angka halak na laho mamparhatoban hamu marhite ajaran ni jolma dohot angka hata na so marguna, i ma na sian adat ni jolma dohot sian portibi on. Jala ndang sian Kristus i. 9 Ai di bagasan ibana do tarida sude parange ni Debata, 10 jala ndang hurangan manang aha be hamu di bagasan ibana. Ibana do na mangarajai sude pamarenta dohot parhuaso. 11 Ala nunga marhaporseaon hamu tu Kristus i, nunga disunat be hamu. Ndang marhite sunat na binahen ni jolma, alai marhite pasidingkon giot-giot ni daging na mardosa i. Ai songon i do disunat angka siihuthon Kristus. 12 Nunga dikubur be hamu rap dohot ibana marhite pandidionna. Jala dipahehe do hamu rap dohot ibana alani haporseaonmuna tu angka ulaon ni Debata na balga, na pahehehon ibana sian angka na mate.

13 Nang pe naung mate hamu alani angka dosamuna jala ala ndang marsunat hamu, dipangolu Debata do hamu rap dohot Kristus. Nunga disesa Debata sude dosanta 14 jala nunga disesa saluhut Patik na patuduhon na marsala hita. Disesa Debata do Patik i marhite hamatean ni Kristus di hau partinaonan.* 15 Nunga ditaluhon ibana angka pamarenta dohot angka parhuaso. Jala dibahen ibana do nasida gabe sitontonon ni halak, patuduhon naung talu nasida.

16 Alani i unang ma adong halak na manguhumi hamu alani sipanganonmuna dohot siinumonmuna, alani angka perayaan, alani perayaan bulan baru, manang alani sabbat. 17 Ai gombaran tu angka na laho masa do i sude, alai Kristus i do anggo na sasintongna. 18 Manat ma hamu tu angka halak na mangambati hamu manjalo upa i. Ai songon na toruk do roha ni nasida idaon jala disomba nasida do angka suru-suruan.* Holan angka na tarida do dihaporseai nasida jala dihaginjangkon nasida do pingkiran ni nasida na so marguna. 19 Ndang marsihohot nasida tu ulu i, na mangalehon na porlu tu daging i jala na pasadahon daging i marhite angka urat dohot angka sibuk. Dung i gabe magodang ma daging i alani Debata.

20 Molo nunga mate hamu rap dohot Kristus jala dipasiding hamu angka na sian portibi on, boasa ma diihuthon hamu dope portibi on di parngoluonmuna? Jala boasa dope diihuthon hamu angka parenta na mandok, 21 “Unang tiop on! Unang pangan on! Unang jama on!” 22 Holan tu angka na laho suda do parenta on, na mangihuthon patik dohot ajaran ni jolma. 23 Dibahen nasida pe parenta i, ala naeng lomo-lomona do manomba Debata. Songon na toruk ma roha ni nasida idaon jala dipahansit-hansit nasida do dagingna. Nang pe songon na marbisuk idaon angka parenta i, alai ndang marguna i laho mangalo giot-giot ni daging.